Амударё туманида кенг кўламли ободонлаштириш ишлари босқичма-босқич амалга оширилмоқда
Амударё туманида сўнгги йилларда аҳолининг турмуш сифатини ошириш, ҳудудларни обод қилиш, инфратузилмаларни яхшилаш борасида кенг кўламли ишлар амалга оширилмоқда. Айниқса, ички йўлларнинг ҳолатини яхшилаш бўйича амалга оширилаётган саъй-ҳаракатлар эътиборга лойиқдир. Туманда кенг кўламда ички йўлларга қум-шағал аралашмани ётқизиш, йўл четларини тозалаш ва ободонлаштириш ишлари олиб борилди ҳамда бу борадаги ишлар давом этмоқда. Навбатдаги босқичда туманнинг Боғ, Дарё бўйи, Чойкўл ва Хизр эли овул ҳамда маҳаллаларидаги ички кўчаларга қум-шағал аралашмаси тўшаш ишлари бошлаб юборилди. Бу ташаббус республика миқёсидаги раҳбарлар иштирокида босқичма-босқич амалга оширилмоқда.
Мазкур жараён Ўзбекистон Республикаси Президенти маслаҳатчиси Турсунхон Худойбергенов бошчилигида, вазирлик ва идоралар раҳбарлари иштирокида ташкил этилди. Ташриф давомида мутасаддилар бевосита жойларга чиққан ҳолда, амалга оширилаётган ишлар билан танишди, камчиликлар ва имкониятларни жойида кўздан кечирдилар. Уларнинг жойларга чиқиб, аҳоли билан бевосита мулоқот қилгани, мавжуд муаммоларни ўрганиб, жойида ҳал этишга қаратилган ҳаракати аҳоли томонидан илиқ қарши олинди.
Таъкидлаш керакки, ички йўлларнинг ҳолати ҳар бир маҳалланинг қиёфаси, ҳар бир фуқаронинг кундалик ҳаётига бевосита таъсир кўрсатади. Айнан шу жиҳат инобатга олиниб, туманнинг энг оғриқли нуқталаридан бири бўлган ички йўлларни таъмирлаш масаласи раҳбарлар томонидан устувор вазифа сифатида белгиланган. Бу ишларга мутахассислар ва зарур техникалар сафарбар қилиниб, талаб қилинадиган қурилиш материаллари ўз вақтида етказиб берилмоқда ва қисқа муддат ичида бир нечта ҳудуддаги йўлларга қум-шағал аралашмалари ётқизилди.
Бир куннинг ўзида ўртача тўрт маҳалла ҳудудидаги умумий узунлиги 2 километрдан ортиқ бўлган ички йўлларга қум-шағал аралашмаси ётқизилмоқда. Қолаверса, йўл юзалари текисланиб, аҳолининг ҳаракатланишига қулайлик яратилмоқда. Шунингдек, аҳоли ҳам ушбу хайрли ишга ўз ҳиссасини қўшиб, йўл четларини ободонлаштириш, йўл атрофини чиқиндилардан тозалаш, дарахтлар остини юмшатиш, оқова сувларнинг тўғри оқишини таъминлаш учун ариқларни тозалаш каби ишларда фаол иштирок қилишмоқда. Зеро, йўлларнинг обод бўлиши ижтимоий кайфиятни кўтариб, транспорт воситаларининг ҳаракатини осонлаштиради ва одамларнинг давлатга бўлган ишончини мустаҳкамлайди.
Узоқ йиллардан бери таъмир кўрмаган, қишда лой, ёзда чанг-тўзон бўлиб қоладиган йўллар эндиликда аҳоли ва транспорт воситаларининг эмин-эркин ҳаракатланишга имкон бермоқда. Бу эса туманнинг иқтисодий ва ижтимоий фаоллиги ошишига ҳам хизмат қилади.
Туманимизда кенг кўламда амалга оширилаётган ички йўлларни таъмирлаш ишлари ислоҳотлар амалда қандай натижа бераётганининг ёрқин мисолидир. Бу муҳтарам Президентимиз томонидан илгари сурилаётган “Инсон қадри учун” тамойилининг амалдаги ифодасидир. Эндиликда бу равон йўллар нафақат манзилларни, балки кўнгилларни бир-бирига боғлаб, халқнинг орзу-умидлари рўёби, келажакка ишончи сифатида муҳим аҳамият касб этмоқда.
Чарос Арслонова, туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
