Амударё туманида чанг бўронларга қарши курашиш штаби йиғилиши ўтказилди
Атмосфера ҳавоси сифатини яхшилаш, ҳудудларнинг экологик барқарорлигини таъминлаш ва чанг бўронларининг салбий таъсирини камайтириш бугунги кунда алоҳида эътибордаги йўналиш бўлиб, бу борада қабул қилинган норматив ҳужжатлар ижросини таъминлаш маҳаллий идоралар зиммасига катта масъулият юклайди. Чунки экологик вазиятни барқарорлаштириш бўйича белгиланган чора-тадбирлар фақат қабул қилинган ҳужжатлар билан чекланмайди, балки ҳар бир туман ва маҳалла миқёсида амалий ҳаракатларни талаб этади.
Орол денгизи қуриши оқибатида Қорақалпоғистон ҳудудида чанг-туз кўчишининг кучайгани, иқлим ўзгаришининг таъсири сезилаётгани ҳамда аҳоли саломатлигини муҳофаза қилиш заруратини инобатга олган ҳолда, ушбу масала юзасидан тизимли, узлуксиз ва идоралараро ҳамкорликка асосланган иш усули йўлга қўйилган. Бунда белгиланган вазифаларнинг самарадорлиги мутасадди ташкилотларнинг ўзаро мувофиқлаштирилган фаолиятига, шунингдек аҳолининг фаол иштирокига бевосита боғлиқ экани эътиборга олинмоқда.
Хусусан, Амударё тумани прокуратураси томонидан Ўзбекистон Республикаси Президентининг 2024 йил 25 сентябрдаги “Чанг бўронларга қарши курашиш ва атмосфера ҳавоси сифатини яхшилаш бўйича биринчи навбатдаги чора-тадбирлар тўғрисида”ги Қарори ижроси юзасидан тузилган штабнинг эрталабки йиғилиши бўлиб ўтди ва йиғилишда тегишли ташкилотларга аниқ топшириқлар берилди.
Мазкур тадбирда туман ободонлаштириш бошқармаси, “Тоза ҳудуд” корхонаси, шунингдек бошқа мутасадди идоралар вакиллари иштирок этди. Муҳокама давомида соҳадаги мавжуд вазият кўриб чиқилиб, яқин кунлар учун белгиланган вазифалар доираси аниқлаштирилди.
Йиғилишда мутасаддиларга ҳудудларни ободонлаштириш, чиқиндиларни ўз вақтида олиб чиқиш, аҳоли яшаш жойларида тозаликни сақлаш ҳамда экологик маданиятни ошириш масалаларига алоҳида эътибор қаратишлари топширилди. Шу билан бирга, масъулларга белгиланган вазифаларни сифатли ва ўз вақтида бажариш юзасидан қатъий кўрсатмалар берилди.
Бундан ташқари, туманнинг Навоий маҳалласи ҳудудида йиғилиб қолган маиший чиқиндилар мутасадди ташкилотлар томонидан олиб чиқиб кетилди. “Дўстлик” маҳалласи ҳудудида эса дарахтларни оқлаш ишлари амалга оширилди. Бу каби амалий ишлар штаб йиғилишларида берилган топшириқларнинг натижаси сифатида кундалик тартибда давом эттирилмоқда.
Қайд этиш жоизки, чанг бўронларининг таъсирини юмшатиш фақат мавсумий тадбирлар билан эмас, балки ҳар кунлик изчил меҳнат, ободонлаштириш ва кўкаламзорлаштириш ишларининг узлуксизлиги орқали таъминланади. Шунингдек, бундай йиғилишларнинг мунтазам ўтказилиши мавжуд муаммоларни ўз вақтида аниқлаш имконини беради. Шу маънода штаб йиғилишларида берилган топшириқларнинг амалдаги натижаси ҳудуд ҳавоси софлиги ва аҳоли турмуш муҳитининг сифатида кўринади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
