Кам таъминланган, ўзгалар парваришига муҳтож, ногиронлиги бўлган фуқароларга комплекс ижтимоий хизматлар кўрсатилмоқда

Манғит шаҳридаги Бой овул маҳалласида 605 та хонадон таркибидаги 917 та оилада 4 минг 117 нафар аҳоли истиқомат қилади. “Маҳалла еттилиги” билан Амударё тумани “Инсон” ижтимоий хизматлар бўлимининг маҳалладаги комплекс хизмат кўрсатувчи ижтимоий ходими ҳамкорлигида уйма-уй кириб бориб ўтказилган хатлов натижаларига кўра, 312 та оила кам таъминланган, ижтимоий ҳимояга муҳтож оилалар рўйхатига киритилди. Мазкур оилаларнинг турмуш шароитлари, иқтисодий таъминланганлик даражаси ўрганилиб, уларга режавий жадвал асосида зарур ижтимоий хизматлар кўрсатиш чоралари кўрилди.

“Инсон” ижтимоий хизматлар маркази ва унинг ҳудудий бўлимлари ташкил этилиб, кам таъминланган, ўзгалар парваришига, ёрдамига муҳтож, ногиронлиги бўлган фуқароларни ҳар томонлама қўллаб-қувватлаш бўйича хизматларнинг янги тизими йўлга қўйилгани маҳалладаги комплекс ижтимоий хизмат кўрсатиш ходими Ирода Султонованинг ўз фаолиятини самарали олиб боришида ижобий самара бермоқда.

Бой овул маҳалласида ҳам уйма-уй юриб хатлов ўтказилганда аниқланган, оғир аҳволга тушиб қолган ва шундай ҳолатга тушиш эҳтимоли юқори бўлган 16 та оила кейс менежмент асосида баҳоланди. Уларнинг барчасига белгиланган режавий жадвал асосида ижтимоий хизматлар кўрсатилди ҳамда зарур ёрдамлар берилиб, ижтимоийлашувига кўмаклашилди. Ўзгалар парваришига муҳтож бўлган бир нафар ёлғиз яшовчи кекса фуқаро аниқланиб, унинг ижтимоийлашувини таъминлаш мақсадида уйида маиший-ижтимоий хизмат кўрсатувчи ижтимоий ходим ассистенти бириктирилди.

Маҳаллада “Камбағалликдан фаровонлик сари” дастурини амалга ошириш бўйича ҳам самарали ишлар амалга оширилмоқда. Хусусан, уйма-уй кириб ўрганишлар ва “Камбағаллик реестри” сўровномасини ўтказиш натижасида камбағалликка тушиб қолиш эҳтимоли бўлган 151 хонадон аниқланди. Шундан 74 та оила “Камбағаллик реестри”га киритилди ҳамда индивидуал хизмат кўрсатиш бўйича режалар тузилиб, барча хизматлар режа асосида амалга оширилмоқда.

Мазкур реестрга киритилган камбағал оилалар аъзоларининг дунёқарашини шакллантириш, молиявий саводхонлигини ошириш мақсадида “Инсон” ижтимоий хизматлар маркази психологлари томонидан мунтазам равишда когнитив терапия тренинг машғулотлари ўтказилмоқда.

Шунингдек, ногиронлиги бўлган ёки ёши катта, ўзгалар парваришига муҳтож аъзоси бўлган “Камбағаллик реестри”даги оилаларнинг меҳнатга лаёқатли аъзолари бандлигини таъминлаш мақсадида “Фаол ҳаётга қадам” дастури йўлга қўйилди. Унга кўра, уй шароитида қараб туриш хизмати, тиббий-ижтимоий реабилитация хизмати, кундузги қатнов асосида қараб туриш, шахсий ёрдамчи хизматлари жорий этилди. “Камбағаллик реестри” рўйхатида турувчи 2 та оилага ижтимоий ходим ассистенти бириктирилди ва айни пайтда уларга уйида маиший-ижтимоий хизмат кўрсатилиб келинмоқда.

Ҳозирги кунда долзарб масалалардан бири бўлган зўравонликка учраган хотин-қизлар ва уларнинг вояга етмаган фарзандларининг тинчлиги, осойишталигини таъминлашга ҳам алоҳида эътибор қаратилмоқда. Уйма-уй кириб бориб, аниқланган ана шундай оилаларга “Инсон” ижтимоий хизмат кўрсатиш марказининг туман бўлими ҳуқуқшуноси ва психологлари бириктирилиб, зарур хизмат ва ёрдамлар кўрсатилмоқда.

Шунингдек, ногиронлиги бўлган шахсларнинг саломатлиги ва яшаш шароитини яхшилаш мақсадида реабилитация қилишнинг техник воситаларига муҳтожлиги юзасидан сўровномалар ҳам ўтказилди. Сўровнома жараёнида аниқланган ана шу тоифадаги фуқаролар ваучер асосида 2 та хонага мўлжалланган ўриндиқли аравача, 3 та ҳасса, 3 та тирсакли қўлтиқтаёқ, 3 та сайр қилишга мўлжалланган ўриндиқли аравача, 2 та рақамли эшитиш мосламаси, 2 жуфт қўлтиқтаёқ, 2 та кўзи ожизлар ҳассаси билан таъминланди.

Таъкидлаш жоизки, Президентимиз ташаббуси ва Фармонлари билан кам таъминланган фуқароларни ижтимоий ҳимоялаш маҳалла даражасида ташкил этилиб, ижтимоий хизматлар сифати тобора ошиб бораётгани кўплаб оилаларга нур, фаровонлик ва хотиржамлик олиб кирди. Катта умид билан маҳалла остонасига қадам қўйган инсонларнинг оғири енгил, мушкуллари осон бўлаётгани боис, уларнинг ҳаётдан рози бўлиб, завқ олиб яшашлари учун имкон яратилди, келажакка ишончи ошди. Зеро, ишонч туйғуси – жамики эзгу ишларга қанотдир.

Робия ЙЎЛДОШЕВА