33-СОНЛИ МАКТАБДА БОШЛАНҒИЧ СИНФЛАР ЎҚУВЧИЛАРИНИ СОҒЛОМ ОВҚАТЛАНТИРИШ МАВЗУСИДА ЙИҒИЛИШ БЎЛИБ ЎТДИ

Ўзбекистон Республикаси Президентининг 2022 йил 28 январдаги “2022-2026 йилларга мўлжалланган Янги Ўзбекистоннинг тараққиёт стратегияси тўғрисида”ги Фармони ижроси юзасидан Қорақалпоғистон Республикаси ва Хоразм вилоятининг бошланғич синф ўқувчиларини босқичма-босқич бепул овқат билан таъминлаш тизимини йўлга қўйиш белгилаб берилган эди. Бу ҳақда Ўзбекистон Республикаси Вазирлар Маҳкамасининг 2022 йил 9 февралдаги “Қорақалпоғистон Республикаси ва Хоразм вилоятидаги умумий ўрта таълим муассасаларида бошланғич синф ўқувчиларини озиқ-овқат билан таъминлашни сифатли ташкил этиш чора-тадбирлари тўғрисида”ги қарори қабул қилиниб, бошланғич синф ўқувчиларига бепул енгил нонушта маҳсулотлари тарқатиш йўлга қўйилган эди.

Жорий ўқув йилида Қорақалпоғистон Республикаси Вазирлар Кенгашида тузилган ишчи гуруҳ томонидан ўтказилган танловда ғолиб бўлган 3 та тадбиркорлик субъектлари томонидан тумандаги 55 та мактабнинг бошланғич синф ўқувчиларига енгил нонушта маҳсулотлари тарқатилмоқда. Яқин кунларда мавжуд 85 та мактабларнинг 14 минг 650 нафардан ортиқ бошланғич синф ўқувчилари кейтеринг ташкилотлари томонидан бепул озиқ-овқат маҳсулотлари билан таъминланади.

Амударё туманидаги 33-сонли мактабда Ўзбекистон Республикаси Вазирлар Маҳкамасининг 2022 йил 9 февралдаги “Қорақалпоғистон Республикаси ва Хоразм вилоятидаги умумий ўрта таълим муассасаларида бошланғич синф ўқувчиларини озиқ-овқат билан таъминлашни сифатли ташкил этиш чора-тадбирлари тўғрисида”ги Қарорида белгиланган вазифаларнинг ижросини таъминлаш масаласи муҳокамасига бағишланган йиғилиш бўлиб ўтди.

Йиғилишда туман ҳокими Султонбой Йўлдашев, Қорақалпоғистон Республикаси Жўқорғи Кенгеси қўмита раиси Дауитбай Қурбониёзов, Қорақалпоғистон Республикаси Вазирлар Кенгаши Раиси ўринбосари Абат Данияров, туман ҳокими ўринбосари Маҳмуд Шерметов, туманда Ички ишлар бўлими, тиббиёт муассасалари бошлиқлари, аутсорсинг асосида озиқ-овқат маҳсулотларини етказиб берувчи тадбиркорлар, овул фуқаролар йиғини масъуллари, мактаб ўқитувчилари, ота-оналар вакиллари қатнашдилар.

Йиғилишни туман ҳокими Султонбой Йўлдашев очди ҳамда иштирокчиларни кун тартибидаги масала билан таништирди. У ўз сўзида бугунги кунда тумандаги 55 та мактабда бошланғич синф ўқувчиларини сифатли ва соғлом овқатлантириш бўйича енгил нонушта маҳсулотлари тарқатилаётганлиги, яқин кунларда барча 85 та мактабларнинг бошланғич синф ўқувчилари ҳам кейтеринг ташкилотлари томонидан бепул озиқ-овқат билан таъминланишини айтиб ўтди.

Бунинг учун кейтеринг ташкилотини танлаб олиш Ўзбекистон Республикаси Халқ таълими вазирлиги томонидан тасдиқланган, техник талабларга кўра Ўзбекистон Республикасининг “Давлат харидлари тўғрисида”ги Қонунига мувофиқ Қорақалпоғистон Республикаси Вазирлар Кенгашининг ишчи гуруҳ комиссияси тендер ўтказиш чора-тадбирлари кўрилаётганлигини маълум қилди.

Кун тартибидаги масала бўйича Қорақалпоғистон Республикаси Жўқорғи Кенгеси қўмита раиси Даутбай Қурбониёзов, Қорақалпоғистон Республикаси Вазирлар Кенгаши Раиси ўринбосари Абат Данияровлар ўз фикрларини билдириб, мактабларнинг бошланғич синфлари ўқувчиларига озиқ-овқат маҳсулотлари масъул вазирликлар келишуви асосида тасдиқланган таомномага мувофиқ берилаётганлиги, бунда маҳсулотнинг ўқувчилар саломатлиги учун фойдали, витаминларга бой бўлишига эътибор қаратилганлигини таъкидладилар ва бу борада ота-оналар ва кенг жамоатчиликнинг ҳам фикрлари сўралди.

Шунингдек, йиғилишда туман Тиббиёт бирлашмаси бошлиғи Фахриддин Абдуллаев, санитария-эпидемиологик осойишталик ва жамоат саломатлиги бўлими бошлиғи Гулмурод Бекиев, 33-сонли мактаб директори Ҳанифа Яхшимовалар сўзга чиқиб, ўқувчиларга озиқ-овқат маҳсулотлари ҳар куни сифатли етказиб берилаётганлигини билдирдилар.

Йиғилишда муҳокама этилган масала юзасидан тегишли қарорлар қабул қилинди.

Ойгул РАЖАБОВА.