ЙЎЛ ТРАНСПОРТ ҲОДИСАСИ МУҲОКАМАСИГА БАҒИШЛАНГАН ЙИҒИЛИШ ЎТКАЗИЛДИ
Ҳар ким эрталаб эзгу ниятлар билан остона ҳатлаб кўчага чиқади, ишга бориш, ҳаётий зарурати туфайли транспорт воситасига минади.
Кейинги йилларда фуқароларнинг ҳаёти фаровонлиги ортиб бораётгани деярли барча хонадонлар шахсий транспорт воситаларига эга эканлигида ҳам кўринади. Бу албатта, қувонарли ҳол. Бироқ кўчаларда автотраспорт бошқариш қоида ва меъёрларига амал қилмаслик, ҳайдовчи ва пиёдаларнинг билим-кўникмалари, қонунга итоаткорлиги,бошқа йўл ҳаракати иштирокчиларига ўзаро ҳурматининг пастлиги оқибатида йўл-транспорт ҳодисалари, кўплаб йўқотишлар содир бўлаяпти. Барчанинг кўз ўнгида юз берган автоҳалокатлар оқибатида не-не аламлар, юракни ларзага солувчи йўқотишлардан айримлар ўзига хулоса чиқариб олмаяпти. Натижада бундай кўнгилсиз ҳодисалар давом этаётир.
Ҳозир сўз юритмоқчи бўлганимиз - бир ёш йигитнинг умрига зомин бўлган аянчли йўл транспорт ҳодисасини содир этган йигит ҳам «қушдай учадиган» машинасида, йўлда ҳеч кимни писанд қилмай, фақат ўзимман, деб тезликни меъёрдан оширган. Аслида у ўша куни Тошёп овулида уйланаётган танишининг тўй хизматига яъни «гулянка»сига чиққан, машинасига бир неча куёв жўраларни миндириб кетаётганида, Манғит айланма йўлидан 3 километрида бошқарувни йўқотиши натижасида йўлнинг қарама қарши томонига чиқиб кетиб, йўл четига ағдарилиб, йўл транспорт ҳодисасини содир қилган. Оқибатда машинада бўлган бир йигит оламдан ўтган, айримлари турли даражада тан жароҳати олишган.
Жароҳатга-ку шифо топилар, бироқ бевақт сўлган навқирон йигитни ҳаётга қайтариб бўлмайди-да. Ҳа, бу - энг ачинарлиси.
Шу йилнинг 20 январида туман ҳокимлиги мажлислар хонасида ушбу ҳодиса муҳокамасига бағишланган йиғилиш бўлиб ўтди. Йиғилишга туман Маҳалла ва оилани қўллаб-қувватлаш бўлими, Ички ишлар, прокуратура масъуллари, туманимиздаги ўзини ўзи бошқариш органлари раҳбарлари ва ўринбосарлари, жамоат ташкилотлари вакиллари ФҲДЁ, Юсуф Эшон бобо жомъе масжиди вакиллари иштирок этдилар.
Йиғилишни туман Маҳалла ва оилани қўллаб-қувватлаш бўлими бошлиғи Алишер Йўлдошев очди ва олиб борди. У юқоридаги қайд этилган ҳодисани тилга олиб, ҳуқуқ-тарғибот органлари, фуқаролар йиғинлари масъул ходимлари келгусида бунингдек ҳодисалар қайта содир бўлмаслиги учун тўй-маросимлар белгиланган тартибда ўтказилиши, «гулянка»ларда машиналарнинг сони ва ҳаракатини тартибга солиш, ёш-ёш йигит-қизларнинг беъмани одатлар қурбонига айланиб қолишига чек қўйиш лозимлиги хусусида гапирди. Ахир инсон ҳаётга бир марта келади. Инсонийликка тўғри келмайдиган «орзу-ҳавас» учун ким ўзарга тўй беришларга чек қўйиб, ёшларнинг бахтли-саодатли бўлиши учун интилмоғимиз лозим. Ахир улар келажагимиз, дея таъкидлади у ўз сўзида.
Мавзу юзасидан туман прокурори Жавлонбек Муфтуллаев, туман Ички ишлар бўлими бошлиғи Улуғбек Худойберганов, имом хатиблар ва йўл транспорт ҳодисаси иштирокчилари истиқомат қиладиган овул фуқаролар йиғини масъуллари, фаоллари ўз фикр-мулоҳазаларини билдирдилар. Тўй-тантана ва бошқада маросимларни белгиланган тартибда ўтказишни таъминлаш юзасидан йўл ҳаракати хавфсизлиги ходимларига, профилактика инспекторларига ва ўзини ўзи бошқариш органлари масъулларига қатъий топшириқлар берилди. Ижросини эса туман прокуратураси ва Ички ишлар бўлими ўз назоратига оладиган бўлди.
Йўл транспорт ҳодисаси муҳокамасига бағишланган йиғилишда муҳокама этилган масала юзасидан қарорлар қабул қилинди.
Ойгул Ражабова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
