ФВВга қарашли ҳарбий қисмларда хизмат қилаётган ҳарбий хизматчилар учун тест синовлари ўтказилди
Ўзбекистон Республикаси Олий таълим, фан ва инновациялар вазирлиги ҳузуридаги Билим ва малакаларни баҳолаш агентлиги ва тегишли ташкилотлар томонидан ҳар йили ўтказиладиган махсус имтиҳонлар муддатли ҳарбий хизматни ўтаётган ёшларнинг интеллектуал ривожланиши ҳамда олий таълим муассасаларида таҳсил олиш интилишларини қўллаб-қувватлашга хизмат қилмоқда.
20 февраль куни Президент мактаблари тизимидаги Амударё ихтисослаштирилган мактабида Қорақалпоғистон ҳудудида жойлашган Ўзбекистон Республикаси Фавқулодда вазиятлар вазирлигига қарашли ҳарбий қисмларда хизмат қилаётган муддатли ҳарбий хизматчилар ўртасида олий таълим муассасаларига киришда имтиёз берувчи тавсиянома учун тест синовлари ташкил этилди.
Мазкур тест синовлари ҳарбий хизматчиларнинг билим даражасини аниқлаш, олий таълимга кириш имкониятларини кенгайтириш ҳамда интеллектуал ривожланишларини рағбатлантиришга йўналтирилган. Жараён бошланишидан олдин Билим ва малакаларни баҳолаш агентлигининг Қорақалпоғистон Республикаси бўлими вакиллари томонидан иштирокчиларга тест ўтказиш тартиби, баҳолаш мезонлари ҳамда муҳим жиҳатлар ҳақида тушунчалар берилди.
Имтиёзли тавсиянома бериш жараёни ҳарбий хизматчиларнинг хизмат давомида эришган натижалари ва билим савияси асосида баҳоланади. Асосий мезонлар қаторидан жанговар тайёргарлик, маънавий-маърифий савия ва назарий билимлар ўрин олади. Жанговар тайёргарлик ҳарбий хизматчиларнинг жисмоний тайёргарлиги, тактик машғулотлардаги муваффақиятлари ва хизмат давомида кўрсатган қобилиятларига асосланиб баҳоланади. Маънавий-маърифий савия эса уларнинг ватанпарварлик руҳида тарбияланганлиги, интизоми ҳамда ҳуқуқий билимлари даражаси билан белгиланади. Назарий билимлар эса математика, физика ва мантиқий тафаккурга оид тест синовлари орқали аниқланади.
Тест синовлари 100 та саволдан иборат бўлиб, ҳарбий хизматчиларнинг турли йўналишлардаги тайёргарлик даражасини баҳолашга қаратилган. Баҳолаш тизими жанговар ва маънавий-маърифий тайёргарлик, шунингдек, назарий билимлар даражасига асосланган ҳолда амалга оширилади.
Тавсиянома фақат интизомли, билимли ва фаол ҳарбий хизматчиларга тақдим этилади. Агар ҳарбий хизматчи хизмат давомида интизомий қоидабузарликларга йўл қўйган бўлса, у тавсиянома олиш ҳуқуқидан маҳрум қилинади. Ушбу тизим, бир томондан, ҳарбий хизмат интизомини мустаҳкамлашга хизмат қилса, иккинчи томондан, олий таълимга интилаётган ёшларни ўз билим ва маҳоратини оширишга рағбатлантиради.
Тавсияномага эга бўлган ҳарбий хизматчилар олий таълим муассасаларига киришда тест натижалари бўйича тўплаган балларининг 50 фоизи миқдорида қўшимча балл олиш имкониятига эга бўладилар. Шунингдек, ҳарбий хизматни ўтаган абитуриентлар учун алоҳида квоталар ажратилади. Тавсиянома уч йил давомида амал қилади ва бу муддат ёшлар учун олий таълимга кириш режаларини пухта тайёрлаш имконини яратади.
Мазкур тест синовларида жами 200 нафардан ортиқ муддатли ҳарбий хизматчи иштирок этди. Ушбу ташаббус ёшларга билим олишга бўлган қизиқишини ошириш, ҳарбий хизмат мобайнида эгаллаган тажрибалари асосида олий таълимга йўл очиш имконини бермоқда. Бу эса ўз навбатида ҳарбий хизматчиларнинг интеллектуал ва касбий ривожланишига кўмаклашади.
Шоҳзод Қурбонбоев.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
