Paxtadan moʻl hosil olinib, yuksak xirmon yaratildi

Qishloq xoʻjaligi sohasidagi tinimsiz mehnat va toʻgʻri tashkil etilgan agrotexnik tadbirlar har doim oʻzining yuksak samarasini berib kelgan. Joriy 2026-yilgi hosil yigʻim-terim mavsumida Amudaryo tumani mirishkorlari ham ana shunday ulkan zafar marrasini zabt etishga muvaffaq boʻldilar. Tumandagi mavjud 337 ta fermer xoʻjaligi tomonidan jami 13000 gektar maydonga chigit qadalib, umumiy hisobda esa 64175 tonna "oq oltin" yetishtirish maqsad qilingan edi. Yerga mehr berish va halol mehnat natijasida fermer xoʻjaliklari va qishloq xoʻjaligi korxonalari kontraktatsiya shartnomasi boʻyicha zimmasiga olgan rejalarni 16-oktyabr kuniyoq ortigʻi bilan, yaʼni 100,4 foizga bajarishga erishdilar. Natijada har bir gektar yerdan olingan hosildorlik 49,5 tsentnerni tashkil etib, jami 64430 tonna paxta xirmoni yaratildi.

Yetishtirilgan mazkur boylikni yogʻin-sochinli kunlarga qoldirmasdan, nes-nobud qilmay va oʻz vaqtida yigʻib-terib olish maqsadida tumanda jami 390 ta maxsus terim otryadi tashkil etildi. Ushbu jarayonda texnika qudrati va inson omili uygʻunligi taʼminlanib, dalalarga 25 ta yuqori unumdorlikka ega boʻlgan paxta terish mashinasi hamda 35800 nafar terimchi jalb qilindi. 

Ahamiyatlisi shundaki, hasharchilarning 7000 nafarini bevosita fermer xoʻjaligi ishchilari tashkil qilgan boʻlsa, qolgan 28800 nafari uyushmagan aholi vakillaridan iborat koʻngilli terimchilardir. Mavsum davomida zamonaviy texnikalar va minglab hasharchilarning uzluksiz mehnati evaziga koʻzlangan hosil toʻliq yigʻishtirib olindi.

Oʻz navbatida, qilingan halol mehnat munosib ragʻbatlantirildi. Xususan, xizmat koʻrsatgan 25 ta paxta terim mashinasi faoliyati uchun tijorat banklari tomonidan 3 mlrd 440 mln soʻm miqdoridagi mablagʻlar toʻlab berilgan boʻlsa, dalada ter toʻkkan 35800 nafar koʻngilli terimchilarning daromadini taʼminlash maqsadida ularga jami 30 mlrd soʻm ish haqi tarqatildi. Bir soʻz bilan aytganda, Amudaryo tumanida 2026-yilgi paxta mavsumi nafaqat yuqori hosildorlik, balki aholining bandligini taʼminlash va ularning moddiy farovonligini oshirish yoʻlidagi muhim iqtisodiy qadam boʻldi.