ТЕМИР ЙЎЛ ТРАНСПОРТИ ХОДИМЛАРИ КУНИ МУНОСАБАТИ БИЛАН СОБИҚ ҲАМКАСБЛАР УЧРАШДИЛАР

Ўзбекистонда 2017 йилдан бери август ойининг биринчи якшанбаси Темир йўл транспорти ходимлари куни сифатида кенг нишонланади.

Айни пайтда мамлакатимизда замонавий инфратузилмага эга бўлган, аҳоли ва иқтисодиёт тармоқлари эҳтиёжларини тўлиқ таъминлай оладиган яхлит темир йўл тармоқлари етиб бормаган биронта ҳам ҳудуд йўқ ҳисоби. Амударё туманида ҳам 1968-1969 йилларда Жумуртов тоғ-кон ҳудудида темир йўл тармоғи қурилиб, Жумуртов станцияси ташкил этилган. Мазкур станция 1985 йилдан Урганч локомотив депоси таркибида, 2000 йилдан бошлаб эса Жумуртов станцияси Қўнғирот локомотив депоси таркибида фаолият олиб борди. 2008 йилда Жумуртов станцияси фаолияти тугатилиб, мазкур станцияда ишловчи ходимлар “Ўзбекистон темир йўллари” акциядорлик жамияти тасарруфидаги Қораўзак станциясида ўз меҳнат фаолиятларини давом эттиришди ва аксарият темир йўлчи ходимлар шу ердан нафақага чиқдилар.

Жорий йилнинг 3 август санасида Темир йўл транспорти ходимлари куни муносабати билан ўзларининг илк касбий фаолиятларини Жумуртов станциясида ишлашдан бошлаган, 1970 йилдан бошлаб турли йилларда ушбу соҳага кириб келган ва нафақага чиққунларига қадар темир йўл транспорти соҳасида машинист вазифасида ишлаган, айни пайтда кексалик гаштини сураётган собиқ ҳамкасблар учрашдилар.

Ўз ҳаётларининг асосий қисмини темир йўл транспорти соҳасига бағишлаган собиқ ҳамкасблар ўзлари ишлаган давр билан ҳозирги замон темир йўл транспорти соҳаси ўртасидаги кескин фарқ, соҳадаги янгиланишлар ва ўзгаришлар, юксак тараққиёт ҳақида мамнуният билан сўз юритдилар. Шу билан бирга ўзлари ишлаган давр билан боғлиқ хотираларини эсга олдилар.

Айтиш жоизки, Амударё устидан ўтувчи темир йўл ва автомобиль йўли қўшма кўпригининг фойдаланишга топширилиши халқимиз учун аср янгилиги бўлиши билан бирга ушбу қурилиш Қорақалпоғистон Республикаси ва Хоразм вилоятининг ҳар томонлама равнақ топишида жуда катта аҳамиятга эга йирик лойиҳа бўлди. 423 метр узунликдаги муҳташам кўприк билан бирга Хоразм вилоятининг Шовот ва Қорақалпоғистоннинг Қораўзак бекатларини боғловчи 85 километрлик темир йўл тармоғи, 3 та замонавий қулайликларга эга вокзал бинолари барпо этилиб, ушбу йўналиш бўйича темир йўл масофаси 180 километрга, юк ташиш тезлиги 6 соатга қисқаргани собиқ ҳамкасбларнинг ҳам эътирофига сазовор бўлди.

Айниқса, Жумуртов станциясининг 2025 йилдан бошлаб фаолияти қайта тиклангани Қораўзак конлари, Жумуртов тоғ-кон маҳсулотларини поездларда ташиш имкониятини яратиб, Оролбўйи минтақасидаги аҳоли ва минтақага ташриф буюрувчи туристларга хизмат кўрсатадиган автомобиль йўлларининг сифатли сақланишига замин яратади.

Халқимиз бекорга “йўл машаққатини йўлчи билади”, деган иборани яратмаган. Собиқ ҳамкасбларнинг деярли барчаси нафақага чиққунларига қадар машаққатли йўл азобини тортган фидойилар сифатида темир йўл транспорти соҳасининг бугунги ёш мутахассисларига муваффақиятлар тиладилар.

Байрамона учрашув давомида собиқ ҳамкасблар ушбу учрашувни ташкил этган ҳамкасблари Ўролбой Раҳимов ва Ўринбой Эшчановларга чин дилдан миннатдорчилик билдирдилар. Байрам баҳона, ўзлари фаолият олиб борган соҳага оид янгиликлар, ўзгаришлардан хабардор бўлган, файзли дастурхон атрофида касбий фаолиятлари давомидаги хотираларни ёдга олиб, самимий суҳбат қурган дўстлар давраси узоқ давом этди ва қалбларга жўшқин кайфият бағишлади.

РОБИЯ ЙЎЛДОШЕВА.