ОРЗУЛАРИ ОЛАМ ЁШЛАР

Юртимизда ўқувчи-ёшларга, ўсиб келаётган ёш авлод камолотига қаратилаётган эътибор ўзининг ижобий самараларини бериб, иқтидорли, интеллектуал салоҳиятли, санъат, адабиёт, спорт каби турли соҳаларда ўзлигини намоён этаётган ёшлар сафи тобора кўпаймоқда.

Туманимиздаги 82-сонли умумий ўрта таълим мактабида  13 та синфда 343 нафар ўқувчилар таълим-тарбия олишмоқда. 38 нафар олий маълумотли ўқитувчилар уларга фан асосларини пухта ўргатиш билан бир қаторда турли фан, санъат, спорт, амалий санъат тўгаракларига жалб қилиниб, дарсдан бўш вақтларини мазмунли ва мақсадли ўтказишга, иқтидорларини ривожлантиришга ҳаракат қилишаётир.

Мактабда ижодий қобилиятга эга ўқувчилар кўп. Шуларнинг бири 8-синф ўқувчиси Ш.Солиевадир. У барча фанларни яхши ўзлаштириши, одоби билан кўпчиликка ибрат. Шоҳиста бўш вақтларида кўп китоб ўқийди, ўқиган асарлари таассуротларини дугоналари билан ўртоқлашади.

Унинг бу интилишлари туманимиз умумий ўрта таълим мактаблари ўқувчилари орасида шу йил 13 март куни ўтказилган “Мен нечун севаман Ўзбекистонни” мавзуида ўтказилган иншолар танловида ўз самараларини берди. Туман миқёсида фахрли ўринни эгаллади.

– Шоҳиста теран фикрлайдиган, дунёқараши кенг, қобилиятли қиз. Бу дарс машғулотлари жараёнида ҳам сезилиб туради. Шунинг учун уни адабиёт тўгарагига жалб қилганмиз, – дейди унинг она тили ва адабиёт фани ўқитувчиси Ш.Дўсчонова.

Мактабнинг 3-синф ўқувчиси З.Жумабоева спортнинг бадиий гимнастика тури билан шуғулланади. У 4 йил аввал туман Болалар-ўсмирлар спорт мактабида, ҳозирги кунда эса Ёшлар ишлари агентлиги туман бўлими қошида фаолият юритаётган бадиий гимнастика тўгараги раҳбари, тажрибали мураббий М.Бердибоева қўл остида шуғулланмоқда.

Аввало Зуҳрахоннинг мактабда ҳам барча фанларни аъло баҳоларга ўзлаштираётганини алоҳида эътироф этиш даркор. Зуҳра ҳар гал мусобақаларга кетганида дўстлари унга омад тилаб қолишади, қайтгач, мусобақа таассуротларини қизиқиб тинглашади, ютуқларидан қувонишади.

– Ҳар гал турли шаҳарларда ўтказиладиган мусобақаларга кетганида худди ўз боламни кузатгандай бўламан. Мусобақа боришини ҳаяжонланиб сўраб тураман. Ҳар сафар, албатта, Зуҳра мени хушхабар билан қувонтиради, – дейди унинг ўқитувчиси Ю.Юсупова.

Ўқитувчининг қувониб эътироф этишича, синфидаги барча ўқувчилар ҳам қобилиятли, турли тўгаракларга қатнашади. Султонбек Солиев Болалар-ўсмирлар спорт мактабида кураш сир-асрорларининг назарий билимларини ўрганиб, машқлар давомида қобилиятини ривожлантиришга эришмоқда. У яқинда БЎСМ биринчилиги учун ўтказилган мусобақада 32 кг. вазнда фахрли учинчи ўринни, Р.Марксов эса 29 кг. вазн тоифасида учинчи ўринни эгалладилар. Барча синфдошлар Зуҳра, Султонбек, Рамазонлардан ўрнак олишга интилишмоқда.

Дарвоқе, Зуҳра ҳақида: жуда ёқимтой, маъсум, ҳали болаликни тарк этиб улгурмаган бу нозиккина қизнинг бўйнига агар шу кунгача барча мусобақаларда эришган медаллари илиб қўйилса, оғирлик қилар-ов десам, лоф деманг. Жажжи қизалоқнинг ютуқларини санасам, “Кичкина деманг бизни”, деган ибора хаёлингизга келиши тайин.

У вилоятлар, туман миқёсида ўтказилган очиқ биринчиликларда биринчи, Тошкент шаҳрида ўтказилган “Золотые листья” деб номланган мусобақада 1-ўринни эгаллади. Шунингдек, мамлакат очиқ биринчиликларида, халқаро мусобақаларда ҳам муносиб иштирок этиб, фахрли ўринларни эгаллаб келмоқда.

Унинг машғулотларини кузатишнинг ўзи у ҳақдаги таассуротларингизни бойитади. У нозиккина жуссасидаги имкониятларни маҳорат билан намоён этади.

З.Жумабоева ўзи таълим олаётган мактабда Президентимизнинг ёшлар маънавиятини юксалтириш борасидаги илгари сурган бешта муҳим ташаббус ижросини таъминлаш мақсадида ташкил этилган бешта тўгаракнинг  тасвирий санъат тури машғулотларида ҳам иштирок этади. Чор-атрофдаги бошқалар англамаган, ҳис қилмаган гўзалликни идрок этиш, уни ўзига хос тасвирлашга интилиш ва тақдим этиш унга хосдир. Бунингдек интилишлари натижасида у 2020  йилда “Қалбларга муҳрланган инсонлар ёди” мавзусида қўлда чизилган расмлар онлайн танловида фахрли биринчи ўринни эгаллади.

– Қизимизнинг яхши ўқиши, қобилиятини ривожлантириши учун барча шароитларни яратишга интилаяпмиз, – дейди унинг ютуқларидан қувониб онаси Л.Матёқубова.

Кўнглида улкан-улкан режалар жўш ураётган интилувчан ёшларга яна ҳам улкан муваффақиятлар ёр бўлишини тилаб қоламиз.

Ойгул РАЖАБОВА.