ҲАРБИЙЛАР ВА ТАЛАБАЛАР НАВОИЙ ИЖОДИЁТИ БЎЙИЧА “ЗАКОВАТ” МАЙДОНИДА КУЧ СИНАШДИ

Буюк мутафаккир, ғазал мулкининг султони Мир Алишер Навоий таваллудининг 585 йиллиги мамлакатимизда кенг нишонланмоқда. Ушбу қутлуғ сана муносабати билан ҳарбий қисмлар ва таълим муассасаларида ташкил этилаётган маънавий-маърифий тадбирлар ёшларда миллий меросга эҳтиром, китобхонлик ва фаол фуқаролик позициясини мустаҳкамлашга хизмат қилмоқда. Ана шундай тадбирлардан бири Шимоли-ғарбий ҳарбий округнинг Маънавият ва маърифат марказида ўтказилган “Заковат” интеллектуал ўйини бўлди.

Мазкур беллашувда Нукус гарнизонида хизмат қилаётган ҳарбий хизматчилар ҳамда Нукус инновацион технологиялар университети талабалари иштирок этиб, ўз билим ва заковатларини синовдан ўтказдилар.

Тадбирнинг асосий ғояси — Ватан ҳимоячилари ва ёшлар ўртасида миллий адабиётимизга, хусусан, Ҳазрат Навоий ижодига бўлган қизиқишни янада ошириш, маънавий дунёқарашни кенгайтиришдан иборат бўлди.

Интеллектуал баҳсда жамоалар Мир Алишер Навоийнинг ҳаёт йўли, серқирра ижоди, унинг машҳур “Хамса” асари, тарихий шахслар ҳамда миллий қадриятларимизга оид саволларга жавоб изладилар. Саволлар мазмуни иштирокчилардан нафақат фактларни билишни, балки мантиқий хулоса чиқариш, таққослаш ва тезкор қарор қабул қилиш кўникмаларини ҳам талаб этди.

Ўйин давомида, айниқса, ғазалхонликка оид шартлар катта қизиқиш уйғотди. Навоий ғазалларидан парчалар келтирилиб, уларнинг давомини топиш ёки мазмунини қисқа, аниқ ифода этиш вазифалари берилди. Бу эса жамоаларнинг китобхонлик даражаси билан бирга нутқ маданияти, маъно англаш ва жамоа бўлиб ишлаш қобилиятини ҳам намоён қилди. Томошабинлар олдида шаклланган дўстона рақобат муҳити беллашувга алоҳида руҳ бағишлаб, ҳар бир тўғри жавобдан сўнг залда қувончли қарсаклар янгради.

Тадбирда сўз олганлар Навоий асарларида инсонпарварлик, адолат, ватанпарварлик ва илм-маърифатга интилиш каби юксак ғоялар мужассам эканини қайд этиб, бу мерос бугунги кун ёшлари учун ҳақиқий ҳаёт мактаби эканини таъкидладилар. Шу маънода, “Заковат” каби интеллектуал лойиҳалар билимни мустаҳкамлаш билан бирга, мафкуравий иммунитетни кучайтириш, ёшларнинг бўш вақтини мазмунли ташкил этиш, хизмат ва ўқиш муҳитида ҳамкорлик ҳамда ўзаро ҳурматни оширишга хизмат қилади.

Беллашув якунида энг юқори натижа кўрсатган, зукколиги ва жипслиги билан ажралиб турган жамоалар ташкилотчилар томонидан диплом ва эсдалик совғалар билан тақдирланди. Ғолибларнинг эътирофи, иштирокчиларнинг фаоллиги ва тадбирнинг мазмунли ташкил этилгани барчага бирдек манзур бўлди.

Шимоли-ғарбий ҳарбий округ раҳбарияти ташаббуси билан ўтказилган мазкур “Заковат” ўйини шунчаки беллашув эмас, балки буюк аждодларимизга бўлган ҳурмат ва эътиборнинг ёрқин намунасидир. Зеро, Навоийни, унинг буюк меросини ва бой адабиётимизни англаш ҳарбийлар ҳамда ёшлар учун маънавий таянч ва ҳаётий йўл-йўриқдир. Навоий асарлари инсонпарварлик, адолат, ватанпарварлик, матонат ва ҳалоллик каби фазилатларни мустаҳкамлайди. Ҳарбийлар учун бу мерос хизмат бурчини онгли адо этиш, халққа садоқат ва хизмат жараёнида қатъий интизомни намоён қилишга ёрдам беради. Талаб ёшлар эса Нaвоий ижоди орқали миллий ўзликни ҳис этади, маънавий иммунитетини кучайтиради, нутқ маданияти ва фикрлаш даражасини оширади.

Бу каби маънавий-маърифий тадбирлар ёшларни ватанпарварлик руҳида тарбиялаш, уларни илм-маърифатга ундаш ва миллий қадриятлар атрофида бирлаштиришда муҳим ўрин тутади.