"ҚИШЛОҚ ЖОЙЛАРНИ БАРҚАРОР РИВОЖЛАНТИРИШ" ЛОЙИҲАСИ ДОИРАСИДА ЯНГИ БОҒЧА БИНОСИ ФОЙДАЛАНИШГА ТОПШИРИЛДИ
Сўнгги йилларда мамлакатимизда қишлоқлардаги аҳоли пунктларининг меъморий қиёфасини тубдан янгилаш, ҳудудларни комплекс ривожлантириш, йўл-транспорт инфратузилмаси, муҳандислик-коммуникация тармоқлари ва ижтимоий соҳа объектларини барпо этиш орқали аҳолига қулай турмуш шароитини яратишга катта эътибор қаратилмоқда. Бу борада 2021 йил 18 сентябрь санасида “Ислом тараққиёт банки ва ОПЕК халқаро тараққиёт жамғармаси иштирокида “Қишлоқ жойларни барқарор ривожлантириш” лойиҳасини амалга ошириш чора-тадбирлари тўғрисида”ги Президент қарори қабул қилиниб, “Қишлоқ жойларни барқарор ривожлантириш” лойиҳаси амалиётга жорий этилган эди. Унга кўра, мазкур лойиҳани Қорақалпоғистон Республикаси, Бухоро, Навоий, Хоразм вилоятларида жами 20 та тумандаги 170 та маҳаллаларда амалга ошириш ишлари изчиллик билан олиб борилмоқда.
Амударё туманида ҳам Президент қарори ижросини таъминлаш, лойиҳа доирасидаги қурилиш-таъмирлаш ишларини сифатли олиб бориш ва объектларни ўз вақтида фойдаланишга топшириш бўйича тизимли ишлар амалга оширилмоқда. Айни пайтда ҳудудларда “Қишлоқ жойларни барқарор ривожлантириш” лойиҳаси доирасида янгидан бунёд этилган ва реконструкция қилинган бино ва иншоотлар фойдаланишга топширилмоқда. Лойиҳа асосида қисқа муддат ичида Манғит шаҳрининг Олмазор маҳалласи ҳудудида ҳам 120 ўринли давлат мактабгача таълим ташкилоти биноси қурилиб, фойдаланишга топширилди.
Муассасанинг очилиш маросимида Амударё туман ҳокимининг ўринбосари Нодирбек Камолов иштирок этиб, мамлакатимизда мактабгача таълим тизимида амалга оширилаётган кенг кўламли ислоҳотлар, аҳолининг турмуш фаровонлигини оширишга қаратилган чора-тадбирлар хусусида батафсил сўз юритди ва Олмазор маҳалласи аҳолисини, айниқса, ёш ота-оналарни фарзандлари таълим-тарбияси учун яратилаётган шарт-шароитлар, барча қулайликларга эга муассаса биносининг фойдаланишга топширилиши муносабати билан табриклади.
Шунингдек, тадбирда сўзга чиққан Олмазор маҳалласи фаоллари ва ота-оналар давлатимизнинг ёш авлод таълим-тарбияси йўлидаги ғамхўрликлари учун миннатдорлик билдиришди ҳамда мазкур муассаса биносини бунёд этган “Замин қурилиш-транс сервис” масъулияти чекланган жамияти қурувчи-бунёдкорларига чин дилдан раҳматлар айтишди.
Шундан сўнг, қурувчи ташкилот масъуллари томонидан муассаса биносининг рамзий калити муассаса раҳбариятига топширилди ва маҳалла фаоллари ҳамда ота-оналар бино ичкарисига кириб, болажонлар учун яратилган шарт-шароитлар, боғча ҳовлисида амалга оширилган ободонлаштириш ишлари, болалар ўйин майдончаларининг жиҳозланиши билан танишдилар.
Замон талаблари даражасида жиҳозланган муассаса биносининг кўркам меъморий қиёфаси барчага манзур бўлди ва шу куннинг ўзида муассасага илк тарбияланувчилар қабул қилиниб, ўз фаолиятини бошлади.
“Қишлоқ жойларни барқарор ривожлантириш” лойиҳасини амалга ошириш орқали ҳудудларни комплекс ривожлантириш, уларда йўл-транспорт инфратузилмаси, муҳандислик-коммуникация тармоқлари ва ижтимоий соҳа объектларини барпо этиш ва аҳоли турмуш маданиятини юксалтириш мақсадида қилинаётган барча эзгу ишлар халқимизнинг келажакка ва давлатга ишончини янада мустаҳкамламоқда.
РОБИЯ ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
