Халқ депутатлари Амударё тумани Кенгашининг 8-сессияси тўғрисида ахборот

Жорий йилнинг 4 апрель куни Амударё тумани ҳокимлигининг мажлислар залида VII чақириқ Халқ депутатлари туман кенгашининг навбатдаги 8-сессияси бўлиб ўтди. Сессия мажлисида депутатлар, ҳоким ўринбосарлари, бўлимлар, ташкилотлар раҳбарлари ҳамда оммавий ахборот воситалари вакиллари иштирок этди.

Сессияни Халқ депутатлари туман кенгаши Раисининг ўринбосари – “3-Дўстлик” сайлов округидан депутат Мадамин Казаков очди ва олиб борди. Сессия котиблигига “9-Қиличбой” сайлов округидан депутат Муҳаббат Раҳимова сайланди.

Кун тартибидаги дастлабки масала – 2025 йилнинг биринчи чораги давомида ҳуқуқбузарликлар профилактикаси ва жиноятчиликка қарши курашиш бўйича амалга оширилган ишлар юзасидан туман Ички ишлар бўлими бошлиғи Мухаметали Хожамуратов ҳисобот берди.

Ҳисоботда жамоат тартибини сақлаш, фуқароларнинг тинчлиги ва хавфсизлигини таъминлаш, жиноятчилик ва ҳуқуқбузарликларнинг олдини олиш, содир этилган жиноятларни ўз вақтида фош қилиш, ҳудудда криминоген вазиятни барқарорлаштиришга қаратилган бир қатор тезкор профилактик тадбирлар амалга оширилаётганлиги хусусида сўз юритилди.

Сессия кун тартибидаги Қорақалпоғистон Республикаси бюджетининг 2025 йил январь ҳолатига аниқланган эркин қолдиқ маблағлари ҳисобидан туман Ободонлаштириш бошқармасига маблағлар ажратиш тўғрисидаги масала юзасидан туман ҳокимлигининг молия, иқтисодиёт ва камбағалликни қисқартириш масалалари бўйича бош мутахассиси Отабек Оллоёров ахборот берди. Ахборотда Амударё устига қурилган, ҳозирда фойдаланилмаётган эски понтон кўприк қисмларидан очиқ осмон остидаги музей ташкил қилиш учун маблағ ажратиш тўғрисида таклиф билдирилди. Ушбу таклиф барча депутатлар томонидан бир овоздан маъқулланди.

Кун тартибидаги навбатдаги – “Ташаббусли бюджет”нинг жорий йилги 1-мавсуми якунларига кўра ғолиб деб топилган лойиҳаларни тасдиқлаш тўғрисидаги масала юзасидан туман ҳокимининг қурилиш, тўсиқларсиз муҳит яратиш, коммуникациялар, коммунал хўжалик, экология ва кўкаламзорлаштириш масалалари бўйича ўринбосари Баҳодир Эрназаров ҳисобот берди.

Ҳисоботда “Ташаббусли бюджет”нинг жорий йилги 1-мавсумида 10 мартдан 20 мартга қадар бўлиб ўтган овоз бериш жараёни якунларига кўра энг кўп овоз тўплаган 11 та ташаббус ғолиб деб топилгани, ушбу ташаббусларнинг умумий қиймати 16 млрд 497 млн 828 минг сўмни ташкил этиши қайд қилинди ва мазкур лойиҳалар ҳақида батафсил маълумот берилди.

Шунингдек, туман ҳокими ўринбосари Баҳодир Эрназаров Ўзбекистон Республикаси Вазирлар Маҳкамасининг “Шаҳарлар ва бошқа аҳоли пунктлари кўчалари ҳамда ички хўжалик йўллари инфратузилмасини янада такомиллаштириш тўғрисида”ги қарори ижроси борасида туманда амалга оширилаётган ишлар юзасидан ҳам ҳисобот берди.

Сессия мажлисида Ўзбекистон Республикаси Президентининг Қорақалпоғистон Республикаси Амударё туманидаги Халқ қабулхонаси мудири Анвар Оразбаев давлат органлари ва бошқа ташкилотларнинг уйма-уй юриш, мурожаатлар билан ишлаш, ижтимоий ва бошқа объектларда аниқланган муаммоларни ҳал қилиш борасидаги фаолиятини тизимли ўрганиш, кўриб чиқилиши мажбурий бўлган тақдимномалар киритиш борасида 1-чорак давомида амалга оширилган ишлар тўғрисидаги масала юзасидан ҳисобот берди.

Ҳисоботда Ўзбекистон Республикаси Президентининг Амударё туманидаги Халқ қабулхонасига Виртуал ва Халқ қабулхоналари орқали 2025 йил бошидан 31 март санасига қадар жами 1 минг 106 та масалалар бўйича мурожаатлар келиб тушгани, ушбу мурожаатлардан 900 таси кўриб чиқилгани, 682 таси қаноатлантирилгани қайд қилинди. Ҳисобот даврида 381 та мурожаатлар ҳуқуқий маълумот бериш орқали ҳал қилинган бўлса, 24 та мурожаатлар узоқ муддатли назоратга олинган, 194 та мурожаатлар эгаларига эса тушунтиришлар берилган. Ушбу мурожаатларнинг 3 таси кўрмасдан қолдирилгани, 5 таси рад этилиб, 16 таси тугатилгани, қолган 206 та мурожаатлар эса кўриб чиқиш жараёнида экани таъкидланди.

Сессия кун тартибидаги навбатдаги масала бўйича туман сув етказиб бериш хизмати давлат муассасаси директори Шукурло Юсупов ҳисобот бериб, истеъмолчилар кесимида экинларни суғориш учун сув олиш лимитлари бўйича депутатларга маълумотлар берди. Ҳисоботда келтирилишича, 2025 йил вегетация даврида туман бўйича жами 38 минг 108 гектар экин экиладиган майдонда, шундан 16 минг гектар пахта, 5 минг 809 гектар кузги буғдой ва 9 минг 647 гектар бошқа экинлар, 6 минг 652 гектар томорқа ер майдонларини суғориш режалаштирилган ва шу мақсадда сув олиш лимитлари ишлаб чиқилган.

Сессия кун тартибига киритилган барча масалалар атрофлича кўриб чиқилиб, муҳокама қилинди ва тегишли қарорлар қабул қилинди. Шу билан туман Кенгашининг 8-сессияси ўз ишини якунлади.

Чарос Арслонова, туман ҳокимлигининг Ахборот хизмати раҳбари.