ҲАМ ВАТАНПАРВАР, ҲАМ ОИЛАПАРВАР ҲАРБИЙ

Ҳаётида бир бора ҳарбий либос кийишни орзу қилмаган йигит бўлмаса керак. Чунки бекорга болажон халқимиз оилада ўғил туғилса, бир-бирларини: “аскар муборак бўлсин!” дея қутламайдилар. Шунинг учун ҳам ўғли бор отанинг кўкраги баланд, юзи ёруғ. Боиси, у она Ватаннинг бўлғуси ҳимоячиси – аскарнинг отаси!

Шерзод Атоев оилада кенжа фарзанд. Уч нафар ўғилнинг отаси бўлган дадаси Мўъмин Атоев ва онаси Рўзика Собирова уч ўғилни уч метин қўрғоним, деб вояга етказдилар. Ўғиллари ҳаётдан ўз ўринларини топиб, касб-у корли бўлганларида, оила қуриб, олди-орти невараларга тўлганида, уч ўғлон ҳақиқатан ҳам уч метин қўрғон каби суянч бўлганида кўнгиллари тўлиб, шукроналар айтишди.

Айниқса, кенжа ўғил Шерзоджоннинг танловидан ота-она сифатида фахрландилар. Умумтаълим мактабини муваффақиятли тамомлаган Шерзод Атоев Урганч Давлат Университетининг тарих факультетида, миллий истиқлол ғояси, ҳуқуқ ва маънавият асослари йўналиши бўйича таҳсил олди.

Болалигидан ҳарбий соҳага қизиқиши юқори бўлган Шерзод 2015 йилдан Давлат хавфсизлик хизмати чегара қўшинлари сафида илк ҳарбий фаолиятини бошлади. У қаерда, қайси ҳарбий қисмда фаолият юритишидан қатъий назар, муддатли ҳарбий хизмат бурчини ўтаётган ёшлар билан ишлашиш, уларни турли мафкуравий хуружлардан ҳимоя қилиш, ёш аскарлар онгига ҳарбий ватанпарварлик туйғуларини сингдиришга интилди.

Аскарларнинг бўш вақтларини мазмунли ўтказишлари учун турли хил заковат ўйинлари, китобхонлик кечаларини ташкил этиш, мамлакатимизда ва хорижда рўй бераётган ижтимоий-сиёсий, мафкуравий жараёнлар хусусида аниқ ва пухта маълумотлар бериш орқали ёш аскарларнинг маънавий иммунитетини оширишга хизмат қилувчи назарий ва амалий машғулотлар олиб борди.

Шерзод Атоев 2015 йилдан Давлат хавфсизлик хизмати чегара қўшинлари қўмондонлигининг йўлланмаси билан Амударё тумани ҳудудидаги чегара қўшинлари сафида ўз хизмат вазифасини давом эттириб келмоқда. У қисм командирининг тарбиявий ва мафкуравий ишлар бўйича ўринбосари сифатида деярли ҳар куни аскарлар билан бирга. Чунки Ўзбекистоннинг турли ҳудудларидан келиб, ўз хизмат бурчини адо этаётган ёш аскарларнинг ҳар бирининг хулқ-атвори ҳар хил.

Бири-бирини такрорламайдиган турли фикр ва дунёқарашга эга ёш аскарларни бир мақсад – она Ватан тинчлиги ва осойишталиги йўлида сидқидилдан хизмат қилиш йўлида бирлаштириш, Ватанпарварлик, халқпарварлик руҳида, нафақат жисмонан, балки ақлан етук, кучли ва салоҳиятли қилиб тарбиялаш осон эмас. Буни яхши ҳис қилган Шерзод Атоев ҳар бир тарбиявий тадбирнинг муваффақиятли ўтиши, ёш аскарларнинг фаол иштирокини таъминлаш мақсадида энг замонавий, интерфаол усулларни қўллаган ҳолда машғулотлар олиб боришга ҳаракат қилади. Боиси, давлат чегарасини қўриқлаётган аскарнинг масъулиятни нечоғлик ҳис этиши, жуда кўп жиҳатдан қисм командирининг тарбиявий ва мафкуравий ишлар бўйича ўринбосари Шерзод Атоевнинг фаолиятига боғлиқ. Шерзод Атоев эса ўз вазифасини муваффақиятли адо этиш учун ўқиб-ўрганишдан, изланишдан асло чарчамайди.

Ҳарбий зобит учун иккита оила бор – бири она Ватани бўлса, яна бири – севимли рафиқаси ва фарзандлари. Бу томондан Шерзод Атоевнинг ҳамиша кўнгли тўқ. Умр йўлдоши Нодира Ёқубованинг тадбирли уй бекаси, меҳрибон она ва садоқатли рафиқа сифатидаги ўрни ғоят эътиборли. Доимий равишда иш билан банд бўладиган Шерзоднинг хотиржам ишлашидан ташқари, хизмат вазифасини мазмунли ўтказиши учун зарур шароит яратишга ҳаракат қилгани боис, оилада барча ишлар жойила. Икки нафар фарзандининг тарбияси, оиланинг саранжом-саришталиги, қўни-қўшнилари билан муомаласи, борди-келдилари ҳавасга муносиб.

Биз ижодий гуруҳимиз билан 14 январь – Ватан ҳимоячилари куни арафасида Шерзод Атоев ва Нодира Ёқубовалар оиласида бўлиб, она Ватан сарҳадларида собит аскарлар ва уларга маънавий рағбат, маънавий руҳ, билим ва салоҳият улашаётган Шерзод Атоевни, давлат хавфсизлик хизмати чегара қўшинлари аскарлари, ҳарбий зобитлар, шу баробарида уларнинг оила аъзоларини ҳам байрам билан муборакбод этдик.

Робия ЙЎЛДОШЕВА, Равшон БАҲРОМОВ, М.ШОМУРОДОВ олган сурат.