Вояга етмаган қизлар таълим-тарбияси — устувор вазифа

Амударё тумани Маданият бўлимида вояга етмаган қизларнинг таълим-тарбияси, уларнинг ҳуқуқ ва манфаатларини ҳимоя қилиш, эрта никоҳ ва ҳуқуқбузарликларнинг олдини олиш масалаларига бағишланган муҳим йиғилиш бўлиб ўтди. Тадбир ҳудудларда олиб борилаётган маънавий-маърифий ишлар самарадорлигини ошириш ҳамда мутасадди ташкилотлар ўртасидаги ҳамкорликни мустаҳкамлаш мақсадида ташкил этилди.

Йиғилишда Қорақалпоғистон Республикаси Вазирлар Кенгаши Раиси ўринбосари, Оила ва хотин-қизлар қўмитаси раиси Марям Аҳмедова, Мактабгача ва мактаб таълими вазири вазифасини бажарувчи Муҳаббат Шлимбетова, Ички ишлар вазирлиги Жамоат хавфсизлиги хизмати ҳуқуқбузарликлар профилактикаси бўлинмаси бошлиғи ўринбосари Хурзада Реимова, шунингдек, Амударё тумани ҳокими ўринбосарлари, тегишли ташкилот ва идора раҳбарлари, умумтаълим мактаблари директорлари ҳамда маҳалла хотин-қизлар фаоллари иштирок этди.

Йиғилишни очиб берган Вазирлар Кенгаши Раиси ўринбосари Марям Аҳмедова сўнгги йилларда хотин-қизларни қўллаб-қувватлаш, уларнинг таълим олиши ва жамиятдаги фаоллигини ошириш борасида амалга оширилаётган кенг кўламли ислоҳотларга тўхталди. У вояга етмаган қизлар тарбияси нафақат оила, балки бутун жамиятнинг масъулияти эканини алоҳида таъкидлади.

Қизларимизнинг билимли, мустақил фикрлайдиган, ўз ҳуқуқларини биладиган шахс бўлиб вояга етиши — эртанги тараққиётимиз пойдевори эканлигини, шу боис маҳалла, мактаб ва ота-оналар ҳамкорлигини янада кучайтириш зарурлигини қайд этди.

Мактабгача ва мактаб таълими вазири вазифасини бажарувчи Муҳаббат Шлимбетова ўз сўзида мактабларда маънавий-маърифий муҳитни соғломлаштириш, психологик хизмат самарадорлигини ошириш, дарсдан ташқари тўгараклар фаолиятини кенгайтириш масалаларига эътибор қаратди. Айниқса, ижтимоий ҳимояга муҳтож оилалардаги қизлар билан индивидуал ишлаш тизимини кучайтириш зарурлиги таъкидланди.

У ҳар бир мактаб директори ва синф раҳбари қизларнинг давомати, дарсдаги фаоллиги ва оилавий шароити бўйича мунтазам мониторинг олиб бориши лозимлигини қайд этди. Таълим сифати билан бир қаторда, тарбия масаласи ҳам устувор йўналиш бўлиб қолиши кераклиги таъкидлади.

Шунингдек, Ички ишлар вазирлиги бўлим бошлиғи ўринбосари Хурзада Реимова эса вояга етмаганлар ўртасида содир этилаётган ҳуқуқбузарликлар, эрта никоҳ ва зўравонлик ҳолатларининг олдини олиш борасида амалга оширилаётган профилактик чора-тадбирлар ҳақида маълумот берди. У ички ишлар органлари томонидан мактаблар ва маҳаллаларда профилактик суҳбатлар, ҳуқуқий тарғибот тадбирлари мунтазам ўтказилаётганини таъкидлади.

Шунингдек, қизларни турли зарарли оқимлар ва салбий таъсирлардан ҳимоя қилишда ота-оналарнинг ҳушёрлиги ва масъулияти муҳим ўрин тутиши алоҳида қайд этилди.

Йиғилиш давомида туман ҳокими ўринбосарлари сўзга чиқиб, жойларда олиб борилаётган ишлар, мавжуд муаммолар ва уларни бартараф этиш бўйича таклифларни билдирди. Айрим ҳудудларда қизларнинг мактабдан кейинги бўш вақтини мазмунли ташкил этиш, касб-ҳунарга йўналтириш, спорт ва санъат тўгаракларига жалб қилиш бўйича қўшимча чоралар кўриш лозимлиги таъкидланди.

Кун тартибидаги масала юзасидан туман масъулларига бир қатор аниқ топшириқлар берилди. Жумладан, мактабларда қизлар билан ишлаш бўйича алоҳида “йўл харитаси” ишлаб чиқиш, ижтимоий хавф гуруҳига кирувчи оилалар билан манзилли ишлаш, ҳуқуқий саводхонликни оширишга қаратилган тарғибот тадбирларини кучайтириш, маҳалла ва таълим муассасалари ўртасида ҳамкорликни тизимли йўлга қўйиш лозимлиги қайд этилди.

Мазкур йиғилиш вояга етмаган қизлар таълим-тарбияси масаласи доимо эътибор марказида эканини яна бир бор тасдиқлади. Қизларимизнинг бахтли, соғлом ва билимли бўлиб улғайиши — жамият барқарорлиги ва тараққиётининг муҳим омилидир.

Чарос Арслонова, туман ҳокимлигининг Ахборот хизмати раҳбари.