Грипп ва ўткир респиратор инфекцияларнинг олдини олишга бағишланган тарғибот тадбирлари олиб борилмоқда
Санитария-эпидемиологик осойишталикни таъминлаш, ҳудудга юқумли инфекциялар кириб келиши, тарқалишининг олдини олиш мақсадида Амударё тумани Санитария-эпидемиологик осойишталик ва жамоат саломатлиги бўлими томонидан қатор чора-тадбирлар амалга оширилиб келинмоқда.
Шунингдек, Соғлиқни сақлаш вазирлигининг 2022 йил 19 сентябдаги “Республикада COVID-19 пандемияси даврида грипп ва ўткир респиратор инфекциялар бўйича 2022-2023 йиллар мавсумида халқ орасида эпидемиологик асойишталикни таъминлаш юзасидан амалга ошириладиган чора-тадбирлар ҳақида”ги буйруғи ижросини таъминлаш мақсадида ҳам Амударё тумани Санитария-эпидемиологик осойишталик ва жамоат саломатлиги бўлими қошида туманда грипп ва ўткир респиратор инфекцияларнинг аҳоли ўртасида эпидемия тарзида тарқалиб кетишининг олдини олиш бўйича штаб ташкил қилиниб, улар томонидан эпидемиологик вазиятнинг ривожланиши бўйича кундалик мониторинг юритилмоқда.
Ундан ташқари, бўлим томонидан барча даволаш-профилактика муссасаларида ва эпидемиологик аҳамиятга эга бўлган бошқа обьектларда профилактик, чеклов ва эпидемияга қарши чора-тадбирларнинг амалга оширилиши бўйича ўрнатилган тартибда назорат йўлга қўйилиб, грипп касаллиги тарқалишининг олдини олиш бўйича турли учрашувлар, давра суҳбатлари ўтказилиб келинмоқда.
25 январь куни Амударё туманининг Гулзор маҳалласи ҳудудидаги 40-сонли мактабгача таълим ташкилотида ҳам мана шундай учрашув ўтказилиб, ходимлар учун тушунтириш-тарғибот ишлари олиб борилди.
Бўлимнинг олий тоифали эпидемиолог врачи Мирзабек Аманкулов Амударё тумани Санитария-эпидемиологик осойишталик ва жамоат саломатлиги бўлими томонидан 2022-2023 йиллар мавсуми олдидан грипп касаллигига қарши эмланиши лозим бўлган контингентлар аниқланиб, грипп касаллигига қарши 16 минг 918 доза профилактик вакцина олиб келинганини, вакциналар туман тиббиёт бирлашмасига қарашли барча кўп тармоқли марказий поликлиникалар, оилавий поликлиникалар, оилавий шифокорлик пунктларига тарқатилганини таъкидлаб ўтди. Ушбу вакциналар билан 4 минг 147 нафар мактаб ўқитувчилари, 1300 нафар мактабгача таълим ташкилотлари тарбиячилари, 1886 нафар тиббиёт ходимлари, 9585 нафар давлат мактабгача таълим ташкилотларида тарбияланувчи болалар грипп касаллигига қарши тўлиқ эмланган.
Шунингдек, грипп ва ўткир респиратор инфекцияси касалликларига гумон қилинган беморлар аниқланганда, уларга даволаш-профилактика муассасалари томонидан малакали тиббий ёрдамлар кўрсатилиб, тез ёрдам хизмати узлуксиз равишда хизмат кўрсатаётгани, дори-дармонлар ва вирусга карши препаратлар заҳираси яратилгани таъкидланди.
Қолаверса, ходимлар грипп вирусини юқтирган одамда кузатиладиган ҳолатлар билан ҳам таништирилди. Қайд этилганидек, касаллик тўсатдан бошланганда ҳарорат 38-40 даражагача кўтарилади, қувватсизлик, бош оғриши ва мушакларда, кўз олмаларини босганда ва улар ҳаракатланганда оғриқлар, томоқ қуриши ва қичиши, бурун битиши ва қуруқ йўтал кузатилади.
Олий тоифали шифокор Мирзабек Аманкулов касаллик юққандан кейин уй шароитида даволаниш бўйича риоя қилиниши лозим бўлган қоидалар хусусида ҳам маълумот берди.
Касаллик юқса, уйда қолиб, ётоқ тартибига риоя қилиш ва ҳудудий шифокорни уйга чақириш лозим. Шахсий гигиена қоидаларига риоя қилиш, қўлларни тез-тез совунлаб ювиш, хонани мунтазам шамоллатиб туриш, шахсий сочиқ ва идишлардан фойдаланиш ҳамда кўпроқ суюқлик ичиш зарурлиги таъкидланди.
Мактабгача таълим ташкилоти ходимлари олий тоифали шифокорга ўзларини қизиқтирган саволлар билан мурожаат қилиб, тегишли жавоблар олишди.
Туман ҳокимлигининг Ахборот хизмати
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
