Ичимлик сувининг сифати устидан қатъий назорат ўрнатилмоқда

Сув — нафақат ҳаёт манбаи, балки келажак авлодлар олдидаги юксак масъулият демакдир. Айниқса, экологик мувозанатни сақлаш ва табиий ресурслардан оқилона фойдаланиш глобал аҳамият касб этаётган бугунги даврда, ичимлик сувининг ҳар бир томчисини қадрлаш долзарб масалага айланган.

Ўзбекистон Республикаси Вазирлар Маҳкамаси ҳузуридаги Қурилиш ва уй-жой коммунал хўжалиги соҳасида назорат қилиш инспекциясининг Қорақалпоғистон Республикаси ҳудудий бошқармаси бу борада тизимли назоратни амалга ошириб, соҳада қонун устуворлигини таъминлаш йўлида самарали фаолият юритмоқда қилмоқда.

Бу борада аввало истеъмол қилинаётган сувнинг сифат кўрсаткичларига алоҳида эътибор қаратилмоқда. Зеро, аҳоли саломатлиги бевосита истеъмол қилинаётган сувнинг тозалигига боғлиқ. Шу сабабли, Қорақалпоғистон Республикаси Санитария-эпидемиологик осойишталик ва жамоат саломатлиги қўмитаси билан яқин ҳамкорлик ўрнатилиб, ҳудудлар кесимида ичимлик суви сифати бўйича жами 213 та лаборатория таҳлиллари олинди. Бу кўрсаткич ҳар бир хонадонга ва ташкилотга етиб бораётган сувнинг давлат стандартларига мувофиқлигини таъминлаш йўлидаги муҳим қадамдир.

Инспекциянинг ичимлик сувидан оқилона фойдаланиш ва сотишни мувофиқлаштириш ҳамда оқова сув хизматларидан фойдаланиш бўлими ходимлари режага асосан Амударё туманида ҳам бўлиб, туман Санитария-эпидемиологик осойишталик ва жамоат саломатлиги бўлими ходимлари билан ҳамкорликда аҳоли хонадонлари ва ташкилотларга етказиб берилаётган ичимлик сувининг сифатини таъминлаш борасида ўрганиш ишларини олиб бордилар.

Назорат тадбирлари фақатгина сифат билан чекланиб қолмай, балки давлат маблағларидан фойдаланувчи ташкилотлардаги ички интизомни ҳам қамраб олмоқда. Биргина жорий йилнинг январь-февраль ойларида Қорақалпоғистон Республикаси бўйича 63 та бюджет ташкилотларида ичимлик сувидан фойдаланиш қоидаларига риоя қилиниши ҳолати чуқур ўрганилди.

Афсуски, текширувлар натижасида 15 та ҳолатда жиддий камчиликлар аниқланиб, уларни бартараф этиш бўйича тегишли кўрсатмалар берилди. Масъулиятсизликка йўл қўйган ва белгиланган тартиб-қоидаларни бузган 7 нафар бюджет ташкилоти ходимларига нисбатан Маъмурий жавобгарлик тўғрисидаги кодекснинг тегишли моддаларига асосан жами 30 миллион сўм миқдорида жарималар қўлланилди. Бу чоралар давлат мулки ва ресурсларига бўлган муносабатни тубдан ўзгартиришга хизмат қилади.

Инспекция олдида турган энг асосий вазифа — фақатгина жазолаш эмас, балки аҳоли ва тадбиркорлар ўртасида сувдан фойдаланишнинг юксак маданиятини шакллантириш, аҳолига етказиб берилаётган ичимлик сувининг белгиланган талабларга мос бўлишини таъминлашдир. Зеро, сифат бор жойда саломатлик бўлади, тежамкорлик бор жойда эса исрофгарчиликка чек қўйилади.

Қорақалпоғистон Республикаси ҳудудий назорат қилиш инспекцияси томонидан амалга оширилаётган бу каби тизимли ишлар сув таъминотида узлуксизликни таъминлаш ва сифатни кафолатлашга қаратилган яхлит стратегиянинг бир қисмидир. Зеро, сув — бу шунчаки ресурс эмас, балки миллатнинг соғлиғи, иқтисодиётнинг барқарорлиги ва фаровон турмушнинг кафолатидир.

Соҳадаги назорат тадбирлари келгусида ҳам изчил давом эттирилиб, ҳар бир томчи сувнинг ҳисоб-китобли, хизматлар сифатининг эса юқори даражада бўлиши таъминланади.