Амударёда кенг кўламли бунёдкорлик ишлари олиб борилмоқда

Сўнгги йилларда мамлакатимиз бўйлаб кенг кўламли қурилиш ишлари амалга оширилмоқда. Бу эса нафақат шаҳарларда, балки чекка ҳудудларда ҳам замонавий инфратузилманинг барпо этилишига йўл очмоқда. Янги мактаблар, боғчалар, тиббиёт муассасалари, кўп қаватли уйлар, йўллар ва кўприклар бунёд этилаётгани аҳолининг ҳаёт сифатини оширишга хизмат қилмоқда. Қурилиш ишлари замонавий технологиялар асосида олиб борилиб, экологик хавфсизлик ва энергия тежамкорлиги масалаларига алоҳида эътибор қаратилмоқда.

Қурилиш соҳасида олиб борилаётган кенг кўламли ислоҳотлар натижасида Амударё туманининг Манғит шаҳри янгича, замонавий қиёфа касб этмоқда, қишлоқларда аҳоли турмуши кун сайин фаровонлашиб бормоқда. Бунёдкорлик ишлари натижасида ижтимоий инфратузулма тобора яхшиланиб, таълим, тиббиёт, уй-жой қурилиши борасида аҳолининг эҳтиёжлари қондирилмоқда.

Айни кунларда Ўзбекистон Республикаси Президентининг “Янги Ўзбекистон” массивларини қуриш ва ҳудудларнинг ижтимоий-иқтисодий ривожланишини таъминлаш чора-тадбирлари тўғрисида”ги Фармони асосида туманнинг Дўстлик маҳалласи ҳудудида “Янги Ўзбекистон” массивидаги кўп хонадонли уй-жойларнинг қурилиш ишлари қизғин паллага кирган. “Янги Ўзбекистон” массивида ҳар бири 5 қаватли бўлган 8 та кўп қаватли уйлар қурилиши режалаштирилган бўлиб, ҳар бири 30-35та хонадонга мўлжалланган турар жойлар қурилишида тумандаги 8 та қурилиш ташкилотлари қурувчилари фаолият олиб боришмоқда.

Шунингдек, давлатимиз раҳбарининг “Ислом тараққиёт банки ва ОПEК халқаро тараққиёт жамғармаси иштирокида “Қишлоқ жойларни барқарор ривожлантириш” лойиҳасини амалга ошириш чора-тадбирлари тўғрисида”ги қарори ҳам янги қурилиш ва бунёдкорлик ишларига асос бўлмоқда.

Қишлоқ аҳоли пунктларининг меъморий қиёфасини тубдан янгилаш, ҳудудларни комплекс ривожлантириш, йўл-транспорт инфратузилмаси, муҳандислик-коммуникация тармоқлари ва ижтимоий соҳа объектларини барпо этиш орқали аҳолининг турмуш маданиятини юксалтириш мақсадида илгари сурилган мазкур лойиҳа асосида Қорақалпоғистон Республикаси, Бухоро, Навоий ва Хоразм вилоятларининг 20 та туманидаги 170 та маҳаллаларда, шундан 40 та марказий, 130 та ёндош маҳаллаларда бунёдкорлик ишлари амалга оширилиши белгиланган.

Қарор асосида Амударё туманида “Ислом тараққиёт банки” ва ОПEК халқаро тараққиёт жамғармаси маблағлари ҳисобидан 7 та ижтимоий соҳа объектлари қад ростламоқда. Улар 4 та пудратчи ташкилот томонидан барпо этилмоқда. Хусусан, “Замин қурилиш транс сервис” МЧЖ томонидан Фаровон маҳалласи ҳудудида 90 ўринли, Олмазор маҳалласи Бирдамлик ва Янгибоғ кўчалари туташган ҳудудда 120 ўринли, Арна бўйи маҳалласи Покизалик кўчасида 150 ўринли янги замонавий шарт-шаротиларга эга мактабгача таълим ташкилотлари қурилиши жадал суръатларда давом этмоқда.

Шунингдек, Дўстлик маҳалласининг Чаманзор кўчасида 240 ўринли янги мактабгача таълим ташкилоти биноси “Хоразм таъмирлаш” МЧЖ, Ўртақалъа овулида маҳалла мажмуи ва Тошёп овули ҳудудидаги қишлоқ врачлик пункти бинолари эса “Бакен Қурилиш монтаж” ва “Бухрем стал строй” МЧЖ томонидан қурилиши белгиланган.

Қолаверса, Тошёп овули ҳудудида кунига 50 ташрифга мўлжалланган янги қишлоқ врачлик пункти қурилиши “Шўрахон қурилиш монтаж” МЧЖ томонидан амалга оширилмоқда. Айни пайтда лойиҳа доирасида ижтимоий соҳа объектларида қурилиш ишлари жадал суъратларда давом этмоқда.

Таъкидлаш жоизки, бундай улкан бунёдкорлик ишларининг марказида инсон қадри, аҳолининг эҳтиёж ва манфаатлари туради. Ҳар бир қурилаётган объект, барпо этилаётган инфратузилма аҳоли учун қулайлик, фаровон турмуш шароитларини яратишга қаратилганлиги билан аҳамиятлидир.

Чарос Арслонова, туман ҳокимлигининг Ахборот хизмати раҳбари.