Бўзатовда ногиронлиги бўлган болалар учун "Кундузги парвариш" хизмати иш бошлади

Ўзбекистон Республикаси Президентининг шу йил 5 февралдаги “Ногиронлиги бўлган болаларга ижтимоий хизмат ва ёрдам кўрсатиш тизимини янада такомиллаштириш бўйича қўшимча чора-тадбирлар тўғрисида”ги Қарорига асосан 2025 йил 1 мартдан бошлаб 1 октябрга қадар республиканинг барча ҳудудларида 3 ёшдан 18 ёшгача ногиронлиги бўлган болалар учун давлат-хусусий шериклик асосида кундузги парвариш хизмати йўлга қўйилди.

Қарорнинг асосий мақсади – аҳолининг энг заиф қатламининг ҳаёт сифатини ошириш, уларни ижтимоий ҳаётга фаол жалб этиш ва оилаларга кўрсатиладиган ижтимоий кўмак ҳажмини кенгайтиришдир.

Ўзбекистондаги ижтимоий ҳимоя сиёсатининг амалдаги ифодаси сифатида мазкур қарор асосида Бўзатов туманида ҳам "Кундузги парвариш" хизмати йўлга қўйилди. Хизмат тумандаги якка тартибдаги тадбиркор Коммуна Пирназаровага қарашли мактабгача таълим ташкилоти базасида ташкил этилди. Бу эса хусусий секторнинг ҳам ижтимоий лойиҳаларга фаол жалб этилаётганини кўрсатувчи ибратли амалиётдир.

"Кундузги парвариш" хизматининг очилиш маросимида Президент ҳузуридаги Ижтимоий ҳимоя миллий агентлигининг Қорақалпоғистон Республикаси бошқармаси масъуллари, туман мутасаддилари ва аҳоли вакиллари иштирок этиб, Президентимиз ташаббуси билан ҳаётга татбиқ этилаётган бу тизим ногиронлиги бўлган болаларни парваришлаётган оилаларнинг турмуш тарзини тубдан яхшилашга қаратилган тизимли ёндашувнинг узвий қисми эканини алоҳида мамнуният билан таъкидладилар.

Айтиш жоизки, гуруҳга қабул қилинадиган ҳар бир бола Ижтимоий ҳимоя миллий агентлигининг Қорақалпоғистон Республикаси бошқармаси қошида тузилган Психологик-тиббий-педагогик комиссия томонидан чуқур текширувдан ўтказилади. Бу жараён ҳар бир боланинг индивидуал эҳтиёжларини аниқлаш ва унга мос индивидуал ривожлантирувчи дастур тузиш учун хизмат қилади.

Жойларда ташкил қилинаётган бу каби муассасаларда болалар малакали мутахассислар – логопед, дефектолог, психолог ва тарбиячилар кўмагида нафақат парвариш қилинади, балки улар иштирокида тизимли коррекцион-ривожлантирувчи машғулотлар ўтказилади.

Ушбу хизматнинг йўлга қўйилиши бир нечта стратегик мақсадларга хизмат қилади. Улардан энг муҳими – "Камбағалликдан фаровонлик сари" дастури ижросини таъминлаш орқали оилаларнинг иқтисодий имкониятларини кенгайтиришдир. Сабаби, ногиронлиги бўлган фарзандини парваришлаш учун, кўп ҳолларда ота-оналардан бири меҳнат фаолиятидан узилиб қолишга мажбур бўлади. "Кундузги парвариш" хизматининг ташкил этилиши, айнан шу ота-оналарга кундузги вақтда меҳнат фаолияти билан шуғулланиш, даромад топиш ва оилавий бюджетни мустаҳкамлаш учун реал имконият яратади. Бу ўз навбатида оиланинг ижтимоий ҳимояга муҳтожлигини камайтириб, уларни мустақил фаровонликка эришишга ундайди.

Бундан ташқари, хизматнинг яна бир улкан ижтимоий аҳамияти – ногиронлиги бўлган болаларни жамиятга интеграция қилишдир. Боланинг куннинг маълум қисмини махсус дастурлар асосида ривожлантирувчи марказда ўтказиб, кечки пайт оиласи бағрига қайтиши – унинг руҳий ва психологик ҳолати учун ғоят муҳимдир.

"Кундузги парвариш" хизмати – бу шунчаки вақтинчалик парвариш эмас, балки ногиронлиги бўлган болаларни ижтимоий мослаштириш, ўқитиш ва соғломлаштиришга қаратилган янги тизим асосидаги комплекс ёндашувдир. Бу тизим болаларнинг ёши ва ривожланиш хусусиятларига қараб ўқув-тарбия жараёнини ташкил этишни, уларнинг тенгдошлари билан мулоқот қилиши учун шароит яратишни назарда тутади.

Ушбу ташаббус Бўзатов туманидаги кўплаб оилаларга енгиллик олиб келиб, ижтимоий адолат ва инсон қадри тамойилларини янада мустаҳкамлашга хизмат қилади.