Amudaryoda keng koʻlamli bunyodkorlik ishlari olib borilmoqda

Soʻnggi yillarda mamlakatimiz boʻylab keng koʻlamli qurilish ishlari amalga oshirilmoqda. Bu esa nafaqat shaharlarda, balki chekka hududlarda ham zamonaviy infratuzilmaning barpo etilishiga yoʻl ochmoqda. Yangi maktablar, bogʻchalar, tibbiyot muassasalari, koʻp qavatli uylar, yoʻllar va koʻpriklar bunyod etilayotgani aholining hayot sifatini oshirishga xizmat qilmoqda. Qurilish ishlari zamonaviy texnologiyalar asosida olib borilib, ekologik xavfsizlik va energiya tejamkorligi masalalariga alohida eʼtibor qaratilmoqda.

Qurilish sohasida olib borilayotgan keng koʻlamli islohotlar natijasida Amudaryo tumanining Mangʻit shahri yangicha, zamonaviy qiyofa kasb etmoqda, qishloqlarda aholi turmushi kun sayin farovonlashib bormoqda. Bunyodkorlik ishlari natijasida ijtimoiy infratuzulma tobora yaxshilanib, taʼlim, tibbiyot, uy-joy qurilishi borasida aholining ehtiyojlari qondirilmoqda.

Ayni kunlarda Oʻzbekiston Respublikasi Prezidentining “Yangi Oʻzbekiston” massivlarini qurish va hududlarning ijtimoiy-iqtisodiy rivojlanishini taʼminlash chora-tadbirlari toʻgʻrisida”gi Farmoni asosida tumanning Doʻstlik mahallasi hududida “Yangi Oʻzbekiston” massividagi koʻp xonadonli uy-joylarning qurilish ishlari qizgʻin pallaga kirgan. “Yangi Oʻzbekiston” massivida har biri 5 qavatli boʻlgan 8 ta koʻp qavatli uylar qurilishi rejalashtirilgan boʻlib, har biri 30-35ta xonadonga moʻljallangan turar joylar qurilishida tumandagi 8 ta qurilish tashkilotlari quruvchilari faoliyat olib borishmoqda.

Shuningdek, davlatimiz rahbarining “Islom taraqqiyot banki va OPEK xalqaro taraqqiyot jamgʻarmasi ishtirokida “Qishloq joylarni barqaror rivojlantirish” loyihasini amalga oshirish chora-tadbirlari toʻgʻrisida”gi qarori ham yangi qurilish va bunyodkorlik ishlariga asos boʻlmoqda.

Qishloq aholi punktlarining meʼmoriy qiyofasini tubdan yangilash, hududlarni kompleks rivojlantirish, yoʻl-transport infratuzilmasi, muhandislik-kommunikatsiya tarmoqlari va ijtimoiy soha obʼektlarini barpo etish orqali aholining turmush madaniyatini yuksaltirish maqsadida ilgari surilgan mazkur loyiha asosida Qoraqalpogʻiston Respublikasi, Buxoro, Navoiy va Xorazm viloyatlarining 20 ta tumanidagi 170 ta mahallalarda, shundan 40 ta markaziy, 130 ta yondosh mahallalarda bunyodkorlik ishlari amalga oshirilishi belgilangan.

Qaror asosida Amudaryo tumanida “Islom taraqqiyot banki” va OPEK xalqaro taraqqiyot jamgʻarmasi mablagʻlari hisobidan 7 ta ijtimoiy soha obʼektlari qad rostlamoqda. Ular 4 ta pudratchi tashkilot tomonidan barpo etilmoqda. Xususan, “Zamin qurilish trans servis” MChJ tomonidan Farovon mahallasi hududida 90-oʻrinli, Olmazor mahallasi Birdamlik va Yangibogʻ koʻchalari tutashgan hududda 120-oʻrinli, Arna boʻyi mahallasi Pokizalik koʻchasida 150-oʻrinli yangi zamonaviy shart-sharotilarga ega maktabgacha taʼlim tashkilotlari qurilishi jadal surʼatlarda davom etmoqda.

Shuningdek, Doʻstlik mahallasining Chamanzor koʻchasida 240-oʻrinli yangi maktabgacha taʼlim tashkiloti binosi “Xorazm taʼmirlash” MChJ, Oʻrtaqalʼa ovulida mahalla majmui va Toshyop ovuli hududidagi qishloq vrachlik punkti binolari esa “Baken Qurilish montaj” va “Buxrem stal stroy” MChJ tomonidan qurilishi belgilangan.

Qolaversa, Toshyop ovuli hududida kuniga 50 tashrifga moʻljallangan yangi qishloq vrachlik punkti qurilishi “Shoʻraxon qurilish montaj” MChJ tomonidan amalga oshirilmoqda. Ayni paytda loyiha doirasida ijtimoiy soha obʼektlarida qurilish ishlari jadal suʼratlarda davom etmoqda.

Taʼkidlash joizki, bunday ulkan bunyodkorlik ishlarining markazida inson qadri, aholining ehtiyoj va manfaatlari turadi. Har bir qurilayotgan obʼekt, barpo etilayotgan infratuzilma aholi uchun qulaylik, farovon turmush sharoitlarini yaratishga qaratilganligi bilan ahamiyatlidir.

Charos Arslonova, tuman hokimligining Axborot xizmati rahbari.