“Loyihalar yarmarkasi” tadbiri oʻtkazildi

2024-yil 16-dekabr kuni davlatimiz rahbari tomonidan oʻtkazilgan videoselektor yigʻilishida mahallalarda ishbilarmonlik muhitini yaxshilash, kambagʻallikni qisqartirish va tijorat banklarining rolini oshirish boʻyicha belgilab berilgan vazifalar ijrosini taʼminlash maqsadida Amudaryo tumanida “Loyihalar yarmarkasi” tadbiri tashkil etildi.

Tadbirda tuman hokimi oʻrinbosarlari, tashkilotlar rahbarlari, tijorat banklari masʼullari, mahalladagi tadbirkorlik bilan shugʻullanishni xohlovchi fuqarolar ishtirok etdi.

Yarmarkani tuman hokimining birinchi oʻrinbosari Faxriddin Yusupov ochib berdi. Hokimning birinchi oʻrinbosari oʻz nutqida bugungi kunda tadbirkorlar uchun yaratilayotgan keng imkoniyatlari xususida soʻz yuritib, kichik biznesni har tomonlama rivojlantirish yoʻlida amalga oshirilayotgan islohotlarga batafsil toʻxtalib oʻtdi.

Darhaqiqat, bugun yurtimizda tadbirkorlar uchun barcha imkoniyatlar eshiklari ochilgan. Prezidentimiz tomonidan oʻtgan yilning 16-dekabr sanasida oʻtkazgan videoselektor yigʻilishida ham tadbirkorlar uchun qator yangi imkoniyatlar va imtiyozlar berilishi eʼlon qilingan edi.

Xususan, oʻtgan 6-yilda oilaviy tadbirkorlik dasturi doirasida kreditini vaqtida qaytarib, daromadli biznesga ega boʻlgan tadbirkorlarga “Kichik biznesni qoʻllab-quvvatlash” dasturi doirasida shartsiz 300 million soʻm kredit beriladi. Bu orqali kelgusi yillarda koʻp sonli aholi bandligini taʼminlash koʻzlanmoqda.

Shuningdek, 30ta tumanda baliqchilik, quyonchilik, chorvachilik va asalarichilik boʻyicha kooperatsiyalarni koʻpaytirish maqsadlariga 500 milliard soʻm yoʻnaltirilishi belgilandi. Endilikda ham investitsiya olib keladigan, ham koʻp ish oʻrni yaratadigan startap loyihalarni qoʻllab-quvvatlash kengaytiriladi.

Shu bilan birga sharoiti ogʻir boʻlgan 71ta tumanga boshqa hududlardan tadbirkorlarni taklif qilish uchun ularga qoʻshimcha kreditlar ajratilib, joriy yilda mingta ogʻir mahalla infratuzilmasiga 3 trillion 200 milliard soʻm ajratilishi belgilangan.

Endilikda “Loyihalar yarmarkasi” har bir tuman va shaharlarda oyda ikki marta tashkil qilinadi. Tuman va shahar hokimliklari tashabbusi bilan loyihalar yarmarkasi oʻtkaziladigan joy tanlab olinib, yarmarka oʻtkaziladigan sanadan uch ish kun oldin mahalla idorasi va ijtimoiy tarmoqlardagi mahallaga tegishli guruhlarda eʼlonlar joylashtiriladi. Hokim yordamchilari va mahalla bankirlari mahallalardan yangi loyiha qilmoqchi boʻlgan, kreditga layoqatli mijozlarni loyihalar yarmarkasiga olib boradi.

Yarmarkada tumandagi ovul va mahallalarga biriktirilgan banklar dasturlar doirasida va oʻz mablagʻlari hisobidan mavjud kredit mahsulotlari boʻyicha koʻrgazmali materiallar tayyorlab, faol ishtirok etadi. Biriktirilgan banklar tashrif buyurgan jismoniy va yuridik shaxslarning biznes rejalarini koʻrib chiqib, ularning ehtiyojlaridan kelib chiqqan holda kredit mablagʻlarini ajratib borishni oʻz zimmalariga oladi.

Amudaryo tumani Madaniyat boʻlimi binosida oʻtkazilgan dastlabki yarmarkada mahallalarga biriktirilgan tijorat banklari vakillari, hokim yordamchilari va tadbirkorlar ishtirok etdi. “Loyihalar yarmarkasi” tadbiri doirasida aholini tadbirkorlik faoliyatiga keng jalb qilish boʻyicha ishlab chiqilgan biznes rejalar taqdimot qilindi. Yarmarka doirasida qator tashabbuskorlarning loyihalari tijorat banklari tomonidan maʼqullandi va kredit ajratgan holda moliyalashtirish uchun tanlab olindi.

Charos Arslonova, tuman hokimligining Axborot xizmati rahbari.