Boʻzatovda nogironligi boʻlgan bolalar uchun "Kunduzgi parvarish" xizmati ish boshladi

Oʻzbekiston Respublikasi Prezidentining shu yil 5-fevraldagi “Nogironligi boʻlgan bolalarga ijtimoiy xizmat va yordam koʻrsatish tizimini yanada takomillashtirish boʻyicha qoʻshimcha chora-tadbirlar toʻgʻrisida”gi Qaroriga asosan 2025-yil 1-martdan boshlab 1-oktyabrga qadar respublikaning barcha hududlarida 3 yoshdan 18 yoshgacha nogironligi boʻlgan bolalar uchun davlat-xususiy sheriklik asosida kunduzgi parvarish xizmati yoʻlga qoʻyildi.

Qarorning asosiy maqsadi – aholining eng zaif qatlamining hayot sifatini oshirish, ularni ijtimoiy hayotga faol jalb etish va oilalarga koʻrsatiladigan ijtimoiy koʻmak hajmini kengaytirishdir.

Oʻzbekistondagi ijtimoiy himoya siyosatining amaldagi ifodasi sifatida mazkur qaror asosida Boʻzatov tumanida ham "Kunduzgi parvarish" xizmati yoʻlga qoʻyildi. Xizmat tumandagi yakka tartibdagi tadbirkor Kommuna Pirnazarovaga qarashli maktabgacha taʼlim tashkiloti bazasida tashkil etildi. Bu esa xususiy sektorning ham ijtimoiy loyihalarga faol jalb etilayotganini koʻrsatuvchi ibratli amaliyotdir.

"Kunduzgi parvarish" xizmatining ochilish marosimida Prezident huzuridagi Ijtimoiy himoya milliy agentligining Qoraqalpogʻiston Respublikasi boshqarmasi masʼullari, tuman mutasaddilari va aholi vakillari ishtirok etib, Prezidentimiz tashabbusi bilan hayotga tatbiq etilayotgan bu tizim nogironligi boʻlgan bolalarni parvarishlayotgan oilalarning turmush tarzini tubdan yaxshilashga qaratilgan tizimli yondashuvning uzviy qismi ekanini alohida mamnuniyat bilan taʼkidladilar.

Aytish joizki, guruhga qabul qilinadigan har bir bola Ijtimoiy himoya milliy agentligining Qoraqalpogʻiston Respublikasi boshqarmasi qoshida tuzilgan Psixologik-tibbiy-pedagogik komissiya tomonidan chuqur tekshiruvdan oʻtkaziladi. Bu jarayon har bir bolaning individual ehtiyojlarini aniqlash va unga mos individual rivojlantiruvchi dastur tuzish uchun xizmat qiladi.

Joylarda tashkil qilinayotgan bu kabi muassasalarda bolalar malakali mutaxassislar – logoped, defektolog, psixolog va tarbiyachilar koʻmagida nafaqat parvarish qilinadi, balki ular ishtirokida tizimli korrektsion-rivojlantiruvchi mashgʻulotlar oʻtkaziladi.

Ushbu xizmatning yoʻlga qoʻyilishi bir nechta strategik maqsadlarga xizmat qiladi. Ulardan eng muhimi – "Kambagʻallikdan farovonlik sari" dasturi ijrosini taʼminlash orqali oilalarning iqtisodiy imkoniyatlarini kengaytirishdir. Sababi, nogironligi boʻlgan farzandini parvarishlash uchun, koʻp hollarda ota-onalardan biri mehnat faoliyatidan uzilib qolishga majbur boʻladi. "Kunduzgi parvarish" xizmatining tashkil etilishi, aynan shu ota-onalarga kunduzgi vaqtda mehnat faoliyati bilan shugʻullanish, daromad topish va oilaviy byudjetni mustahkamlash uchun real imkoniyat yaratadi. Bu oʻz navbatida oilaning ijtimoiy himoyaga muhtojligini kamaytirib, ularni mustaqil farovonlikka erishishga undaydi.

Bundan tashqari, xizmatning yana bir ulkan ijtimoiy ahamiyati – nogironligi boʻlgan bolalarni jamiyatga integratsiya qilishdir. Bolaning kunning maʼlum qismini maxsus dasturlar asosida rivojlantiruvchi markazda oʻtkazib, kechki payt oilasi bagʻriga qaytishi – uning ruhiy va psixologik holati uchun gʻoyat muhimdir.

"Kunduzgi parvarish" xizmati – bu shunchaki vaqtinchalik parvarish emas, balki nogironligi boʻlgan bolalarni ijtimoiy moslashtirish, oʻqitish va sogʻlomlashtirishga qaratilgan yangi tizim asosidagi kompleks yondashuvdir. Bu tizim bolalarning yoshi va rivojlanish xususiyatlariga qarab oʻquv-tarbiya jarayonini tashkil etishni, ularning tengdoshlari bilan muloqot qilishi uchun sharoit yaratishni nazarda tutadi.

Ushbu tashabbus Boʻzatov tumanidagi koʻplab oilalarga yengillik olib kelib, ijtimoiy adolat va inson qadri tamoyillarini yanada mustahkamlashga xizmat qiladi.