Туман бўйича ўтган йили 63 та, жорий йилнинг 2 ойида 14 та ноқонуний қурилган бинолар суд қарорига мувофиқ бузиб ташланган
Мамлакатимизда шаҳарсозлик ва ердан фойдаланиш қонун билан тартибга солинган. Аммо айрим фуқаролар томонидан қонун талабларига риоя қилинмаган ҳолда, рухсатномасиз қурилиш ишларини амалга ошириш ҳолатлари кузатилмоқда. Бу эса нафақат шаҳарсозлик меъёрларининг бузилишига, балки ердан ноқонуний фойдаланиш оқибатида ҳуқуқий муаммоларга ҳам сабаб бўлади. Шу боис, ноқонуний қурилишларга қарши курашиш ва уларнинг олдини олиш давлат органларининг доимий диққат марказида бўлиб келмоқда.
Ноқонуний қурилиш – бу давлат органларининг тегишли рухсатисиз ёки шаҳарсозлик қоидаларига зид равишда барпо этилган турар жой ёки бошқа иншоотдир. Ўзбекистон Республикаси қонунчилигида бундай ҳолатлар аниқланган тақдирда, маҳаллий ҳокимликлар ҳамда ваколатли органлар томонидан белгиланган тартибда чора кўрилади. Агар қурилиш ноқонуний деб топилса, суд қарорига асосан, иншоот бузилиши мумкин.
Бундай ҳолатларнинг олдини олиш учун ҳар бир шахс қурилиш ишларини бошлашдан олдин тегишли ҳужжатларни расмийлаштириши, ер участкасининг мақсадли фойдаланиш мақомини аниқлаши ва шаҳарсозлик нормаларига риоя қилиши зарур.
Фуқаролар томонидан ноқонуний қурилишларга йўл қўйилмаслиги учун ҳуқуқий онгни ошириш ва тушунтириш ишлари олиб борилмоқда. Жумладан, туман ҳокимлиги, Архитектура бўлими ва Мажбурий ижро бюроси томонидан мунтазам равишда профилактик чора-тадбирлар амалга оширилмоқда.
2024 йил давомида Амударё туманида ноқонуний қурилмаларни бузишга оид 208 та ижро ҳужжати қабул қилинган бўлиб, улардан 63 таси ижро этилган ва тегишли қурилмалар бузилган. 2025 йилнинг биринчи ойларида ҳам бу жараён давом этмоқда. Хусусан, январь-февраль ойларида 14 та ноқонуний қурилиш суд қарорлари асосида бузилди.
Фуқаролик ишлари бўйича Амударё туман судининг 2025 йил 14 январь кунги қарорига асосан, Беш овул маҳалласида 56 квадрат метрлик ўзбошимча қурилган турар жойнинг ҳам ҳуқуқий ҳолати ноқонуний деб топилган. Суд қарорига мувофиқ, унинг эгаси ўз ҳисобидан қурилишни бузиши лозимлиги ҳақида огоҳлантирилган. Жавобгарнинг ўз ихтиёри билан 1 март куни қурилма бузилиб, ер дастлабки ҳолатига келтирилди.
Ноқонуний қурилишлар шаҳарсозлик меъёрларини бузиши билан бирга, ердан қонуний фойдаланиш тартибини ҳам издан чиқаради. Шу боис, давлат органлари ва маҳаллий ҳокимликлар томонидан бундай ҳолатларнинг олдини олиш мақсадида қатъий чоралар кўрилмоқда. Қолаверса, ноқонуний қурилишлар экологияга ҳам салбий таъсир кўрсатиши мумкин. Шаҳарсозлик режаларисиз қурилган бино ва иншоотлар атроф-муҳитга, муҳандислик коммуникациялари ва инфратузилмага зиён етказиши эҳтимоли юқори.
Қонунчилик талабларига амал қилмаслик ҳуқуқий ва молиявий жавобгарликка олиб келиши мумкин. Шунинг учун ҳар бир фуқаро қурилиш ишларида масъулиятли бўлиши, ўз ҳуқуқ ва мажбуриятларига амал қилиши ва албатта, бино ёки иншоот қуришдан олдин тегишли тартибда рухсат олиши лозим.
Шоҳзод Қурбонбоев.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
