YOʻL-TRANSPORT HODISALARINING OLDINI OLISh MASALASIDA YIGʻILISh BOʻLIB OʻTDI

Yoʻl tasodiflarga toʻla. Mavzuga chuqurroq yondoshadigan boʻlsak, aksariyat koʻngilsiz tasodiflar avtomobil boshqaruvchilar, ayrim hollarda esa yoʻl harakati ishtirokchilari boʻlgan piyodalar aybi bilan sodir boʻlayotganini anglash qiyin emas. Haydovchilar avtomobil boshqaruvi davomida faqat oʻz hayoti emas, balki yoʻl harakatining boshqa ishtirokchilari  xavfsizligi uchun ham masʼul ekanligini unutmasligi lozim. Afsuski, bu borada tushuntirish-targʻibot ishlari olib borilayotgan boʻlishiga qaramay, koʻngilsiz yoʻl-transport hodisalari, ularning natijasida begunoh insonlarning jabrlanishi kamaymayapti.

Yaqinda Amudaryo tumani hokimligi majlislar xonasida shu mavzuda yigʻilish oʻtkazildi. Yigʻilishni tuman hokimligining moliya-iqtisodiyot va kambagʻallikni qisqartirish masalalari boʻyicha birinchi oʻrinbosari Maʼmur Temirboyev ochdi va olib bordi.

Yigʻilishga tuman Kengashi deputatlari, tuman hokimi oʻrinbosarlari, sektorlar  rahbarlari, maktablar direktorlari, oʻzini oʻzi boshqarish organlari raislari va ularning oʻrinbosarlari, faol yoshlar ishtirok etdilar.

Yigʻilish ishtirokchilariga dastlab 2021-yilning 21-yanvarida Beruniy tumani Abay ovuli hududidan oʻtgan A-380 asfalt yoʻlining 651-652 kilometri oralagʻida sodir boʻlgan yoʻl transport hodisasi tufayli yuzaga kelgan ayanchli holat videolavhasi namoyish etildi.

Oʻsha kuni Beruniy tumanining Tinchlik mahallasida istiqomat qiluvchi Bekzod Soburov oʻzi boshqaruvida boʻlgan «Neksiya - 2»rusumli avtomashinasini boshqarib ketayotib, yoʻl sirpanchiq, qor yogʻib, yoʻlni koʻrish qiyin boʻlgani tufayli boshqaruvni yoʻqotib, yoʻlning qarama-qarshi tomoniga chiqib ketgan va qarshi yoʻnalishda harakatlanib kelayotgan Xorazm viloyati fuqarosi Maxsud Jobborovning boshqaruvidagi yuk mashinasiga borib urilgan. Natijada “Neksiya” rusumli avtomashina haydovchisi Bekzod Soburov va uning onasi voqea joyida, turmush oʻrtogʻi, singlisi va kelini esa olgan tan jarohatlari tufayli shifoxonada vafot etishgan.

Shu kuni soat 7-00 lar chamasida Gʻuzor-Buxoro – Nukus – Beynau yoʻlining 699-700- kilometrlari oraligʻida, Qoraoʻzak tumani hududida amudaryolik ikki nafar yigit ketayotgan «Spark» rusumli mashina Ellikqalʼa tumanida yashovchi fuqaro boshqaruvida boʻlgan «Kobalt» rusumli avtomashina bilan toʻqnashishi natijasida ikki yigit halok boʻlgan.

Ishtirokchilar voqea joyidan olingan ikki videolavha bilan tanishtirilgandan soʻng, hodisa muhokamasiga oʻtildi. Albatta, noqulay ob-havo sharoitida harakatlanmaslik, tezlikni meʼyordan oshirmaslik tufayli ana shunday koʻngilsizliklarning oldini olish mumkin edi.

Endi esa afsuslanish bilan vaqtni orqaga qaytarib boʻlmaydi. Faqat barcha ogohlik, oʻta hushyorlik, yoʻl harakati qoidalariga amal qilish tufayli kelgusida buningdek hodisalarning oldini olishi mumkin.

Bu haqda yigʻilishda ishtirok etgan Oʻzbekiston Respublikasi Ichki ishlar vazirligi yoʻl harakati xavfsizligi Bosh boshqarmasi boshligʻi oʻrinbosari, polkovnik Erali Bozorboyev, Qoraqalpogʻiston Respublikasi Ichki ishlar vaziri oʻrinbosarlari, polkovnik Islom Ahmedov, polkovnik Baxitjon Izbosarovlar atroflicha gapirdilar.

Shuningdek, tuman prokurori Javlonbek Muftullayev, Ichki ishlar boʻlimi boshligʻi Ulugʻbek Xudoyberganov, Qilichboy ovul fuqarolar yigʻini raisi Bahrom Qodirov, Yoshlar agentligi tuman boʻlimi boshligʻi Jasur Davletov, mehnat faxriysi Pardagul Oʻrozboyevalar mavzu yuzasidan oʻzlarining fikr-mulohazalarini, yoʻl-transport hodisalarining oldini olish yuzasidan takliflarini bildirdilar.

Yigʻilishda yoʻl transport hodisalari oqibatida fuqarolarning jabrlanishlarining oldini olishga xizmat qiluvchi chora-tadbirlar belgilab olindi.

O.RAJABOVA.