Takroriy ekinlardan moʻl hosil olish yoʻlida

Dehqonchilik ilmi va yerga boʻlgan yuksak eʼtibor yurtimiz qishloq xoʻjaligida ulkan marralarni zabt etishga, eng asosiysi, xalqimiz dasturxonining toʻkinligini taʼminlashga xizmat qilmoqda. Joriy yilda ham Amudaryo tumani gʻallakorlari yer bilan tillashib, kontraktatsiya shartnomalarini ortigʻi bilan bajarishga erishdilar va moʻl xirmon bunyod etdilar. Oʻz navbatida har bir qarich yerdan unumli va oqilona foydalanish maqsadida gʻalladan boʻshagan maydonlarga takroriy ekinlar ekilib, tekis nihol olishga erishildi. Ushbu maydonlarga takroriy ekin sifatida asosan sabzavot, poliz mahsulotlari, mosh va chorva mollari uchun toʻyimli ozuqalar ekilgan.

Tumanning Doʻrman ovuli hududida faoliyat yuritayotgan fermer xoʻjaliklarining 229 gektar, shuningdek, Xolimbeg ovulidagi fermer xoʻjaliklarining 194 gektar gʻalladan boʻshagan maydoniga ham turli xil takroriy ekinlar ekilgan. Bu jarayonda tuman fermerlar kengashi masʼullari ham chetda turmay, takroriy ekin ekkan fermer xoʻjaliklariga tashrif buyurib, dehqonlarga yaqindan koʻmak bermoqdalar. Ular tomonidan yerdan unumli foydalanishning mamlakat oziq-ovqat xavfsizligini taʼminlashdagi oʻrni va fermer xoʻjaliklarining moliyaviy koʻrsatkichlarini, iqtisodiy daromadlarini yaxshilashdagi ahamiyati haqida keng tushunchalar hamda tegishli tavsiyalar berib borilmoqda.

Agrar soha mutaxassislarining taʼkidlashicha, takroriy ekinlarning qishloq xoʻjaligidagi ahamiyati juda katta. Eng avvalo, bu usul yerdan maksimal darajada samarali foydalanish, yaʼni bir maydonning oʻzidan yil davomida kamida 2-marta hosil olish imkonini beradi. Qolaversa, bu jarayon aholini yil davomida yangi, sarxil va sifatli sabzavot, poliz hamda chorva ozuqa mahsulotlari bilan uzluksiz taʼminlash orqali oziq-ovqat xavfsizligini mustahkamlaydi.

Agrotexnik nuqtai nazardan esa, dukkakli ekinlar ekilganda tuproq tarkibi sof azot bilan boyib, uning strukturasi yaxshilanadi va unumdorligi ortadi. Natijada, fermer va dehqon xoʻjaliklari uchun moʻmaygina qoʻshimcha iqtisodiy foyda keltiradi. Odatda, takroriy ekin sifatida vegetatsiya davri nisbatan qisqa boʻlgan va issiqsevar oʻsimliklar tanlanadi. Don va dukkakli ekinlardan mosh, loviya, joʻxori va chorva ozuqasi uchun makkajoʻxori va boshqa ozuqa ekinlari shular jumlasidandir.

Ayni kunlarda yoz mavsumida turli xil hasharotlar va zararkunandalarning faolligi yuqori darajada boʻlgani uchun fermerlar va mutaxassislar tomonidan ekinlarning holati doimiy ravishda nazorat qilinib, kasalliklarga qarshi oʻz vaqtida kimyoviy va biologik ishlov berilmoqda.

Xulosa qilib aytganda, dehqonlarimizning bugungi mashaqqatli mehnati, yerga berilayotgan mehr va toʻgʻri qoʻllanilayotgan agrotexnik tadbirlar kuzga borib yurtimiz bozorlarida toʻkin-sochinlikni taʼminlaydi va iqtisodiyotimizning yanada yuksalishiga xizmat qiladi.