Инсонларнинг оғирини енгил, мушкулини осон қилиш ижтимоий хизмат ходимининг зиммасидаги масъулият

Ўзбекистон Республикаси Президентининг 2023 йил 1 июндаги “Аҳолига сифатли ижтимоий хизмат ва ёрдам кўрсатиш ҳамда унинг самарали назорат тизимини йўлга қўйиш бўйича комплекс чора-тадбирлар тўғрисида”ги Фармонига мувофиқ Ўзбекистон Республикаси Президенти ҳузурида Ижтимоий ҳимоя миллий агентлиги, шунингдек, унинг Қорақалпоғистон Республикаси, вилоятлар ва Тошкент шаҳар бошқармалари ҳамда туман ва шаҳарларда “Инсон” ижтимоий хизматлар марказлари ва ижтимоий ходимлар гуруҳлари ташкил этилиб, фаолият олиб бормоқда.

Мамлакатимизнинг барча ҳудудларида бўлгани каби Амударё туманининг Беш овул маҳалла фуқаролар йиғинида ҳам “Инсон” ижтимоий хизматлар марказининг маҳалладаги ижтимоий хизмат ходими томонидан самарали ишлар олиб борилмоқда. Айни пайтда маҳаллада 669 та хонадон таркибидаги оилаларда 3684 нафар аҳоли истиқомат қилади. Йил бошида ҳудуддаги барча хонадонларда истиқомат қилувчи аҳолининг турмуш тарзи, меҳнатга лаёқатлилиги, иқтисодий таъминланганлик даражаси пухта ўрганилиб, хатловдан ўтказилди. Хатлов натижаларига асосан кам таъминланган, ижтимоий ҳимояга муҳтож, ногиронлиги бор бўлган ҳамда якка-ёлғиз фуқаролар рўйхати шакллантирилиб, уларни ижтимоий қўллаб-қувватлаш чоралари кўрилди.

Ўзбекистон Республикаси Вазирлар Маҳкамасининг 2024 йил 25 январдаги “Алоҳида таълим эҳтиёжлари бўлган болаларнинг таълим олишларини ташкил этиш ва уларни реабилитация қилиш тизимини такомиллаштириш чора-тадбирлари тўғрисида”ги Қарори ижросини таъминлаш мақсадида алоҳида таълим олишга эҳтиёжманд бўлган 1 нафар боланинг уйда таълим олиши учун зарур шарт-шароитлар яратилиб, яна бир нафар болани психологик-тиббий-педагогик комиссия кўригига юбориш чоралари кўрилди.

Президентимизнинг 2024 йил 27 февралдаги “Муҳтож шахсларни протез-ортопедия мосламалари ва реабилитация қилишнинг техник воситалари билан таъминлаш тизимини такомиллаштириш чора-тадбирлари тўғрисида”ги Қарори ижросини таъминлашга қаратилган саъй-ҳаракатлар натижасида маҳаллада истиқомат қилувчи 78 нафар ногиронлиги бўлган шахслар алоҳида тизимга олиниб, улардан 1 нафарига POM, RTV русумидаги оёқ протези, 1 нафарига ногиронлик аравачаси берилди. Яна 1 нафар ногиронлиги бўлган фуқарога ногиронлик аравачасини олиб бериш чоралари кўрилмоқда. Бундан ташқари, 6 нафар ногиронлиги бўлган ва пенсия ёшидаги фуқароларнинг саломатликларини тиклашларига кўмаклашиш мақсадида уларни санаторий-профилакторийларга юбориш учун тегишли ташкилотларга аризалар тақдим этилди.

Аҳолининг ижтимоий ҳимояга муҳтож, ишсиз қатламини ҳамда ногиронлиги бўлган шахсларнинг оила аъзоларини, айнан шундай тоифадаги болаларнинг ота-оналарининг иш билан бандлигини таъминлаш мақсадида ногиронлиги бўлган болаларнинг ота-оналаридан 4 нафарига 80 ёшга тўлган кексаларга ва 1-гуруҳ ногиронлиги бўлган болага қараб туриш бўйича бандлигини таъминлаш мақсадида ҳақиқий ҳолатлар жойига чиққан ҳолда ўрганилиб, далолатномалар расмийлаштирилди.

Ўзбекистон Республикаси Вазирлар Маҳкамасининг 2021 йил 21 октябрдаги 654-сонли ва унга қўшимча 2023 йил 10 ноябрдаги 596-сонли Қарорлари ижросини таъминлашга қаратилган чора-тадбирлар режасига кўра, 91 та ижтимоий ҳимояга муҳтож оилага болалар нафақаси тайинланди. Шунингдек, 4 та оила кам таъминланган деб эътироф этилиб, ижтимоий нафақа ва моддий ёрдам тўлаш жорий этилди. Яна 4 та оилага эса боқувчисини йўқотганлик нафақаси тўланиб келинмоқда. Айни пайтда маҳалладаги 107 та оиланинг моддий аҳволи баҳоланди ва улардан 55 таси камбағаллик реестрига киритилиб, мазкур оилаларни камбағалликдан чиқариш бўйича индивидуал режалар ишлаб чиқилди. Бундан ташқари, болалар нафақаси ва ижтимоий ёрдам олувчи, камбағаллик реестрига киритилган оилаларнинг қиш мавсумида табиий газ ва электр энергияси учун қиш мавсумида компенсация тўловини жорий этиш режалаштирилган. Ҳудудимиздаги 2 нафар якка-ёлғиз фуқарога ҳам алоҳида эътибор қаратилиб, “Инсон” ижтимоий хизматлар марказининг ижтимоий хизмат ходими ассистенти томонидан зарур хизматлар кўрсатилиб келинмоқда. Шунингдек, тазйиқ ва зўравонликка учраган 1 нафар аёл ижтимоий хизматлар маркази психологи томонидан тиббий-маърифий-психологик тренинг ўтказилиб, 3 нафар шахсга кейс-менежмент усулини қўллаган ҳолда уларнинг муаммоларини индивидуал тарзда ўрганиш орқали бартараф этиш чоралари кўрилмоқда.

Амалга оширилаётган барча саъй-ҳаракатларимиз моҳиятан ҳар бир инсоннинг ҳаётдан рози яшашини таъминлаш ва муаммоларини тизимли равишда бартараф этиш орқали уларнинг ижтимоийлашувига кўмаклашишга қаратилгани билан ҳамиша долзарб ва муҳим ҳисобланади. Бевосита халқ орасида юриб, улар билан самимий, дилдан мулоқотлар қилиш орқали оғирини енгил, мушкулини осон қилиш эса ижтимоий хизмат ходимининг зиммасидаги масъулиятли вазифасидир.

Жаҳонгир Йўлдошев, Бешовул МФЙ ижтимоий ходими.