“СОЛИҚЧИ - КЎМАКЧИ” ТАМОЙИЛИ АСОСИДА ТАДБИРКОРЛАРГА АМАЛИЙ ЁРДАМ КЎРСАТИЛМОҚДА

Амударё туман Давлат солиқ инспекцияси  ходимлари томонидан солиқ тўловчиларни қўллаб-қувватлаш, мамлакатимизда улар учун яратилаётган шарт-шароитлар, соҳада жорий қилинаётган ўзгаришлар, имкониятлар ҳамда солиқ қонунчилигидаги янгиликлардан вақтида хабардор қилиш, зарур тушунчалар, ҳуқуқий маслаҳатлар бериш мақсадида доимий равишда тушунтириш-тарғибот ишлари олиб борилмоқда.

Хусусан, “Солиқчи - кўмакчи” тамойили доирасида туманда фаолият юритаётган тадбиркорлик субъектларини яшил, сариқ, қизил тоифалар бўйича сегментлаш орқали уларга зарур ҳолатларда яқиндан кўмаклашиш ва янгидан ташкил этилган хўжалик юритувчи субъектлар рўйхати шакллантирилиб, ушбу рўйхат асосида жойига чиққан ҳолда уларни қийнаб келаётган муаммоларни бартараф этиш чоралари кўрилаётгани, муҳим аҳамият касб этмоқда.

Маълумки, Ўзбекистон Республикаси Президентининг 2022 йил 31 августдаги “Қорақалпоғистон Республикасида тадбиркорлик, инновацион технологиялар ва инфратузилмаларни жадал суръатларда ривожлантириш орқали аҳоли фаровонлигини оширишнинг қўшимча чора-тадбирлари тўғрисида”ги 213-сонли Фармонига мувофиқ 2023 йилнинг 1 январидан 2028 йил 1 январга қадар бўлган даврда  фойда солиғи, айланмадан олинадиган солиқ, юридик шахсларнинг мол-мулкига солинадиган солиқ ва юридик шахслардан олинадиган ер солиғи бўйича солиқ ставкалари 50 фоизга камайтирилди. Шунингдек, ижтимоий солиқ миқдори ҳам камайтирилиб, 1 фоиз миқдоридаги солиқ ставкасида белгиланди.

Якка тартибдаги тадбиркорлар учун ижтимоий солиқ шаҳарлар ҳудудида фаолият юритаётган тадбиркорлар учун 12 бараварга, туманлар ҳудудида фаолият юритаётганлар учун эса 6 бараварга камайтирилиб, йилига базавий ҳисоблаш миқдорининг 1 баравари миқдорида бегиланди.

Солиқ соҳасидаги ушбу ўзгаришлар ва жорий этилаётган енгилликларни солиқ тўловчиларга етказиш ҳамда имтиёзлардан тўғри фойдаланишларида амалий ёрдам кўрсатиш мақсадида Амударё туман Давлат солиқ инспекцияси мутахассислари масъулияти чекланган жамият шаклидаги “Қорақалпоқ маҳсулотлари” корхонасида бўлишиб, мазкур корхонада бухгалтерия ҳисоб-китобини юритиш, солиқ имтиёзлари ва уларни қўллаш тартиби тўғрисида зарур тушунчалар бердилар.

Шунингдек, улар масъулияти чекланган жамият шаклидаги “Жайхун-Аму” мебель ишлаб чиқариш корхонасида ҳам бўлишиб, солиқ имтиёзлари ва уларни қўллаш тартиби, бошқа солиқ турларидан ортиқча суммасини қайтариш, кредит олиш, ер ажратилишида эътибор бериш зарур бўлган жиҳатлар, солиқ органига алоқадор муаммо ва тушунмовчиликлар юзасидан корхонада бухгалтерия ҳисобини юритувчи ходимларга зарур маълумотлар бердилар.

Жойларга чиққан ҳолда солиқ соҳасидаги  бу каби ўзгаришлар ва енгилликлар тўғрисида солиқ тўловчиларга керакли маълумот ва тушунчалар бериш жорий этилаётган имтиёзлардан тўғри фойдаланиш бўйича “Солиқчи – кўмакчи” тамойили асосида соҳа ходимлари томонидан амалий ёрдам кўрсатилаётганидан тадбиркорлар мамнун бўлишмоқда.

Робия ЙЎЛДОШЕВА.