Коррупцияга қарши курашишда нодавлат нотижорат ташкилотлари фаоллиги ошмоқда
Бугунги кунда Ўзбекистон тараққиётнинг янги босқичига қадам қўяр экан, мамлакатда амалга оширилаётган кенг кўламли ислоҳотларнинг муваффақиятини таъминлашда коррупцияга қарши муросасиз кураш муҳим аҳамият касб этмоқда. Коррупция иллатининг ҳар қандай кўриниши нафақат жамият ривожига, балки давлатнинг халқаро нуфузига ҳам салбий таъсир кўрсатишини инобатга олган ҳолда, унга қарши курашда давлат органлари билан бир қаторда фуқаролик жамияти институтлари, хусусан, нодавлат нотижорат ташкилотларининг фаол иштирокини таъминлашга алоҳида эътибор қаратилмоқда.
Буб орадаги ишларни янада жадаллаштириш мақсадида Қорақалпоғистон Республикаси Жўқорғи Кенгесининг Суд-ҳуқуқ масалалари ва коррупцияга қарши курашиш қўмитаси раиси томонидан тасдиқланган “Йўл-харитаси”да коррупцияга қарши курашда фаоллик кўрсатаётган нодавлат нотижорат ташкилотларини ўртасида танлов ташкил этиш ва ғолибларни маҳаллий бюджет ҳисобидан рағбатлантириш вазифаси кўзда тутилган эди.
Мазкур вазифалар ижросини таъминлаш доирасида жорий йилнинг 21 август куни Ўзбекистон нодавлат нотижорат ташкилотлари Миллий Ассоциациясининг Қорақалпоғистон Республикаси ҳудудий бўлинмаси ташаббуси билан Қорақалпоғистон Республикаси Жўқорғи Кенгеси, Прокуратураси ва Адлия вазирлиги ҳамкорлигида онлайн тест танлови ташкил этилди. Бердақ номидаги Қорақалпоқ давлат университетида “Коррупцияга қарши курашда фаол нодавлат нотижорат ташкилотлари – адолатли жамият пойдевори" мавзусида ташкил қилинган танловнинг асосий мақсади учинчи сектор вакилларининг коррупцияга қарши курашиш соҳасидаги билимларини синовдан ўтказиш, уларнинг бу борадаги фаоллигини ошириш ва илғор тажрибаларни оммалаштиришдан иборат.
Танлов якунларига кўра, ўзларининг профессионал фаолияти, жамоатчиликни жалб қилишдаги самарадорлиги ва коррупцияга қарши тадбирлардаги фаол иштироки билан ажралиб турган 5 та нодавлат нотижорат ташкилоти ғолиб деб топилди. Уларнинг ҳар бири 1 млн сўмдан, жами 5 млн сўм миқдоридаги пул мукофоти билан тақдирланди. Бундан ташқари, Коррупцияга қарши курашиш ҳудудий кенгашининг иш-режаси доирасида жамоатчилик назорати тадбирларида юқори фаоллик кўрсатган яна 5 та нодавлат нотижорат ташкилотлари вакиллари ҳам эътироф этилиб, уларнинг ҳам ҳар бирига 1 млн сўмдан, жами 5 млн сўм пул мукофотларининг сертификатлари. Бу каби рағбатлантириш чоралари нодавлат нотижорат ташкилотларининг келгусидаги фаолияти учун муҳим туртки бўлиши шубҳасиз.
Жамоатчилик назоратини олиб боришда нодавлат нотижорат ташкилотларининг ролини янада кучайтириш, жойларда коррупция ҳолатларини комплекс ўрганиш ва юзага келаётган муаммоларни бартараф этиш бўйича асослантирилган таклифлар ишлаб чиқиш бугунги куннинг долзарб вазифасидир.
Нодавлат нотижорат ташкилотлари томонидан тақдим этилган таклифлар келгусида қонун лойиҳаларини тайёрлашда, ҳукумат қарорлари ва дастурларини ишлаб чиқишда муҳим манба бўлиб хизмат қилади. Қорақалпоғистондаги ушбу ташаббус коррупцияга қарши курашда давлат ва фуқаролик жамияти ҳамкорлигининг ёрқин намунаси бўлди.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
