Пробация назоратидаги шахслар билан ҳуқуқий тарғибот учрашуви ўтказилди
Жиноят содир этган шахсни жамиятдан узиб қўйиш эмас, балки уни тузалиш ва ҳалол меҳнат йўлига қайтариш — бугунги ҳуқуқий сиёсатнинг асосий йўналишларидан бири. Шу мақсадда юртимизда жорий этилган пробация тизими жазони ўтаётган фуқароларни доимий назорат остида ушлаб туриш билан бирга, уларнинг оила ва жамият ҳаётига қайта мослашувига амалий кўмак беришни назарда тутади. Бу тизимнинг моҳияти шундаки, инсон жазо муддатини ўтаб бўлгач, жамиятда ўзини бегона сезмаслиги, касб-кори, иш ўрни ва ижтимоий муҳити билан боғланиб қолиши учун шароит яратилади.
Айтиш жоизки, бу йўналишдаги ишларнинг самараси кўп жиҳатдан ҳуқуқни муҳофаза қилувчи органлар, маҳаллий идоралар ва жамоатчилик вакилларининг ўзаро ҳамжиҳатлигига боғлиқ бўлиб, айни шу тамойил асосида ҳудудларда тизимли учрашувлар ташкил этиб келинмоқда. Бир идоранинг ҳаракати билан кутилган натижага эришиш қийин — бунда маҳалла, таълим муассасалари ва иш берувчиларнинг ҳам иштироки талаб этилади.
Шу йўналишда Қорақалпоғистон Республикаси Ички ишлар вазирлиги Жамоат хавфсизлиги хизмати Пробация бўлими бошлиғи, подполковник Даврон Аҳмедов раҳбарлигида Амударё туманида йиғилиш бўлиб ўтди. Унда қонунийликни таъминлаш ҳамда назорат остидаги шахсларнинг жамиятга ижтимоий мослашуви билан боғлиқ масалалар кўриб чиқилди.
Тадбирда туман прокурорининг катта ёрдамчиси Оғабек Еркулиев, туман Ички ишлар бўлими бошлиғининг ўринбосари, подполковник Шарапат Жолдасбоев, туман Ички ишлар бўлими Пробация гуруҳи инспектори, капитан Руслан Искандаров, шунингдек ҳудуддаги ҳамкор давлат органлари ва муассасаларнинг масъуллари, кенг жамоатчилик вакиллари иштирок этди.
Йиғилишга туман туман Ички ишлар бўлими Пробация гуруҳи ҳисобида турган, жазони ўташда давом шахслар жалб қилинди. Улар билан бўлиб ўтган мулоқот давомида қонун талабларига сўзсиз амал қилиш, белгиланган тартиб-қоидаларни бузмаслик зарурлиги алоҳида кўрсатиб ўтилди. Шунингдек, назорат тартибини бузиш қандай ҳуқуқий оқибатларга олиб келиши мумкинлиги тушунтирилди.
Шу билан бирга, пробация назорати остидаги фуқароларнинг ҳуқуқлари, эркинликлари ва қонуний манфаатлари ҳимоя қилинишини таъминлаш, такроран жиноят содир этилишининг олдини олиш мақсадида уларнинг хулқ-атворини тузатиш бўйича тарбиявий ишлар самарадорлигини ошириш юзасидан комплекс чора-тадбирлар амалга оширилаётгани қайд этилди. Йиғилишда шунингдек ушбу тоифадаги шахсларнинг турмуш шароити, бандлиги ва ижтимоий муаммолари билан яқиндан танишиб бориш, уларга амалий ёрдам кўрсатиш масалаларига ҳам тўхталиб ўтилди.
Бундай учрашувлар назоратдаги шахсга ўз масъулиятини англаш, атрофидаги идоралар эса унга ёрдам беришга тайёр эканини кўрсатиш имконини беради. Қонун талабини билган одам уни бузишдан ўзини тияди — пробация ишининг мазмуни ҳам шу оддий ҳақиқатга таянади.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
