1-СОНЛИ МАКТАБДА ХОРИЖИЙ ТИЛЛАР ФАН ОЙЛИГИ ЯКУНИГА БАҒИШЛАНГАН ТАДБИР ЎТКАЗИЛДИ
Ноябрь ойининг охирги ҳафтасида умумтаълим мактабларида ўтказилган хорижий тиллар фан ойлиги доирасидаги тадбирлар умумлаштирилиб, ушбу тадбирларнинг ўқувчи-ёшлар билим ва иқтидорларини ривожлантиришдаги аҳамияти хорижий тиллар услуббирлашмаси аъзолари томонидан алоҳида эътироф этилди.
Бу борада Амударё тумани халқ таълими бўлимига қарашли 1-сонли умумтаълим мактабининг хорижий тиллар услуббирлашмаси аъзолари ҳам сезиларли ютуқларга эришдилар. Хусусан, фан ойлиги давомида мактабнинг фаол ўқитувчилари Муҳаббат Худойберганова, Зевар Атажанова, Фариза Ражабова, Муҳаммаджон Мадаминовлар ўзаро ҳамкорлик асосида иш юритишиб, ноябрь ойининг ҳар бир ҳафтасида мавзулаштирилган очиқ дарслар, синфлараро ва ҳар бир синфда гуруҳлараро қизиқарли савол-жавоб кечалари, заковат ўйинлари, топишмоқлар, тез айтишлар, шеърий баҳслашувлар ташкил этишиб, ўқувчиларнинг хорижий тилларни ўрганишга бўлган иштиёқ ва иқтидорларини рағбатлантириб бордилар.
Бу тадбирларда ўқувчилар бир-бирлари билан инглиз тилида мулоқотлар олиб бордилар, инглизча шеърлар айтиб, ашула ва рақслар ижро этдилар. Инглиз адабиёти намоёндаларининг асарлари қаҳрамонлари ҳақида ҳикоя қилишиб, жонажон Ўзбекистонимиз ҳақидаги ғурур ва ифтихор туйғуларини инглиз тилида ифодалаб бердилар.
Фан ойлигининг сўнгги ҳафтаси янада қизиқарли таассуротларга бой бўлди. Ўқувчилар янги ўқув йилининг 1-чорагида инглиз тилидан олган билим ва кўникмаларини саҳна кўринишлари, инглиз тилида ўзлари ёзган иншо ва баёнлар орқали намойиш этдилар.
Шунингдек, фан ойлиги давомида 18 ноябрь – Ўзбекистон Республикаси байроғи қабул қилинган кун муносабати билан алоҳида тадбир ўтказилиб, ўқувчилар Ўзбекистон байроғи қабул қилиниш тарихи ва байроқ рангларининг рамзий маънолари ҳақида инглиз тилида ўз фикрларини баён қилишиб, сана муносабати билан шеърлар айтдилар ва мустақилликни мадҳ этувчи ашулаларни инглиз тилида ижро этдилар.
Фан ойлигининг якуний тадбирида 7-синф ўқувчилари ўртасида “Happy english” мавзусида беллашув ўтказилди. Унда ўқувчилар 2022-2023 ўқув йилида жорий этилган янги инглиз тили дарслиги орқали ўқув йилининг 1-чорагида олган билимлари, янги намунадаги дарсликнинг афзаллик томонлари ҳақида фикр юритишиб, ўзларининг хорижий тилларни ўрганиш жараёнида эришаётган ютуқлари хусусида инглизча мулоқот ташкил этишди. Шу орқали ўқувчи ўқувчининг билимини синовдан ўтказиб, бири-биридан ўрганиш ва бири-бирига ўргатиш, яъни ўрган ва ўрган тамойилини амалда намойиш этдилар.
Фан ойлигининг умумлаштирилган якуний тадбири ўқувчиларнинг биринчи чораклик даврида эгаллаган билим ва салоҳиятларини шаффофлик асосида баҳолаш имконини берди ва бу хорижий тиллар ўқитувчилари учун бир-бирларининг тажрибаларини ўрганиш ҳамда амалиётда қўллаш имконини яратди.
Хорижий тиллар фан ойлигининг якунига бағишланган тадбир якунида ойлик доирасидаги тадбирларда фаол иштирок этган ўқувчилар мактаб маъмурияти томонидан фахрий ёриқлар ва эсдалик совғалари билан тақдирландилар.
Робия Йўлдошева.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
