ЧАҚИРУВГА ҚАДАР БОШЛАНҒИЧ ТАЙЁРГАРЛИК ФАНИ ЎҚИТУВЧИЛАРИ ЎРТАСИДА ТЕННИС МУСОБАҚАСИ ЎТКАЗИЛДИ

5 декабрь куни Амударё туманидаги 16-сонли ихтисослаштирилган давлат умумтаълим мактабида туман халқ таълими бўлими тасарруфидаги таълим муассасаларининг чақирувга қадар бошланғич тайёргарлик фани ўқитувчилари иштирокида Ўзбекистон Республикаси Конституцияси қабул қилинганининг 30 йиллиги муносабати билан чақирувга қадар бошланғич тайёргарлик фани ўқитувчиларининг жисмоний имкониятлари, билим ва салоҳиятларини синовдан ўтказишга бағишланган тадбир ўтказилди. Унда Амударё тумани Мудофаа ишлари бўлими бошлиғи, подполковник Шерзод Муродов, Мудофаа ишлари бўлими бошлиғининг тарбиявий ва мафкуравий ишлар бўйича ўринбосари Зокиржон Саъдуллаевлар иштирок этишди.

Тадбирда замонавий чақирувга қадар бошланғич тайёргарлик фани ўқитувчиларига қўйиладиган талаблар ҳақида Амударё тумани Мудофаа ишлари бўлими бошлиғи, подполковник Шерзод Муродов батафсил сўз юритди ва барчани 8 декабрь – Ўзбекистон Республикаси Конституцияси қабул қилинганининг 30 йиллиги билан самимий табриклади.

Шундан сўнг, тадбирда иштирок этаётган ўқитувчиларнинг билим ва жисмоний имкониятлари, иродаси ва кучини синовдан ўтказиш мақсадида улар ўртасида спортнинг теннис тури бўйича мусобақа ташкил этилди. Қизғин ва қизиқарли баҳслар асосида ўтказилган теннис мусобақасида туман Халқ таълими бўлими тасарруфидаги деярли барча умумтаълим мактабларининг чақирувга қадар бошланғич тайёргарлик фани ўқитувчилари фаол иштирок этдилар.

Маълумки, ҳарбий ватанпарварлик тарбияси умумий тарбиянинг таркибий қисми бўлиб, ёшларда Ватанни фидокорона ҳимоя қилишга тайёрлик ва бунга қодирликни шакллантиришга йўналтирилган. Унинг маънавий-маърифий ва назарий асоси эса Ватанни ҳимоя қилиш тўғрисидаги тегишли илм-фан соҳаларини пухта ўзлаштириш, шу билан бирга аждодларимизнинг тарихий ва замонавий амалий тажрибалари, илмий мероси ҳамда ҳарбий ватанпарварлик тарбияси билан боғлиқ умуминсоний қадриятлар ва замонавий қатъий талабларга узвий амал қилишдан иборатдир.

Ушбу ўта муҳим вазифани амалга оширишнинг илк босқичи – ёшларда мафкуравий иммунитетни кучайтириш, уларни турли ёт ғоя ва таҳдидлардан асраш, ўз мустақил фикрига эга, иродали, фидойи ва ватанпарвар инсонлар этиб тарбиялаш вазифаси умумтаълим мактабларининг чақириққа қадар бўлган ёшларни тайёрлаш фани ўқитувчилари зиммасига юклатилган. Чунки Президентимиз таъкидлаганларидек: “тарбия ва таълимни бир-биридан алоҳида ажратиб бўлмайди, бу икки жараён ўзаро уйғун, узлуксиз асосда ташкил этилгандагина одобли, юксак маънавиятли, билимдон, зукко, руҳан ва жисмонан соғлом, кенг дунёқараш, тафаккур ва замонавий касб-ҳунар эгаси бўлган ёшлар” айнан ана шу – чақириққа қадар бўлган ёшларни тайёрлаш бўйича фан ўқитувчилари таълим-тарбияси туфайли чиниқиб борадилар. Албатта, бундай зукко ёшларни чақириққа қадар тайёрлашда ушбу фан ўқитувчиларининг ўзлари жисмонан кучли, иродали ва маънавиятли, билимдон мутахассислар бўлмоғи жоиз.

Мусобақа якунида энг чиройли ўйин кўрсатган иштирокчи, энг яхши ракетка устаси, энг кучли ва иродали спортчи, энг билимдон ва зукко чақирувга қадар бошланғич тайёргарлик фани ўқитувчиси йўналишлари бўйича ғолибларга тадбир ташкилотчилари томонидан совғалар берилди.

Мазкур маънавий-маърифий тадбир умумтаълим мактабларининг чақирувга қадар бошланғич тайёргарлик фани ўқитувчиларини ўз соҳалари бўйича янада фаол ва билимдон бўлиш сари илҳомлантиргани билан муҳим аҳамият касб этди.

Робия ЙЎЛДОШЕВА.