ТАДБИРКОРЛАР ЭЪТИБОР МАРКАЗИДА

Туманимизда фаолият юритаётган «Жайхун илҳомлари» нодавлат нотижорат ташкилоти томонидан “Беш ташаббус – беш имконият!” номли грант лойиҳаси асосида ёшлар маънавиятини юксалтириш, уларнинг иқтидорларини кенг оммага таништириш, ёшларни турли зарарли иллатлардан ишончли ҳимоя қилиш, уларнинг иш билан бандлигини таъминлаш мақсадида тадбирлар, учрашувлар ўтказилмоқда.

“Ёшлар дафтари”га киритилган вояга етмаганларни, “Темир дафтар”га киритилган оилаларнинг ҳамда “Аёллар дафтари”га киритилган оналарнинг фарзандларини “Беш муҳим ташаббус” доирасидаги тадбирларга фаол жалб қилиш мақсадида жойларда тушунтириш ишлари олиб борилмоқда.

Айниқса бешинчи ташаббус доирасида ёш аёл-қизларни ишга жойлаштириш мақсадида учрашувлар ташкил қилиниб, ўзини ўзи банд қилган ва тадбиркорлик билан шуғулланиб, даромад топаётган ёш аёл-қизларнинг иш тажрибаларини оммалаштиришга улкан эътибор қаратилмоқда.

Манғит шаҳридаги Бойовул маҳалласида ўзини-ўзи банд қилган ҳолда уй шароитида меҳнат қилиб, даромад топаётган аёл-қизлар кўплаб топилади.

Маҳаллада аёл-қизларнинг бандлиги таъминланиши билан бир қаторда осойишталикни сақлаш, кўча ва хонадонларнинг озодалигига эришиш, тўй-маракаларни ихчам-тартибли ўтказиш, ёрдамга муҳтож инсонларга ҳар томонлама кўмаклашиш борасида ҳам ижобий ишлар қўлга олинмоқда.

2022 йил давомида мазкур муаммолар ҳал этилиб, бу йилги иш режалари ҳам кўзда тутилганидек олиб борилмоқда.

Маҳалладаги “Оқила аёллар ҳаракати” томонидан ҳам режали иш асосида турли тадбирлар ўтказилиб келинмоқда.

Маҳаллада яшовчи ижтимоий ҳимояга муҳтож 72 нафар аёл-қизлар “Аёллар дафтари”га киритилган. Улардан 24 нафари ишсиз аёл-қизлар бўлиб, 8 нафари тадбиркорлик билан шуғулланиш истагини билдиришган. Уларга маҳалладаги ҳоким ёрдамчисининг тавсияси билан имтиёзли кредитлар олиб берилди. Ҳозирги кунда бу тадбиркор аёллар ўзларининг иш фаолиятларини юргизиш билан бир қаторда, маҳаллада ишсиз юрган 2-3 нафар аёл-қизларнинг бандлигини ҳам таъминладилар.

Касб-ҳунар ўрганиш истагини билдирган 5 нафар аёл-қизлар касбга ўқитиш марказида ўқиб келиб, иш фаолияти олиб бормоқдалар.

Тадбиркор аёл-қизларнинг ана шундай саъй-ҳаракатлари туфайли маҳаллада турли хизмат кўрсатиш шохобчалари, ошхона, озиқ-овқат дўконлари, тикувчилик устахоналари мунтазам ишлаб маҳалла аҳлига сифатли хизмат кўрсатиб келмоқда. Имтиёзли кредит асосида иш бошлаган Гуласал Ражабованинг озиқ-овқат дўконида уй-рўзғор буюмлари, озиқ-овқат маҳсулотлари сотилмоқда. Сифатли озиқ-овқат маҳсулотлари харидорлар томонидан миннатдор ҳолда харид қилинмоқда.

Тадбиркор аёл дўконни кенгайтириб, янгидан иморат қуриш эвазига озиқ-овқат турларини кўпайтириш ниятида.

Тадбиркор Муборак Ражабова эса тикувчилик цехи очиб, икки нафар шогирди билан иш олиб бормоқда. Тажрибали тикувчи томонидан бежирим кийимлар ҳар бир буюртмачининг истаги-диди асосида тикилмоқда. Тикувчи қизларга субсидия асосида янги тикув машиналарини олиб бериш режалаштирилган.

Маҳаллада тадбиркор аёл-қизларнинг издошлари кундан-кунга кўпайиб бормоқда.

Ўрозали РЕЙИМОВ, “Жайхун илҳомлари” ННТ раиси.