Қипчоқ давлат ўрмон хўжалиги тасарруфидаги 16 минг 545 гектар ер майдонларидан самарали фойдаланилмоқда

Қипчоқ давлат ўрмон хўжалигининг умумий ер майдони 16 минг 545 гектар бўлиб, шундан ўрмон билан қопланган майдонлар 5 минг 167 гектар, туташмаган ўрмонзорлар 855 гектар, ўрмон кўчатхоналари 20,5 гектар, тақир ерлар 6,8 гектар, хайдаладиган ерлар 24,5 гектар, яйловлар 689,9 гектар, сувли ерлар 2,4 гектар, йўллар 10 гектар, қумликлар 1 минг 894 гектар, бошқа ерлар эса 8 минг 729 гектардан зиёдни ташкил қилади.

Жорий йилда хўжаликда маданий ўрмон барпо қилиш, уруғчилик, кўчатчилик бўйича уруғ тайёрлаш йиллик режаси 3 минг 900 кг. Қилиб белгиланган бўлиб, ҳозирги кунгача жами 7 минг 660 кг. уруғлар тайёрланди. Шундан 7000 кг. саксовул уруғлари терилиб, орол денгизининг қуриган тубида ва туман қумли ҳудудларида уруғдан ўрмон барпо этиш учун сепилди. Қайрағоч, тут, ясен, клён, шарқ туяси, шафтоли, ўрик уруғлари тайёрланиб, кўчатхоналарга экилди.

Бу йил кўчатдан, уруғдан 175 гектар маданий ўрмон барпо қилиш белгиланган бўлиб, ҳозирги кунга 70 гектардаги қумли ҳудудларга саксовул уруғлари, бундан ташқари 4 гектарга ясен, клён, каталпа ва оқтерак кўчатлари экилди. Орол денгизининг қуриган тубида 2000 гектар майдонда ўрмон барпо этиш учун уруғ сепилди.

Шунингдек 11,35 гектар майдонда 1 млн. 50 минг дона ниҳол ва кўчатлар экилди. Булардан ташқари хўжаликда доривор ва озуқабоп ўсимликлар уруғларини тайёрлаш ва экишга ҳам эътибор қаратилмоқда. Шу кунгача 28 гектар майдонга доривор ўсимликлар экилди.

 Қўшимча тармоқларни ривожлантириш бўйича асалалари уялари сони 185 тага етказилди ва 750 кг. асал олинди. Паррандалар бош сони хусусий субъектлар билан бирга 1 минг 512 тага, қорамоллар сони эса 95 бошга етказилди.

Хўжаликда ерлардан самарали фойдаланиш мақсадида 2022 йилда 15 гектар майдонда қишлоқ хўжалиги экинлари экилди. Булар озуқабоп экинлар, буғдой, шоли ва бошқа экинлар бўлиб ҳосили йиғиб олинди.

Туманимизнинг "Оқ олтин" ва "Амир Темур" номли овуллар ҳудудига 2022 йилда жами янгидан 20 гектар майдонга тут кўчатлари экилди. Ушбу экилган иҳотазорлар суғориладиган ерларнинг мелиоратив ҳолатини яхшилаб, гармселдан ҳимоя қилади ва ҳосилдорлигини кўтаришга хизмат қилади.

Бундан ташқари ички туризмни ривожлантириш мақсадида ўрмон фонди ҳудудида “Соҳил бўйи” дам олиш маскани ташкил этилди. Бу ерда аҳолининг оилавий дам олишлари учун ўтовлар, чўмилиш ҳавзаси, қайиқ ва чўмилиш анжомлари, қумли майдон мавжуд.

Ўрмонлар умумхалқ бойлиги. Улар давлат муҳофазасида бўлиб, ўрмонларни асраш, келажак авлодларга янада бойитилган ҳолда етказиш барчамизнинг вазифамиздир. Бироқ ҳудудга ўзбошимчалик билан кириш, ов қилиш, дарахтларни топиш, чорва молларини боқиш каби ҳолатлар ҳам баъзида учраб туради. Булар бўйича жорий йилнинг ўтган даврида 12 та ҳолатда қонунбузилиш ҳолатлари аниқланиб, тегишли маъмурий органлар томонидан чоралар кўрилди.

Бунингдек ҳолатлар такрорланмаслиги учун хўжалик билан чегарадош ҳудудларда тушунтириш-тарғибот тадбирлари ўтказилмоқда. Чунки, бугунгидек экологик оғир вазиятдан бизни фақат она тибатга бўлган оқилона муносабатимизгина қутқара олади.

Эркинбой Тўраев, “Қипчоқ” давлат ўрмон хўжалиги раиси.