“Аширов Қаҳрамон” фермер хўжалиги пахта етиштириш режасини ортиғи билан бажарди

Мамлакатимизда айни кунларда оқ олтин ҳосилини қишнинг совуқ кунларига қолдирмасдан, ўз вақтида йиғиб-териб олиш ишлари қизғин тарзда олиб борилмоқда. Жорий йилда етиштирилган пахта хомашёсини нест-нобуд қилмасдан, уюшқоқлик билан териб олиш бўйича тегишли чоралар амалга оширилмоқда. Пахта-тўқимачилик кластерлари, пахта хомашёси етиштирувчи фермер хўжаликлари ҳосилни қисқа фурсатда йиғиштириб олиш мақсадида зарур ишларни ташкил этишмоқда. Амударё туманида ҳам жорий йилги пахта хомашёсини йиғиб-териб олиш режасини илғорлар сафида бажариш мақсадида пахтакорларимиз уюшқоқлик билан тинимсиз меҳнат қилишмоқда.

Шу ўринда маълумот тариқасида айтиш керакки, жорий йилда туманимиздаги жами 350 та фермер хўжаликлари томонидан 15 минг 30 гектар майдонда 46 минг 550 тонна пахта хомашёсини етиштириш режалаштирилган. Фермер хўжаликларида пахта хомашёсини йиғиб-териб олиш мақсадида жами 290 та терим отрядлари ташкил этилган бўлиб, ушбу ортядларда “оқ олтин”ни ўз вақтида нес-нобуд қилмасдан териб олиш бўйича самарали ишлар олиб борилмоқда.

Маълумки, мамлакатимизда бу йилги пахта йиғим-терими мавсумида қўлда терилган 1 килограмм пахта учун биринчи теримда 1200 сўмдан, иккинчи теримда 1500 сўмдан кам бўлмаган миқдорда меҳнат ҳақи тўлаш белгиланди. Туманимиздаги пахта терувчи 290 та терим отрядларида пахта териш ишларига жалб этилган жами 23 минг 266 нафар теримчилар ўз меҳнатларига яраша ҳақларини ўз вақтларида олишмоқдалар. Ушбу теримчиларнинг 9 минг 283 нафари пахта тўқимачилик клестери ва фермер хўжаликларининг ишчилари бўлиб, 13 минг 983 нафари уюшмаган аҳоли вакилларидан иборат.

Айни кунларда туманимиздаги пахта етиштривчи фермер хўжаликлари орасида белгиланган пахта режасини ортиғи билан бажариб, энг илғорлар сафидан жой олаётган фермерларимиз ҳам анчагина. Хусусан, туман прокурори Жавлон Муфтуллаев раҳбарлик қилаётган 2-сектор ҳудудига кирувчи Қиличбой овулидаги “Аширов Қаҳрамон” фермер хўжалиги раҳбари Қаҳрамон Аширов ана шундай намунали фермерларимиздан биридир.

“Аширов Қаҳрамон” фермер хўжалигида пахта йиғим-терим жараёнларининг самарали ташкил этилиши натижасида пахта режаси ортиғи билан муддатидан олдин бажарилди. 112 нафари уюшмаган аҳоли вакилларидан иборат бўлган жами 200 нафардан ортиқ теримчиларнинг машаққатли меҳнати эвазига ҳар куни 10 тоннадан ортиқ пахта хомашёси териб олинди. Натижада фермер хўжалиги режадаги 45 тонна ўрнига 45,2 тонна пахта топшириб, режани ортиғи билан бажарди.

Терим жараёнида теримчилар учун барча шароитлар яратилган. Дала бошида иссиқ овқат берилмоқда. Теримчилар ўз ҳақларини белгиланган миқдорда ўз вақтида олганликлари уларда теримга бўлган иштиёқни янада оширмоқда.

Айтиш керакки, пахта хомашёсини йиғиб-териб олиш ишларига, асосан, ишсиз ҳамда вақтинчалик банд бўлмаган аҳоли вакилларининг жалб қилиниши натижасида уларнинг бандлиги таъминланиб, даромад топишларига шароит яратилмоқда.

Туман ҳокимлигининг Ахборот хизмати.