ЙЎЛ-ТРАНСПОРТ ҲОДИСАЛАРИНИНГ ОЛДИНИ ОЛИШ МАСАЛАСИДА ЙИҒИЛИШ БЎЛИБ ЎТДИ

Йўл тасодифларга тўла. Мавзуга чуқурроқ ёндошадиган бўлсак, аксарият кўнгилсиз тасодифлар автомобил бошқарувчилар, айрим ҳолларда эса йўл ҳаракати иштирокчилари бўлган пиёдалар айби билан содир бўлаётганини англаш қийин эмас. Ҳайдовчилар автомобиль бошқаруви давомида фақат ўз ҳаёти эмас, балки йўл ҳаракатининг бошқа иштирокчилари  хавфсизлиги учун ҳам масъул эканлигини унутмаслиги лозим. Афсуски, бу борада тушунтириш-тарғибот ишлари олиб борилаётган бўлишига қарамай, кўнгилсиз йўл-транспорт ҳодисалари, уларнинг натижасида бегуноҳ инсонларнинг жабрланиши камаймаяпти.

Яқинда Амударё тумани ҳокимлиги мажлислар хонасида шу мавзуда йиғилиш ўтказилди. Йиғилишни туман ҳокимлигининг молия-иқтисодиёт ва камбағалликни қисқартириш масалалари бўйича биринчи ўринбосари Маъмур Темирбоев очди ва олиб борди.

Йиғилишга туман Кенгаши депутатлари, туман ҳокими ўринбосарлари, секторлар  раҳбарлари, мактаблар директорлари, ўзини ўзи бошқариш органлари раислари ва уларнинг ўринбосарлари, фаол ёшлар иштирок этдилар.

Йиғилиш иштирокчиларига дастлаб 2021 йилнинг 21 январида Беруний тумани Абай овули ҳудудидан ўтган А-380 асфальт йўлининг 651-652 километри оралағида содир бўлган йўл транспорт ҳодисаси туфайли юзага келган аянчли ҳолат видеолавҳаси намойиш этилди.

Ўша куни Беруний туманининг Тинчлик маҳалласида истиқомат қилувчи Бекзод Собуров ўзи бошқарувида бўлган «Нексия - 2»русумли автомашинасини бошқариб кетаётиб, йўл сирпанчиқ, қор ёғиб, йўлни кўриш қийин бўлгани туфайли бошқарувни йўқотиб, йўлнинг қарама-қарши томонига чиқиб кетган ва қарши йўналишда ҳаракатланиб келаётган Хоразм вилояти фуқароси Махсуд Жобборовнинг бошқарувидаги юк машинасига бориб урилган. Натижада “Нексия” русумли автомашина ҳайдовчиси Бекзод Собуров ва унинг онаси воқеа жойида, турмуш ўртоғи, синглиси ва келини эса олган тан жароҳатлари туфайли шифохонада вафот этишган.

Шу куни соат 7-00 лар чамасида Ғузор-Бухоро – Нукус – Бейнау йўлининг 699-700- километрлари оралиғида, Қораўзак тумани ҳудудида амударёлик икки нафар йигит кетаётган «Спарк» русумли машина Элликқалъа туманида яшовчи фуқаро бошқарувида бўлган «Кобальт» русумли автомашина билан тўқнашиши натижасида икки йигит ҳалок бўлган.

Иштирокчилар воқеа жойидан олинган икки видеолавҳа билан таништирилгандан сўнг, ҳодиса муҳокамасига ўтилди. Албатта, ноқулай об-ҳаво шароитида ҳаракатланмаслик, тезликни меъёрдан оширмаслик туфайли ана шундай кўнгилсизликларнинг олдини олиш мумкин эди.

Энди эса афсусланиш билан вақтни орқага қайтариб бўлмайди. Фақат барча огоҳлик, ўта ҳушёрлик, йўл ҳаракати қоидаларига амал қилиш туфайли келгусида бунингдек ҳодисаларнинг олдини олиши мумкин.

Бу ҳақда йиғилишда иштирок этган Ўзбекистон Республикаси Ички ишлар вазирлиги йўл ҳаракати хавфсизлиги Бош бошқармаси бошлиғи ўринбосари, полковник Эрали Бозорбоев, Қорақалпоғистон Республикаси Ички ишлар вазири ўринбосарлари, полковник Ислом Аҳмедов, полковник Бахитжон Избосаровлар атрофлича гапирдилар.

Шунингдек, туман прокурори Жавлонбек Муфтуллаев, Ички ишлар бўлими бошлиғи Улуғбек Худойберганов, Қиличбой овул фуқаролар йиғини раиси Баҳром Қодиров, Ёшлар агентлиги туман бўлими бошлиғи Жасур Давлетов, меҳнат фахрийси Пардагул Ўрозбоевалар мавзу юзасидан ўзларининг фикр-мулоҳазаларини, йўл-транспорт ҳодисаларининг олдини олиш юзасидан таклифларини билдирдилар.

Йиғилишда йўл транспорт ҳодисалари оқибатида фуқароларнинг жабрланишларининг олдини олишга хизмат қилувчи чора-тадбирлар белгилаб олинди.

О.РАЖАБОВА.