Маънавият ва маърифат мактаб остонасида ривожланади

Ўзбекистон Республикаси Олий Мажлиси ҳузуридаги Нодавлат нотижорат ташкилотларни ва фуқаролик жамиятининг бошқа институтларини қўллаб-қувватлаш Жамоат фонди томонидан молиялаштирилган Амударё телевидениеси таҳририятининг “Юксак маънавиятли ва аҳлоқли ёшлар − келажак пойдевори” номли грант лойиҳаси доирасида ҳудудлардаги маънавий ва маърифий ишлар яхши йўлга қўйилган мактаблар фаолияти кенг ёритиб борилмоқда.

Амударё туманининг Тош ёп овули ҳудудида жойлашган 76-сонли мактаб ҳам тумандаги намунали мактаблардан бири ҳисобланади. Бугунги кунда умумтаълим мактабда 621 нафар ўқувчига 56 нафар ўқитувчи таълим-тарбия бериб келмоқда.

Ўқитувчиларнинг 4 нафари олий, 20 нафари биринчи, 19 нафари иккинчи тоифали ҳамда 13 нафари мутахассис ўқитувчилардир.

Давлатимиз раҳбари президентлик фаолиятининг дастлабки кунларидан бошлаб юртимизда инновацион ва креатив фикрлайдиган замонавий кадрлар тайёрлаш, ёшларни ватанпарварлик руҳида, юксак маънавият эгалари этиб тарбиялаш, шу мақсадда таълим тизимини такомиллаштириш масалаларига алоҳида эътибор қаратиб келмоқда.

Айниқса бунда, мактаб таълими тизимини ислоҳ қилиш бўйича кўплаб самарали ишлар амалга оширилмоқда-ки, бугунги кунда улар ўзининг ижобий самараси ва натижасини кўрсатмоқда.

Ҳақиқатан ҳам, жаҳондаги ривожланган давлатлар тарихига назар ташлайдиган бўлсак, уларда жамият ҳаётини ўзгартиришга қаратилган ислоҳотлар аввало таълим тизимидан, боғча, мактаб, тарбия масаласидан бошланганини кўрамиз. Чунки, мактабни ўзгартирмасдан туриб, одамни, жамиятни ўзгартириб бўлмайди. Таълим ва тарбиянинг асоси, пойдевори бу – мактабдир.

76-сонли мактаб қуриб битгазилган пайтда 216 ўқувчи ўрнига мўлжаллаб қурилган эди. Ўзбекистон Республикаси Президентининг 2022 йил 23-24 февраль кунлари Қорақалпоғистон Республикасига ташрифи давомида берган топшириқлари ижросини таъминлаш мақсадида мазкур мактаб биносига қўшимча яна 360 ўқувчи ўрнига эга бино қуриб битказилди.

Қурилиш ишлари 4 млрд. 555 млн. 532минг сўм маблағ эвазига пудратчи ташкилот “Темир бетон” МЧЖ томонидан амалга ошиилиб, қисқа муддатларда якунланди.

Улуғ маърифатпарвар бобомиз Маҳмудхўжа Беҳбудий “Дунё иморатлари ичида энг улуғи мактабдир” деган фикрни бекорга айтмаган. Сабаби, мана шу масканда инсон маънан ривожланиб, камолга етади. Ўзини англайди.

76-сонли мактабда ўқувчиларнинг таълим ва тарбия олиши, маънавий-маърифий тадбирларни ташкил этиб фаол қатнашишлари учун барча шароитлар яратилган. Ўқувчиларга малакали устозлар томонидан берилаётган билим ва кўникмалар орқали улар турли фан олимпиадалари, билимлар беллашувларида юқори натижаларга эришиб келишмоқда.

Жумладан, мактабнинг 11-синф ўқувчиси Гўзал Қадамбоева она тили фанидан, Чарос Эркинбоева эса рус тили фанидан олимпиаданинг вилоят босқичида муваффақиятли қатнашиб келдилар. Мактабда ўқувчилар маънавиятини юксалтиришга, уларни ёт ғоялардан ҳимоя қилишга қаратилган кўплаб маънавий-маърифий тадбирлар ташкил этиб келинмоқда.

Ушбу тадбирлар нафақат ўқувчиларга маънавий ҳордиқ улашишга балки, муқаддас қадриятларимизга нисбатан ҳурмат руҳининг янада мустаҳкамланишига хизмат қилмоқда.

Ф.Эшимбетова.