Янгиланаётган Конституция тарғиботига бағишланган йиғилиш ўтказилди

7 апрель куни Амударё тумани ҳокимлигининг мажлислар залида Янгиланаётган Конституциянинг мазмун-моҳияти ва аҳамиятига бағишланган йиғилиш ўтказилди.

Йиғилишда туман ҳокими Султонбой Йўлдашев, Қорақалпоғистон Республикаси Вазирлар Кенгаши Раиси ўринбосари Марям Аҳмедова, Олий Мажлис Қонунчилик палатаси депутати Зумрад Бекатова ҳамда маҳалла раислари, ҳоким ёрдамчилари, хотин-қизлар фаоли, ёшлар етакчилари иштирок этишди.

Йиғилишни туман ҳокими Султонбой Йўлдашев очди ва олиб борди.

Маълумки, Олий Мажлис Қонунчилик палатаси янги таҳрирдаги “Ўзбекистон Республикаси Конституцияси тўғрисида”ги қонунни қабул қилди. Қонун 30 апрель, якшанба куни бўлиб ўтадиган умумхалқ референдумида овозга қўйилади. Ушбу муҳим сиёсий жараёнда барчани фаол иштирок этишга, фуқароларнинг ўз ҳаётига, фарзандлари келажагига бефарқ бўлмасликка чақирш мақсадида ўтказилган йиғилишда Вазирлар Кенгаши Раиси ўринбосари Марям Аҳмедова Конституциявий қонуннинг мазмуни ва аҳамияти ҳақида батафсил маълумот берди.

Янги таҳрирга асосан, Ўзбекистон Республикаси Конституциясидаги моддалар сони ҳозирги 128 тадан 155 тага, ундаги нормалар эса 275 тадан 434 тага оширилмоқда, 128 та модданинг 91 тасига концептуал ўзгаришлар киритилаётир. Умуман олганда, Конституция 65 фоизга янгиланмоқда.

Олий Мажлис Қонунчилик палатаси депутати Зумрад Бекатова Ўзбекистон Республикасининг янги таҳрирдаги конституцияси ижтимоий адолат, эркинлик ва тенглик тушунчалари билан чамбарчас боғлиқ бўлиб, инсон ва давлатнинг ҳуқуқий ҳолатини белгилашда инсон ҳуқуқлари устуворлигига таянганини таъкидлади.

Шунингдек, ёшлар мамлакати бўлган Ўзбекистонда Янги Қомусимизнинг 79-моддасида “Давлат ёшларнинг шахсий, сиёсий, иқтисодий, ижтимоий, маданий, экологик ҳуқуқлари ҳимоя қилинишини таъминлайди, уларнинг жамият ва давлат ҳаётида фаол иштирок этишини рағбатлантиради. Давлат ёшларнинг интелектуал, ижодий, жисмоний ва аҳлоқий жиҳатдан шаклланиши ва ривожланиши учун, уларнинг таълим олишига, соғлиғини сақлашда, уй-жойга, ишга жойлашишга, бандлик ва дам олишга бўлган ҳуқуқларини амалга ошириш учун шарт-шароитлар яратади” дея белгилангани ёшлар келажаги учун мустаҳкам ҳуқуқий пойдевор бўлади.

Йиғилиш давомида сўзга чиққанлар “Ўзбекистон Республикаси Конституциясига ўзгартиш ва қўшимчалар киритиш тўғрисида”ги Ўзбекистон Республикаси Конституциявий қонуни лойиҳасининг матни 2022 йил 25 июндан 1 августга қадар ўтказилган умумхалқ муҳокамасида ва ундан кейинги жараёнларда келиб тушган таклифлар, фикр-мулоҳазаларни инобатга олган ҳолда маромига етказилганлигини, Конституцияни кўп миллатли халқимиз биргаликда яратганини таъкидлашиб, барчани 30 апрель куни ҳамжиҳат ва ҳамфикр бўлиб келажагимиз учун овоз беришга чорладилар.

Дарҳақиқат, янгиланаётган Бош Қомусимизда инсон ва фуқароларнинг ҳуқуқ, эркинлик ва мажбуриятлари тенглик ҳамда тенг ҳуқуқлилик асосида амалга оширилади. Шундай экан, унинг ҳар бир моддасига инсон қадр-қимматини ҳимоялайдиган, Янги Ўзбекистоннинг янги тараққиёт йўналишларини белгилаб берадиган муҳим восита сифатида қараган ҳолда Референдумда фаол иштирок этайлик, азиз юртдошлар!

Туман ҳокимлигининг Ахборот хизмати.