Қишлоқ хўжалиги ривожи – барқарор келажак гарови

Қишлоқ хўжалиги мамлакатимиз иқтисодиётининг таянч тармоқларидан бири ҳисобланади. Бугунги кунда аграр соҳада самарадорликни ошириш, илғор тажрибаларни кенг жорий этиш, ҳосилдорликни кўпайтириш ва энг асосийси, халқимиз дастурхонини тўкин қилиш йўлида қилинаётган ишларнинг аҳамияти беқиёс. Шу мақсадда жойларда мунтазам равишда ўтказилаётган семинар ва амалий учрашувлар фермерлар, мутахассислар ва масъуллар учун катта мактаб бўлиб хизмат қилмоқда.

Бу борадаги ишларни янада жадаллаштириш, илғор тажрибаларни янада оммалаштириш мақсадида 24 август куни Амударё туманида ҳам қатор семинарлар ташкил этилди. Семинарларда Қорақалпоғистон Республикаси Вазирлар Кенгаши Раисининг қишлоқ ва сув хўжалиги масалалари бўйича ўринбосари Шуҳрат Тешаев, туман ҳокими Собир Хўжаметов, ҳоким ўринбосарлари, соҳага масъул ташкилотлар раҳбарлари, мутахассислар ва фермер хўжаликлари эгалари фаол иштирок этдилар.

Дастлабки семинар Қангли овули ҳудудидаги “Мангитова Азиза” фермер хўжалигида ўтказилди. Тадбирда 2026 йил ҳосили учун ғалла экиш масалалари атрофлича муҳокама қилинди.

Семинарда Қорақалпоғистон Республикаси Вазирлар Кенгаши Раисининг қишлоқ ва сув хўжалиги масалалари бўйича ўринбосари Шуҳрат Тешаев сўзга чиқиб, ғалла экиш жараёнида қўлланилиши лозим бўлган илғор тажрибалар, самарали агротехник тадбирлар ҳамда фермерлар олдида турган устувор вазифалар юзасидан батафсил тўхталиб ўтди.

Шунингдек, фермерлар ўз тажрибалари билан ўртоқлашиб, янги экин услублари, ҳосилдорликни ошириш ва ер унумдорлигини яхшилаш йўллари юзасидан фикр-мулоҳаза юритдилар.

Кейинги семинар Қипчоқ пахта қабул қилиш масканида давом этди. Унда яқинлашиб келаётган пахта йиғим-терими мавсумига тайёргарлик ҳолати ўрганилди. Йиғилганлар барча техникаларнинг мавсумга тўлиқ шайлиги, комбайн ва агрегатларнинг ишчи ҳолатга келтирилгани билан яқиндан танишдилар. Бу йилги пахта йиғим-теримини ўз вақтида ва сифатли якунлаш учун барча зарур шароитлар яратилганини семинар иштирокчилари амалда кўрдилар.

Тадбирда сўзга чиққанлар таъкидлаганидек, пахта йиғим-терими қишлоқ хўжалиги соҳасидаги йилнинг энг масъулиятли даври бири саналади. Ҳосилни ўз вақтида, сифатли ва беталафот йиғиб олишда тайёргарлик жараёнлари, айниқса, техникаларни тўлиқ ишчи ҳолатга келтириш ниҳоятда муҳим аҳамият касб этади. Чунки пахта йиғим-теримида ҳар бир дақиқа, ҳар бир техника унумли ишлаши ҳосилнинг тақдирини белгилайди.

Шуларни инобатга олган ҳолда туманда мавсумга жиддий тайёргарлик кўрилиб, барча мавжуд комбайнлар, тракторлар ва бошқа ёрдамчи агрегатлар тўлиқ кўздан кечирилди, зарур эҳтиёт қисмлар алмаштирилди ҳамда механик жиҳатдан шай ҳолатга келтирилди. Бу эса келгуси мавсумни беталофат ўтказиш, ҳосилни қисқа фурсатда йиғиштириб олиш имконини беради.

Шуни таъкидлаш жоизки, техника воситаларининг шайлиги нафақат ҳосилни йўқотишсиз йиғиб олишга, балки меҳнат унумдорлигини ошириш, харажатларни камайтириш ва якунда пахта сифатини юқори даражада сақлаб қолишга хизмат қилади. Айниқса, механизация даражаси юқори бўлган ҳудудларда терим жараёнлари анча енгил, самарали ва тежамкор кечади.

Семинарларнинг кейинги манзили Чойкўл овули ҳудудидаги “Жайхун Чойкўл” фермер хўжалиги бўлди. Бу ерда 2025 йил ҳосили учун экилган пахта майдонларида дефолиация қилиш ишларига алоҳида эътибор қаратилди. Пахта баргини тўкиш орқали ҳосилни тез пишириш ва сифатли йиғиб олиш, терим жараёнида меҳнат самарадорлигини оширишда дефолиациянинг аҳамияти алоҳида қайд этилди.

Ўтказилган учрашувлар жараёнида фермерлар ва мутахассислар ўзаро тажриба алмашдилар, янгича ёндашувлар бўйича маслаҳатлар бердилар. Энг муҳими, бундай семинарлар соҳага оид муаммоларни жойида ўрганиш ва тезкор ҳал қилиш имконини беради. Бу эса, албатта, қишлоқ хўжалиги ривожида самарадорликни оширишга хизмат қилади.

Бугун юртимизда қишлоқ хўжалиги соҳаси олдига қўйилган мақсадлар улкан. Ҳосилдорликни ошириш, замонавий агротехнологияларни жорий этиш, экологик тоза маҳсулот етиштириш, экспорт салоҳиятини кучайтириш – буларнинг барчаси халқимиз фаровон ҳаёт кечириши учун мустаҳкам замин яратади. Ўтказилган семинарлар эса бу мақсадларга эришишда муҳим восита бўлиб хизмат қилиши шубҳасиз.

Чарос Арслонова, туман ҳокимлигининг Ахборот хизмати раҳбари.