“Korruptsiya – davlat va jamiyat taraqqiyotiga tahdid” nomli grant loyihasi doirasida tibbiyot xodimlari ishtirokida yigʻilish oʻtkazildi

Bugungi kunda korruptsiyaga qarshi kurashishda fuqarolarning huquqiy ongi va jamoatchilik nazoratini yuksaltirish, halollik va adolatni hayot tarziga aylantirish dolzarb vazifaga aylangan. Bu borada ommaviy axborot vositalarining faol ishtiroki, turli sohalar vakillarini jalb etgan holda tashkil etilayotgan targʻibot tadbirlari muhim ahamiyat kasb etmoqda.

Oʻzbekiston Respublikasi Oliy Majlisi huzuridagi Fuqarolik jamiyati institutlarini qoʻllab-quvvatlash jamoat fondi Qoraqalpogʻiston Respublikasi boʻlinmasi tomonidan moliyalashtirilgan “Korruptsiya – davlat va jamiyat taraqqiyotiga tahdid” nomli grant loyihasi doirasida “Amudaryo televideniyesi” tahririyati tomonidan bir qator chora-tadbirlar tashkil etilmoqda.

Yaqinda mazkur loyiha doirasida “Amudaryo TV” telekanali jurnalist va muxbirlari tomonidan tuman Prokuraturasi, mahalliy deputatlar va imomlar bilan hamkorlikda Qipchoq shaharchasida joylashgan 1-sonli oilaviy poliklinika binosida tibbiyot xodimlari ishtirokida davra suhbati oʻtkazildi. Unda korruptsiya va tamagirlikning salbiy oqibatlari, unga nisbatan jazo muqarrarligi xususida tushuntirish va targʻibot ishlari olib borildi.

Tadbirda Xalq deputatlari tuman Kengashi kotibiyati mudiri Mansur Oʻrazboyev, tuman prokurorining yordamchisi Sanjar Abdullayev, “Hoji eshon bobo” jomeʼ masjidi imom noibi Sherzod Oʻrazboyev, 1-sonli oilaviy poliklinika mudiri Rustam Qidirboyev, tuman tibbiyot birlashmasi shifokori Tamara Saidova, “Korruptsiya – davlat va jamiyat taraqqiyotiga tahdid” loyihasi koordinatorlari, jurnalistlar hamda tibbiyot xodimlari ishtirok etdi.

Jamiyatda korruptsiyaga nisbatan huquqiy immunitetni shakllantirishga qaratilgan mazkur uchrashuvda loyiha koordinatorlaridan biri, "Taraqqiyot koʻzgusi" gazetasi maxsus muxbiri Robiya Yoʻldosheva tadbir ishtirokchilariga “Korruptsiya – davlat va jamiyat taraqqiyotiga tahdid” loyihasini amalga oshirishdan koʻzlangan maqsad va kutilayotgan natijalar xususida batafsil maʼlumot berdi.

Shundan soʻng Xalq deputatlari tuman Kengashi kotibiyati mudiri Mansur Oʻrazboyev mamlakatimizda korruptsiyaga qarshi kurashish borasida amalga oshirilayotgan keng koʻlamli islohotlar, qabul qilinayotgan qonun hujjatlari, davlat idoralari oʻrtasidagi hamkorlik mexanizmlari hamda jamoatchilik nazoratini kuchaytirish yuzasidan olib borilayotgan ishlar haqida maʼlumot berdi. Shuningdek, har bir fuqaro ushbu jarayonda faol ishtirok etishi, adolat va shaffoflikni taʼminlashga hissa qoʻshishi zarurligi alohida taʼkidlandi.

Uchrashuv davomida tuman prokurorining yordamchisi Sanjar Abdullayev tadbir ishtirokchilariga korruptsiya bilan bogʻliq jinoyatlarni sodir etgan shaxslar uchun jazo muqarrar ekanligi, fuqarolar esa oʻz qonuniy huquq va manfaatlarini yaxshi bilishi zarurligi haqida atroflicha maʼlumot berdi. Shu bilan birga, u korruptsiyaga oid huquqbuzarliklar, manfaatlar toʻqnashuvi va poraxoʻrlik kabi illatlar haqida keng tushunchalar berdi hamda ularning jamiyat taraqqiyotiga yetkazadigan salbiy oqibatlari xususida toʻxtalib oʻtdi.

Uchrashuvda soʻzga chiqqan “Hoji eshon bobo” jomeʼ masjidi imom noibi Sherzod Oʻrazboyev islom dinida poraxoʻrlik va tamagirlik kabi holatlar ogʻir gunoh sifatida baholanishi, bunday jinoyatlarni sodir etgan shaxslar uchun shariatda qattiq hukmlar belgilab qoʻyilgani haqida toʻxtalib oʻtdi. Shuningdek, halollik, adolat va vijdonli boʻlish inson uchun eng ulugʻ fazilatlardan ekani alohida taʼkidlandi.

Tadbir yakunida 1-sonli oilaviy poliklinika mudiri Rustam Qidirboyev soʻzga chiqib, tibbiyot muassasasida shunday muhim va dolzarb mavzu yuzasidan oʻtkazilgan uchrashuv uchun tadbir tashkilotchilariga samimiy minnatdorlik bildirdi. Shuningdek, bu kabi targʻibot tadbirlarini muntazam oʻtkazish orqali tibbiyot xodimlarining huquqiy ongi va masʼuliyati oshishi, fuqarolarga yanada samarali xizmat koʻrsatishga intilish mustahkamlanishi taʼkidlandi.

Muxtasar aytganda, korruptsiyaga qarshi kurashish nafaqat davlat organlari, balki barcha fuqarolarning ham burchi va masʼuliyatidir. Bu kubi uchrashuvlar jamiyatda adolat, halollik va qonun ustuvorligini taʼminlashda muhim ahamiyatga ega. “Amudaryo televideniyesi”ning mazkur tashabbusi ana shunday ezgu maqsadlarga xizmat qilmoqda.

Shohzod Qurbonboyev, loyiha koordinatori.