НАЗАРХОН ОВУЛИДА ҲОКИМ ВА ЁШЛАР УЧРАШУВИ БЎЛИБ ЎТДИ

Шу кунларда Амударё тумани ҳокими тегишли масъуллари билан биргаликда чекка ҳудудларга ҳам ташриф буюриб, ёшлар билан мулоқотлар ўтказмоқда. Жойларда ўтказилаётган бундай мулоқотлар анчадан бери ечилмай келинаётган жуда кўп масалаларни ҳал этишда муҳим ўрин тутмоқда.

Назархон овулида бўлиб ўтган ана шундай учрашувда ҳам туман ҳокими Султонбой Йўлдашев, ҳоким ўринбосари Маҳмуд Шерметов, Ёшлар ишлари агентлиги туман бўлими масъуллари ҳамда фуқаролар йиғини масъуллари, ҳудуддаги корхона-ташкилотлар раҳбарлари иштирок этишди. Учрашувда туман ҳокими бугунги кунда юртимизда ёшларни қўллаб-қувватлаш борасида амалга оширилаётган ишлар, уларнинг комил инсонлар, келажакнинг муносиб эгалари бўлиб вояга етишлари учун яратилаётган имкониятлар хусусида сўзлади.

Таъкидлаш жоизки, сўнгги йилларда давлат раҳбарининг ташаббуси ва кўмаги билан ёшлар сиёсати бўйича 6 та қонун, 15 та фармони, 15 та қарор ва 2 та фармойиш қабул қилинди, шунингдек ҳукуматнинг 39 дан ортиқ қарори ва 4 та фармойиши имзоланди. Олий Мажлис Сенатининг Ёшлар, маданият ва спорт масалалари қўмитаси, Қонунчилик палатаси ҳузурида Ёшлар парламенти ташкил этилди. Ёшлар билан ишлаш тўрт босқичда: маҳалла – туман – вилоят – республика даражасида яхлит вертикал бошқарув тизими асосида амалга оширилмоқда. Шунингдек, республиканинг барча маҳаллаларида фаолиятини бошлаган Ёшлар етакчилари иш олиб бориб, ёшларнинг муаммолари жойида ҳал этилишига яқиндан ёрдам беришмоқда.

Учрашувда шу хусусда сўз юритилиб, Назархон овулида фаолият олиб бораётган фуқаролар йиғини ёшлар етакчиси томонидан амалга оширилган ишлар билан танишилди. Ҳудуд ёшлар етакчиси ёшларнинг ўз ўзини банд этиш, тадбиркорликни ташкил этишига, тадбиркорликни ривожлантириш мақсадида банк кредитини олиш кабиларга кўмаклашиш борасидаги амалий ишлар хусусида гапириб ўтди.

Очиқ мулоқот руҳида кечган учрашувда назархонлик ёшлар ўзларини қизиқтирган масалалар, ташвишга солаётган муаммолари юзасидан туман ҳокимига тўғридан-тўғри мурожаат қилишди. Ҳудуд ёшлари асосан, иш билан таъминлаш, ўзини ўзи банд қилиш, оилавий бизнес, ўз тадбиркорлигини бошлаш жараёнида банк кредит маблағлари расмийлаштирилишида юзага келаётган муаммолар, мавжуд тадбиркорлигини кенгайтиришда амалий ёрдам ва бошқа шу каби масалалар юзасидан ўз мурожаатларини баён этди. Мулоқот жараёнида назархонлик ёшларнинг ҳудудда тадбиркорликни ривожлантириш борасидаги таклифлари ҳам тингланди.

Назархон овули ёшларидан Гулруҳ Юлдашбоева тикувчилик касбига ўқиб олишда амалий ёрдам беришни сўраб мурожаат қилди. Отабек Айтжанов эса сафарбарлик чақирув резерви бадалини тўлиғи билан қоплаб беришда ёрдам сўради. Султонбек Муратбоевга эса мурожаатига кўра, олий таълим муассасасида ўқишни давом эттириши учун тўлов контракт суммасининг бир қисмини қоплаб беришда кўмаклашиладиган бўлди.

Қолган ўрганишга вақт ва маблағ талаб этган масалалар хусусида эса мутасадди ташкилот раҳбарларига аниқ топшириқ ва кўрсатмалар берилиб, ушбу мурожаатлар ижросини туман ҳокими шахсан ўз назоратига олишини алоҳида таъкидлади.

О.Худойберганова.