СПОРТЧИ ОИЛАЛАР МУСОБАҚАСИ ЎТКАЗИЛДИ

Мамлакатимиз миллий спорт ўйинлари ва халқ ўйинлари – жисмоний тарбия ва спорт соҳасидаги маданий мероснинг ажралмас қисмидир. Бу ўйинлар аҳолида ватанпарварлик туйғулари юксалишига, миллий ғурур ва фахр шаклланишига хизмат қилади. Шу боисдан аҳоли айниқса ўсмир-ёшларни миллий спорт турларига кенг жалб қилиш, спортнинг оммавийлигига эришиш борасида кўпгина саъй-ҳаракатлар амалга оширилаяпти, спортнинг оммавийлигига эришиш учун ҳудудларда,мактабгача, умумий ўрта таълим муассаса зарур шарт-шароитлар яратилаяпти, спорт таълими тизими такомиллаштирилаяпти, спорт турлари бўйича иқтидорли, салоҳиятли спортчилар заҳирасини яратишга эътибор кучайтирилаяпти.

Бунингдек саъй-ҳаракатларни бошланғич синфлардан ташкил этиш, жажжи ўғил-қизларнинг спорт салоҳиятини аниқлаш ва ривожлантириш ҳам жуда муҳим. Бунда спорт турлари бўйича ўтказиладиган мусобақаларнинг ҳам роли улкан.

Амударё туманидаги 10-сонли умумий ўрта таълим мактабида ўтказилган “Биз спортчи оила” деб номланган спорт мусобақаси ҳам ўқувчиларга улкан таассуротлар қолдирди.

Жорий ўқув йилида мактабга илк қадам қўйиб, айни кунда 1-синфни тугатаётган ўқувчилар ва уларнинг ота-оналари иштирокида ўтказилган мусобақада 4 та шарт бўйича беллашув ташкиллаштирилди.

Мазкур синф раҳбари У.Ўрозимбетова, жисмоний тарбия фани ўқитувчиси Морал Оғабоевалар ҳамкорлигида тайёрланган беллашув нафақат ўқувчиларнинг, балки уларнинг оиласида жисмоний тарбия ва спортга муносабат, соғлом турмуш тарзига амал қилиниши ва қизиқишларни ҳам синовдан ўтказди.

Мусобақага мактабнинг малакали ўқитувчилари ҳакамлик қилиб, иштирокчиларнинг мусобақа шартларини қай тарзда бажаришларини одилона баҳолаб бордилар.

Мусобақа иштирокчиларининг баскетбол саватчасига тўп ташлаш, кенгуру бўлиб сакраш, гимнастика якка чўпида туриб, бири-бирини йиқитиш шартларини ижро этишларини томошабинлар жуда завқланиб томоша қилдилар. Ушбу жараёнларда ўқувчилар оиласининг спортга ёш авлодни жисмоний чиниқтиришга эътибори нечоғлик эканлиги яққол намоён бўлди.

Мусобақанинг охирги “Мени танинг” деб номланган шартида ўқувчилар оналарининг салоҳияти синовдан ўтказилди. Унда оналар саф бўлиб турган ўқувчилар орасида кўзи боғланган ҳолда ўз фарзандини таниб олишлари лозим эди. Бу шартнинг адо этилиши ҳам ғоят ҳаяжонли ва қизиқарли ўтди.

Мусобақа ғолиблари рағбатлантирилди. Жажжи ўқувчилар ва уларнинг ота-оналари иштирокида ўтказилган ушбу қизиқарли мусобақа кўпчиликда спортга ҳавас ва спорт билан шуғулланишга рағбат уйғотди. Аслида ташкилотчиларнинг мусобақани ташкиллаштиришган кўзлаган мақсадлари ҳам шу эди. Чунки соғ танда – соғлом ақл. Болаларнинг соғлом, баркамол бўлиб улғайишида эса спортнинг роли улкан эканлиги барчамизга аён. Оилаларда соғлом турмуш тарзини қарор топтириш, спортни оммалаштириш шу мақсадга хизмат қилиши билан аҳамиятлидир.

Ойгул РАЖАБОВА.