ГРАНТ ЛОЙИҲАСИ ДОИРАСИДА ТАРҒИБОТ МАТЕРИАЛЛАРИ ТАРҚАТИЛДИ
Коррупция ўз-ўзидан пайдо бўлмайди, бу иллат қайси соҳада илдиз отишидан қатъий назар, албатта инсон омили иштирокида содир бўлади. Хусусан, иқтисодий фаолиятга ўрнатилган турли хилдаги чекловлар, айниқса, амалдорларнинг кенг, фуқаролик назоратидан холи, қўл остидаги ходимларига нисбатан чекланмаган рухсат бериш ёки тақиқлаш ваколатлари порахўрликка замин яратади. Шу билан бирга йирик маблағларга эга бўлган ишбилармонлар даромадларини янада кўпайтириш мақсадида ҳамда рақобат майдонида алоҳида имтиёзларга эга бўлиш учун катта миқдордаги пора эвазига амалдорларни ўз ихтиёрларига бўйсундириб олишга интилишлари оқибатида давлат ва жамият учун жиддий зарар келтирувчи иқтисодий жиноятларни — уюшган коррупциявий ҳолатлар содир бўлади.
Бундай салбий ҳолатларнинг олдини олишда ва коррупцияга қарши курашишда энг фаол тарғиботчи сифатида жаҳон миқёсида, шу жумладан мамлакатимизда ҳам оммавий ахборот воситаларининг роли ошиб бормоқда. Оммавий ахборот воситалари вакиллари доимий равишда халқ орасига кириб бориб, фуқаролар онгида коррупция иллатига қарши муросасизлик туйғусини уйғотиш билан бирга жамиятдаги ижтимоий кайфиятни фаоллик билан ёритиб бормоқда.
Амударё телевидениеси таҳририятининг Ўзбекистон Республикаси Олий Мажлиси ҳузуридаги Фуқаролик жамияти институтларини қўллаб-қувватлаш жамоат фонди Қорақалпоғистон Республикаси бўлинмаси томонидан молиялаштирилган "Коррупция — давлат ва жамият тараққиётига таҳдид" номли грант лойиҳаси доирасида аҳоли кенг қатламлари иштирокида амалга оширилаётган учрашув ва давра суҳбатлари, очиқ ва ошкора мулоқот тарзидаги малакали ҳуқуқшуносларни жалб қилган ҳолда ташкиллаштирилаётган савол-жавоб тадбирлари коррупцияга қарши кураш борасидаги аҳолининг ҳуқуқий маданиятини ҳамда уларнинг ижтимоий фаоллигини ошириш имконини бермоқда.
Лойиҳа координаторлари томонидан навбатдаги коррупцияга қарши кураш бўйича тарғибот-ташвиқот тадбири Амударё туманининг Дўстлик маҳалласи ҳудудида ўтказилди. Лойиҳа иш режасига асосан маҳалла ҳудудида жойлашган туман Ички ишлар бўлими, Солиқ инспекцияси, Дўстлик маҳалла фуқаролар йиғинида фаолият олиб борувчи давлат хизматчилари ҳамда давлат хизматларидан фойдаланувчи фуқароларга коррупцияга қарши курашиш бўйича тарқатма воситалар, буклетлар ва плакатлар тарқатиш орқали аҳоли онгида коррупцияга нисбатан муросасизлик туйғусини шакллантиришга ҳисса қўшилди.
Тадбир жараёнида давлат хизматчилари ва давлат хизматларидан фойдаланувчилар "Коррупция — давлат ва жамият тараққиётига таҳдид" номли грант лойиҳаси координаторлари томонидан тақдим этилган тарғибот-ташвиқот воситалари билан танишиб, коррупция иллатига қарши кураш бўйича ўз фикрларини билдирдилар. Шу билан бирга, мамлакатимизнинг коррупциядан холи, юксак тараққий этган давлат сифатида дунё миқёсида юқори нуфузга эга бўлиши учун коррупцияга қарши курашишда кенг жамоатчилик назорати ва ҳамжиҳатликдаги саъй-ҳаракатлари муҳим аҳамиятга эгалигини таъкидладилар.
Таҳририят томонидан амалга оширилаётган бу каби чора-тадбирлар ҳақиқатан ҳам аҳоли онгида коррупцияга нисбатан муросасизлик туйғусини шакллантириб, коррупциянинг олдини олишга, жамиятда ҳамжиҳатлик ва уюшқоқлик муҳитини мустаҳкамлашга хизмат қилади.
РОБИЯ ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
