“Лойиҳалар ярмаркаси” тадбири ўтказилди

2024 йил 16 декабрь куни давлатимиз раҳбари томонидан ўтказилган видеоселектор йиғилишида маҳаллаларда ишбилармонлик муҳитини яхшилаш, камбағалликни қисқартириш ва тижорат банкларининг ролини ошириш бўйича белгилаб берилган вазифалар ижросини таъминлаш мақсадида Амударё туманида “Лойиҳалар ярмаркаси” тадбири ташкил этилди.

Тадбирда туман ҳокими ўринбосарлари, ташкилотлар раҳбарлари, тижорат банклари масъуллари, маҳалладаги тадбиркорлик билан шуғулланишни хоҳловчи фуқаролар иштирок этди.

Ярмаркани туман ҳокимининг биринчи ўринбосари Фахриддин Юсупов очиб берди. Ҳокимнинг биринчи ўринбосари ўз нутқида бугунги кунда тадбиркорлар учун яратилаётган кенг имкониятлари хусусида сўз юритиб, кичик бизнесни ҳар томонлама ривожлантириш йўлида амалга оширилаётган ислоҳотларга батафсил тўхталиб ўтди.

Дарҳақиқат, бугун юртимизда тадбиркорлар учун барча имкониятлар эшиклари очилган. Президентимиз томонидан ўтган йилнинг 16 декабрь санасида ўтказган видеоселектор йиғилишида ҳам тадбиркорлар учун қатор янги имкониятлар ва имтиёзлар берилиши эълон қилинган эди.

Хусусан, ўтган 6 йилда оилавий тадбиркорлик дастури доирасида кредитини вақтида қайтариб, даромадли бизнесга эга бўлган тадбиркорларга “Кичик бизнесни қўллаб-қувватлаш” дастури доирасида шартсиз 300 миллион сўм кредит берилади. Бу орқали келгуси йилларда кўп сонли аҳоли бандлигини таъминлаш кўзланмоқда.

Шунингдек, 30та туманда балиқчилик, қуёнчилик, чорвачилик ва асаларичилик бўйича кооперацияларни кўпайтириш мақсадларига 500 миллиард сўм йўналтирилиши белгиланди. Эндиликда ҳам инвестиция олиб келадиган, ҳам кўп иш ўрни яратадиган стартап лойиҳаларни қўллаб-қувватлаш кенгайтирилади.

Шу билан бирга шароити оғир бўлган 71та туманга бошқа ҳудудлардан тадбиркорларни таклиф қилиш учун уларга қўшимча кредитлар ажратилиб, жорий йилда мингта оғир маҳалла инфратузилмасига 3 триллион 200 миллиард сўм ажратилиши белгиланган.

Эндиликда “Лойиҳалар ярмаркаси” ҳар бир туман ва шаҳарларда ойда икки марта ташкил қилинади. Туман ва шаҳар ҳокимликлари ташаббуси билан лойиҳалар ярмаркаси ўтказиладиган жой танлаб олиниб, ярмарка ўтказиладиган санадан уч иш кун олдин маҳалла идораси ва ижтимоий тармоқлардаги маҳаллага тегишли гуруҳларда эълонлар жойлаштирилади. Ҳоким ёрдамчилари ва маҳалла банкирлари маҳаллалардан янги лойиҳа қилмоқчи бўлган, кредитга лаёқатли мижозларни лойиҳалар ярмаркасига олиб боради.

Ярмаркада тумандаги овул ва маҳаллаларга бириктирилган банклар дастурлар доирасида ва ўз маблағлари ҳисобидан мавжуд кредит маҳсулотлари бўйича кўргазмали материаллар тайёрлаб, фаол иштирок этади. Бириктирилган банклар ташриф буюрган жисмоний ва юридик шахсларнинг бизнес режаларини кўриб чиқиб, уларнинг эҳтиёжларидан келиб чиққан ҳолда кредит маблағларини ажратиб боришни ўз зиммаларига олади.

Амударё тумани Маданият бўлими биносида ўтказилган дастлабки ярмаркада маҳаллаларга бириктирилган тижорат банклари вакиллари, ҳоким ёрдамчилари ва тадбиркорлар иштирок этди. “Лойиҳалар ярмаркаси” тадбири доирасида аҳолини тадбиркорлик фаолиятига кенг жалб қилиш бўйича ишлаб чиқилган бизнес режалар тақдимот қилинди. Ярмарка доирасида қатор ташаббускорларнинг лойиҳалари тижорат банклари томонидан маъқулланди ва кредит ажратган ҳолда молиялаштириш учун танлаб олинди.

Чарос Арслонова, туман ҳокимлигининг Ахборот хизмати раҳбари.