“Коррупция – давлат ва жамият тараққиётига таҳдид” номли грант лойиҳаси доирасида тиббиёт ходимлари иштирокида йиғилиш ўтказилди

Бугунги кунда коррупцияга қарши курашишда фуқароларнинг ҳуқуқий онги ва жамоатчилик назоратини юксалтириш, ҳалоллик ва адолатни ҳаёт тарзига айлантириш долзарб вазифага айланган. Бу борада оммавий ахборот воситаларининг фаол иштироки, турли соҳалар вакилларини жалб этган ҳолда ташкил этилаётган тарғибот тадбирлари муҳим аҳамият касб этмоқда.

Ўзбекистон Республикаси Олий Мажлиси ҳузуридаги Фуқаролик жамияти институтларини қўллаб-қувватлаш жамоат фонди Қорақалпоғистон Республикаси бўлинмаси томонидан молиялаштирилган “Коррупция – давлат ва жамият тараққиётига таҳдид” номли грант лойиҳаси доирасида “Амударё телевидениеси” таҳририяти томонидан бир қатор чора-тадбирлар ташкил этилмоқда.

Яқинда мазкур лойиҳа доирасида “Амударё ТВ” телеканали журналист ва мухбирлари томонидан туман Прокуратураси, маҳаллий депутатлар ва имомлар билан ҳамкорликда Қипчоқ шаҳарчасида жойлашган 1-сонли оилавий поликлиника биносида тиббиёт ходимлари иштирокида давра суҳбати ўтказилди. Унда коррупция ва тамагирликнинг салбий оқибатлари, унга нисбатан жазо муқаррарлиги хусусида тушунтириш ва тарғибот ишлари олиб борилди.

Тадбирда Халқ депутатлари туман Кенгаши котибияти мудири Мансур Ўразбоев, туман прокурорининг ёрдамчиси Санжар Абдуллаев, “Ҳожи эшон бобо” жомеъ масжиди имом ноиби Шерзод Ўразбоев, 1-сонли оилавий поликлиника мудири Рустам Қидирбоев, туман тиббиёт бирлашмаси шифокори Тамара Саидова, “Коррупция – давлат ва жамият тараққиётига таҳдид” лойиҳаси координаторлари, журналистлар ҳамда тиббиёт ходимлари иштирок этди.

Жамиятда коррупцияга нисбатан ҳуқуқий иммунитетни шакллантиришга қаратилган мазкур учрашувда лойиҳа координаторларидан бири, "Тараққиёт кўзгуси" газетаси махсус мухбири Робия Йўлдошева тадбир иштирокчиларига “Коррупция – давлат ва жамият тараққиётига таҳдид” лойиҳасини амалга оширишдан кўзланган мақсад ва кутилаётган натижалар хусусида батафсил маълумот берди.

Шундан сўнг Халқ депутатлари туман Кенгаши котибияти мудири Мансур Ўразбоев мамлакатимизда коррупцияга қарши курашиш борасида амалга оширилаётган кенг кўламли ислоҳотлар, қабул қилинаётган қонун ҳужжатлари, давлат идоралари ўртасидаги ҳамкорлик механизмлари ҳамда жамоатчилик назоратини кучайтириш юзасидан олиб борилаётган ишлар ҳақида маълумот берди. Шунингдек, ҳар бир фуқаро ушбу жараёнда фаол иштирок этиши, адолат ва шаффофликни таъминлашга ҳисса қўшиши зарурлиги алоҳида таъкидланди.

Учрашув давомида туман прокурорининг ёрдамчиси Санжар Абдуллаев тадбир иштирокчиларига коррупция билан боғлиқ жиноятларни содир этган шахслар учун жазо муқаррар эканлиги, фуқаролар эса ўз қонуний ҳуқуқ ва манфаатларини яхши билиши зарурлиги ҳақида атрофлича маълумот берди. Шу билан бирга, у коррупцияга оид ҳуқуқбузарликлар, манфаатлар тўқнашуви ва порахўрлик каби иллатлар ҳақида кенг тушунчалар берди ҳамда уларнинг жамият тараққиётига етказадиган салбий оқибатлари хусусида тўхталиб ўтди.

Учрашувда сўзга чиққан “Ҳожи эшон бобо” жомеъ масжиди имом ноиби Шерзод Ўразбоев ислом динида порахўрлик ва тамагирлик каби ҳолатлар оғир гуноҳ сифатида баҳоланиши, бундай жиноятларни содир этган шахслар учун шариатда қаттиқ ҳукмлар белгилаб қўйилгани ҳақида тўхталиб ўтди. Шунингдек, ҳалоллик, адолат ва виждонли бўлиш инсон учун энг улуғ фазилатлардан экани алоҳида таъкидланди.

Тадбир якунида 1-сонли оилавий поликлиника мудири Рустам Қидирбоев сўзга чиқиб, тиббиёт муассасасида шундай муҳим ва долзарб мавзу юзасидан ўтказилган учрашув учун тадбир ташкилотчиларига самимий миннатдорлик билдирди. Шунингдек, бу каби тарғибот тадбирларини мунтазам ўтказиш орқали тиббиёт ходимларининг ҳуқуқий онги ва масъулияти ошиши, фуқароларга янада самарали хизмат кўрсатишга интилиш мустаҳкамланиши таъкидланди.

Мухтасар айтганда, коррупцияга қарши курашиш нафақат давлат органлари, балки барча фуқароларнинг ҳам бурчи ва масъулиятидир. Бу куби учрашувлар жамиятда адолат, ҳалоллик ва қонун устуворлигини таъминлашда муҳим аҳамиятга эга. “Амударё телевидениеси”нинг мазкур ташаббуси ана шундай эзгу мақсадларга хизмат қилмоқда.

Шоҳзод Қурбонбоев, лойиҳа координатори.