ЮРТ ҲИМОЯСИГА МУНОСИБ ЁШЛАР ТАРБИЯЛАЁТГАН УСТОЗ

Ёшларни ватанпарварлик руҳида тарбиялаш, юрт ҳимоясига, унинг хавфсизлиги, ҳудудий яхлитлиги ва мустақиллигини таъминлашга доимо шай туришлари учун улар қалбида шу заминга муҳаббат ва садоқат туйғуларини мустаҳкамлаш муҳим аҳамиятга эга. Шу боис кейинги йилларда умумтаълим муассасаларида чақирувга қадар бошланғич тайёргарлик фани ўқув жараёнларини янада такомиллаштириш, моддий-техник базасини мустаҳкамлаш, шунингдек, кадрлар билан таъминлаш масалаларига алоҳида эътибор қаратилмоқда.

Амударё туманининг Торёп маҳалласидаги 51-сонли мактабнинг ҳарбий чақириққа тайёргарлик раҳбари, истеъфодаги ҳарбий офицер Давронбек Давлетмуродов айни пайтда ёшларга ҳарбий таълим ҳақида бошланғич билимларни бериб келмоқда.

Мактабга 2021 йилдан ишга келган Давронбек ёшларни ватанпарварлик руҳида тарбиялаш, бошланғич ҳарбий таълимни ўргатиш ишларига бор куч ва билимларини сарфлаб, ўзининг фидойилигини кўрсатмоқда. У дастлаб мактабда ажратилган алоҳида хонани машғулотлар сифатли ташкил қилиниши учун зарур кўргазмали воситалар билан жиҳозланишига эътибор қаратди. Газниқоб, махсус ҳарбий кийимлар, қурол-аслаҳалар макетлари каби зарур кўргазмали воситаларни келтирди. Синфда хотира бурчагини ташкил қилди ва унда Ватанимиз сарҳадлари дахлсизлигини таъминлашда ҳалок бўлганлар тўғрисида фотолавҳа ва маълумотлар жойлаштирди.

Машғулотлар сифатини ошириш, жумладан, ёшларда ҳарбийликка ҳавасни кучайтириш мақсадида тумандаги ҳарбий қисмлар ва Мудофаа бўлими билан ҳамкорликни йўлга қўйиб, ҳарбийлар билан ўқувчи-ёшларнинг учрашувларини ҳам ташкил қилиб келаётган мактабнинг чақириққа тайёргарлик раҳбари ўзининг ҳарбий хизмат мобайнидаги тажрибаларидан унумли фойдалниб келмоқда.

Давронбек 2000-2004 йилларда Тошкент олий умумқўшин қўмондонлик билим юрти курсанти бўлди. Ўқишни тугатганидан сўнг, 2006 йилдан Навоий вилоятидаги ҳарбий қисмда маълумотларни қайта ишлаш йўналиш бошлиғи бўлиб хизматини бошлади. Кейинчалик Сирдарё вилоятидаги ҳарбий қисмда сафарбарлик чақирув резерви батальони взвод командири, шунингдек, Жиззах, Самарқанд, Андижон, Наманган, Бухоро вилоятлари, Термиз шаҳридаги ҳарбий қисмларда кадрлар бўлинмаси бошлиғи вазифаларида хизмат қилди.

Хизмат даври мобайнида “Мустақилликнинг 20 йиллиги” ва “Мустақилликнинг 25 йиллиги” кўкрак нишонлари билан тақдирланди. Ундан ташқари, ватанпарвар ҳарбийга бир неча бор Ўзбекистон Республикаси Мудофаа вазирлигининг фахрий ёрлиқ ва миннатдорчилик хатлари ҳам топширилди. Отаси Хўжамурод ака ва онаси Ўрозгул опаларга ҳам 2018 йилда Жанубий-Ғарбий махсус ҳарбий округи қўмондонининг ташаккурномаси берилди.

Ҳарбий соҳада самарали хизмат қилиб, истеъфога чиққан Давронбек туман Мудофаа бўлими томонидан ёш авлод таълим-тарбиясига ҳисса қўшишга жалб этилганидан сўнг, ўз билим ва тажрибаларини ўқувчиларга ўргатишни шараф деб билди.

Тажрибали ҳарбий айни пайтда ўзи фаолият кўрсатаётган мактабда назарий ва амалий машғулотлар ташкил этиш билан бирга “Ёш қутқарувчи”, “Темурбеклар” сингари танловларни ҳам ўтказиш орқали ўқувчилар эгаллаётган билимлар синовдан ўтказиб бормоқда.

Ҳарбий хизматчилар ҳаёти билан яқиндан таништириш мақсадида тумандаги ҳарбий қисмларда ўтказиладиган очиқ эшиклар куни тадбирларида ҳам мактаб ўқувчиларининг иштирокини таъминлаб, улар қалбидаги юртга муҳаббат ва бурчга садоқат туйғуларини мустаҳкамламоқда. Ўқувчилар ҳам чақириққа қадар бошланғич тайёргарлик кўникмаларини шакллантираётган, ҳарбийликка қизиқишларини ошираётган, қалбларидаги ватанпарварлик туйғуларини янада мустаҳкамлаётган устозларидан жуда миннатдор.

Мамлакат келажагини яратишда шижоатли, қатъий, мақсадни аниқ қўйиб, шу асосда ҳаракат қиладиган ёшларнинг ўрни катта. Шу сабабли 51-сонли мактабнинг ҳарбий чақириққа тайёргарлик раҳбари Давронбек Давлетмуродов ёш авлодни юрт ҳимоясига муносиб, мард ва жасур, ҳақиқий ватанпарвар бўлиб камолга етишларига ҳисса қўшиб, уларга ҳарбийликка доир билимларни мукаммал ўргатишга ҳаракат қилмоқда.

Озода Худойберганова.