Нукусда муддатли ҳарбий хизматга жўнаб кетаётган ёшларни тантанали кузатиш маросими бўлиб ўтди

Ўзбекистон Республикаси Президентининг “Ўзбекистон фуқароларининг муддатли ҳарбий хизматга навбатдаги чақируви ҳамда белгиланган хизмат муддатини ўтаб бўлган муддатли ҳарбий хизматчиларни Қуролли Кучлар резервига бўшатиш тўғрисида”ги қарорига мувофиқ жойларда чақирув ёшидаги фуқароларни Миллий Армиямиз сафларига тантанали кузатиш маросимлари бошланди.

Нукус шаҳридаги Мустақиллик майдонида ҳам ана шундай тадбир ўтказилди. Маросимда Шимоли-ғарбий ҳарбий округ қўмондони, Қорақалпоғистон Республикаси Жўқорғи Кенгеси Раиси, Республика Мудофаа ишлари бошқармаси вакиллари, давлат ва жамоат ташкилотлари масъуллари, меҳнат фахрийлари, кенг жамоатчилик ва ёш аскарларнинг ота-оналари иштирок этди. Бу каби тантанали кузатишлар мамлакат бўйлаб бошланиб, ёшларнинг Ватан ҳимоясига бўлган масъулиятини янада ошириш ва уларни Миллий Армия сафларига руҳлантиришга хизмат қилмоқда.

Маросим Ўзбекистон ва Қорақалпоғистон Республикаларининг давлат мадҳиялари садолари остида бошланди. Бу ҳолат ўзига хос рамзий маъно касб этиб, йиғилганларнинг қалбида Ватанга садоқат ва фидойилик туйғуларини янада кучайтирди.

Тадбирда сўзга чиққанлар мамлакатимизда сўнгги йилларда амалга оширилаётган кенг кўламли ҳарбий ислоҳотлар, Қуролли Кучларнинг жанговар салоҳиятини мустаҳкамлаш, замонавий техника ва қурол-яроғлар билан таъминлаш, шунингдек, ёшларни ватанпарварлик руҳида тарбиялаш борасида олиб борилаётган тизимли ишларни алоҳида таъкидладилар.

Қайд этилганидек, ҳарбий хизмат ҳар бир ёш йигит учун нафақат конституциявий бурч, балки мардлик, интизом, жисмоний ва маънавий чиниқиш, фидойилик ва жамоавий ишонч мактабидир. Ушбу хизмат орқали ёшлар нафақат ўз Ватанини ҳимоя қилиш қобилиятига эга бўлади, балки ҳаётдаги мураккаб вазиятларда тўғри қарор қабул қилиш, масъулиятни ҳис этиш ва жамият олдидаги бурчини адо этишни ўрганади.

Сўзга чиққанлар ёш аскарларнинг келгусида мамлакат Қуролли Кучларининг муносиб хизматчилари бўлишларига ишонч билдирдилар. Уларга куч-ғайрат, сабр-тоқат, матонат ва улкан муваффақиятлар тилаб, Ватан ҳимояси йўлидаги хизматни ҳар қандай қийинчиликка қарамай, юксак шараф ва масъулият билан ўташларига тилакдош бўлдилар. Жамоатчилик вакиллари ва ота-оналар ҳам ўз навбатида ўғлонларининг Ватанга содиқ, мустаҳкам иродали бўлишларини тилаб, уларнинг ҳарбий хизматда юксак натижалар кўрсатишига ишонч билдирдилар. Таъкидланганидек, халқимиз тинчлиги, сарҳадларимиз дахлсизлиги ва Ватан ҳимояси йўлида хизмат қилиш ҳар бир фуқаро учун энг юксак масъулият ва улкан саодатдир.

Тадбирнинг энг таъсирли лаҳзаларидан бири ёш аскарларга Президент совғаларини тантанали равишда топшириш маросими бўлди. Масъул раҳбарлар, фахрийлар ва жамоатчилик вакиллари томонидан топширилган ушбу совғалар ёшлар қалбида Ватанга садоқат, юрт тинчлиги ва осойишталигини асрашдек улуғ мақсад йўлида янада мустаҳкам ишонч уйғотди. Бу ҳаракат ёшларга давлат ва жамиятнинг юқори эътибори ва ғамхўрлигининг, қолаверса юксак ишончининг яққол ифодаси бўлди.

Тадбирнинг бадиий қисми ҳам юқори савияда ташкил этилди. Турли саҳна кўринишлари, ватанпарварлик руҳидаги куй-қўшиқлар, шеърлар ва концерт дастури йиғилганларга байрамона кайфият улашди. Ушбу тадбир ёшларни янги ҳаёт босқичига – ҳарбий хизматга кўтаринки руҳда кузатишга хизмат қилди.

Маданий-маърифий қисм орқали нафақат ёшлар, балки уларнинг ота-оналари ва барча иштирокчиларнинг қалбида Ватанга муҳаббат туйғулари янада кучайди. Ушбу маросим мамлакатимизда ёшларни ватанпарварлик руҳида тарбиялаш, ҳарбий ватанпарварлик тарбиясини кучайтириш борасида олиб борилаётган изчил ишларнинг яна бир муҳим намунаси бўлди.

Эслатиб ўтамиз, чақирилиш муддатини кечиктириш ҳуқуқига эга бўлмаган Ўзбекистон Республикасининг чақирув ёшидаги фуқаролари 2026 йилнинг март–апрель ойларида муддатли ҳарбий хизматга чақирилади. Шунингдек, белгиланган хизмат муддатини ўтаб бўлган ҳарбий хизматчилар ҳам шу ойларда Қуролли Кучлар резервига бўшатилади. Бу жараён мамлакат бўйлаб тизимли ва тартибли равишда амалга оширилиб, Миллий Армиямиз сафларининг доимий янгиланиши ва мустаҳкамланишини таъминлайди.