Намунали ҳарбий оила — мустаҳкам жамият таянчи

Шимоли-ғарбий ҳарбий округида “Мен намунали ҳарбий оила бекасиман” шиори остида “Балли аёллар” кўрик-танловининг округ босқичи юқори савияда ташкил этилди. Тадбир ҳарбий хизматчилар оилаларини қўллаб-қувватлаш, хотин-қизларнинг ижтимоий фаоллигини ошириш ҳамда миллий қадриятларни кенг тарғиб этишга қаратилди.

Маълумки, ҳарбий хизмат ўзининг масъулияти ва интизоми билан ажралиб туради. Бундай шароитда ҳарбий хизматчининг оиласи, айниқса турмуш ўртоғининг маънавий қўллаб-қувватлаши алоҳида аҳамият касб этади. Шу боис мазкур танлов ҳарбий хизматчиларнинг турмуш ўртоқлари фаоллигини рағбатлантириш, уларнинг иқтидори ва ташаббусларини юзага чиқариш учун муҳим майдон бўлди. Унда округ тасарруфидаги ҳарбий қисмларда хизмат қилаётган ҳарбий хизматчиларнинг турмуш ўртоқлари фаол иштирок этди.

Кўрик-танловнинг асосий мақсади — ҳарбий хизматчилар оилаларида ўзаро ҳурмат, садоқат ва меҳр-оқибат муҳитини кучайтириш, оила бекасининг маънавий, маърифий ва ижодий салоҳиятини намоён этишдан иборат. Шунингдек, иштирокчиларнинг пазандалик, ҳунармандчилик, саҳна маданияти ва болалар тарбияси борасидаги тажрибаларини оммалаштириш ҳам муҳим вазифа саналади. Бу эса танловнинг фақат бир кунлик беллашув эмас, балки узоқ муддатли маънавий тарбия ва ижтимоий фаолликни рағбатлантиришга қаратилган ташаббус эканини кўрсатди.

Танлов бир нечта шартлар асосида ўтказилди. “Таништирув” шартида иштирокчилар ўз оиласи, турмуш тарзи ва қадриятлари ҳақида таъсирчан тақдимотлар намойиш этди. Ушбу босқичда ҳар бир иштирокчи оилавий анъаналар, фарзанд тарбиясидаги ёндашувлар ва ҳаётий шиорларини баён қилди. “Миллий қадриятлар — оилам кўзгуси” шартида эса урф-одат ва анъаналаримизга садоқат, миллийлик руҳи ёрқин ифодаланди. Иштирокчилар миллий либосларда чиқиш қилиб, оилавий маросимлар, қадимий расм-русумлар ҳақида саҳнавий кўринишлар намойиш этди.

“Маҳоратли бека” йўналишида пазандалик ва амалий санъат намуналари тақдим этилди. Ўзбекона таомлар, миллий ширинликлар ва қўл меҳнати асосида яратилган буюмлар ҳакамлар ҳайъати томонидан юқори баҳоланди. “Заковат ва топқирлик” шартида эса иштирокчиларнинг билим ва дунёқараши, жамиятдаги ислоҳотлар, оила ва тарбияга оид қарашлари синовдан ўтказилди. Бу босқич танлов иштирокчиларининг фақат уй-рўзғор ишлари билан чекланиб қолмасдан, кенг дунёқараш ва фаол фуқаролик позициясига эга эканини намоён этди.

Тадбир давомида миллий либослар жилоси, қадимий анъаналаримизга хос урф-одатлар ва ўзбекона меҳмондўстлик анъаналари кенг намоён бўлди. Қўл меҳнати асосида яратилган каштачилик ва ҳунармандчилик намуналари нафақат эстетик жиҳатдан, балки миллий меросни асраб-авайлаш нуқтаи назаридан ҳам катта аҳамиятга эга экани таъкидланди. Саҳна кўринишлари ва ижодий чиқишлар орқали ҳарбий оила бекаларининг иқтидори, ташаббускорлиги ва фаоллиги яна бир бор ўз тасдиғини топди.

Айниқса, фарзанд тарбияси, оилавий қадриятлар ва ватанпарварлик мавзусидаги чиқишлар томошабинларда катта таассурот қолдирди. Чунки ҳарбий оилада тарбия топаётган фарзандлар келгусида юртга садоқатли, интизомли ва масъулиятли инсонлар бўлиб камол топиши муҳим аҳамиятга эга. Шу маънода танлов нафақат ижодий беллашув, балки ҳарбий оилалар ўртасида тажриба алмашиш, ўзаро мулоқотни кучайтириш ва дўстона муҳитни мустаҳкамлаш майдонига айланди.

Якунларига кўра, ҳакамлар ҳайъати томонидан энг муносиб иштирокчилар аниқланиб, диплом ва эсдалик совғалари билан тақдирланди. Ғолибликни қўлга киритган оила бекаси танловнинг вазирлик босқичида иштирок этиш ҳуқуқини қўлга киритди.

Чиндан ҳам, оила мустаҳкам бўлган жойда жамият барқарор, маънавий муҳит соғлом ва келажак ишончли бўлади. “Балли аёллар” кўрик-танлови эса ана шу эзгу ғояларни ҳаётга татбиқ этишда муҳим аҳамият касб этди.