Пробация назоратидаги шахслар билан очиқ мулоқот ташкил этилди

Юрт тинчлиги ва барқарор ривожи, аввало, аҳоли ўртасида ҳуқуқбузарлик ва жиноят содир этилишининг олдини олишга қаратилган тизимли ишлар самарасига боғлиқ. Мамлакатимизда жиноятчиликнинг барвақт олдини олиш, жазо муддатини ўтаб қайтган шахсларни жамиятга мослаштириш ва уларни қайта жиноят содир этишдан сақлашга алоҳида эътибор қаратилмоқда. Айниқса, ҳафтанинг ҳар пайшанба куни “Профилактика куни” сифатида белгиланиб, шу куни турли тарғибот ва тушунтириш тадбирлари амалга оширилмоқда.

Профилактика куни доирасида маҳаллаларда фуқаролар билан очиқ мулоқотлар, ҳуқуқий саводхонликни оширишга қаратилган семинарлар, турли профилактик рейдлар ва иш ўринларини яратишга доир амалий учрашувлар ўтказиб келинмоқда.

Яқинда Амударё тумани Ички ишлар бўлими мажлислар залида Пробация хизмати назоратида турган, жазо муддатини ўтаб қайтган шахслар иштирокида очиқ мулоқот ташкил этилди. Тадбирда туман ҳокими ўринбосари, Оила ва хотин-қизлар бўлими бошлиғи Гўзал Сабурова, туман прокурори, адлия маслаҳатчиси Баҳром Машарипов ҳамда туман ИИБ бошлиғи, подполковник Муҳаммадали Хожамуратов иштирок этди.

Учрашувда Президентимизнинг 2025 йил 3 январдаги “2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида”ги Қарори мазмун-моҳияти кенг тушунтирилди. Қарорда белгиланган вазифалар ижроси доирасида маҳаллаларда криминоген вазиятни бартараф этиш, пробациядаги шахсларнинг ижтимоий ҳаётга қайтиши учун зарур шарт-шароитлар яратиш, уларни ҳуқуқий йўналишда қўллаб-қувватлаш масалалари муҳокама этилди.

Шунингдек, маҳалла фаоллари, психологлар ва профилактика инспекторлари ўртасида ҳамкорликни мустаҳкамлаш орқали ҳар бир фуқаронинг ҳолати индивидуал ўрганилиши лозимлиги таъкидланди.

Мутасадди раҳбарлар томонидан қайд этилганидек, бугунги кунда пробацияда турган шахсларга қайта ҳаётни бошлаш, меҳнат фаолияти билан банд бўлиш, таълим олиш ва тадбиркорлик билан шуғулланиш учун давлат томонидан кенг имкониятлар яратиб берилмоқда. Бу эса уларнинг жамиятда ўз ўрнига эга бўлишларига замин яратади.

Учрашув давомида пробациядаги шахслар ўз муаммо ва таклифлари билан мурожаат қилишди. Жумладан, ишга жойлашиш, касб-ҳунар ўрганиш, ижтимоий ёрдам олиш масалалари юзасидан билдирилган ҳар бир мурожаат батафсил ўрганилиб, тегишли чоралар белгиланди ва ижобий ҳал этиладиган бўлди.

Албатта, бундай учрашувлар пробациядаги шахсларга нафақат ҳуқуқий ёрдам, балки маънавий қўллаб-қувватлаш, уларни жамиятда муносиб ўрин эгаллашига хизмат қилади. Инсон шаъни ва қадр-қиммати юксак қийматга эга бўлган бугунги ислоҳотлар даврида “Инсон – жамият – давлат” тамойили амалда ўз ифодасини топмоқда. Шу боисдан, профилактик тадбирларнинг тизимли ва таъсирчан ташкил этилиши жамият хавфсизлиги ҳамда фуқаролар манфаатларини таъминлашда муҳим ўрин тутади.

Амударё тумани Ички ишлар бўлими Жамоат хавфсизлиги хизмати Пробация гуруҳи