SPORTChI OILALAR MUSOBAQASI OʻTKAZILDI

Mamlakatimiz milliy sport oʻyinlari va xalq oʻyinlari – jismoniy tarbiya va sport sohasidagi madaniy merosning ajralmas qismidir. Bu oʻyinlar aholida vatanparvarlik tuygʻulari yuksalishiga, milliy gʻurur va faxr shakllanishiga xizmat qiladi. Shu boisdan aholi ayniqsa oʻsmir-yoshlarni milliy sport turlariga keng jalb qilish, sportning ommaviyligiga erishish borasida koʻpgina saʼy-harakatlar amalga oshirilayapti, sportning ommaviyligiga erishish uchun hududlarda,maktabgacha, umumiy oʻrta taʼlim muassasa zarur shart-sharoitlar yaratilayapti, sport taʼlimi tizimi takomillashtirilayapti, sport turlari boʻyicha iqtidorli, salohiyatli sportchilar zahirasini yaratishga eʼtibor kuchaytirilayapti.

Buningdek saʼy-harakatlarni boshlangʻich sinflardan tashkil etish, jajji oʻgʻil-qizlarning sport salohiyatini aniqlash va rivojlantirish ham juda muhim. Bunda sport turlari boʻyicha oʻtkaziladigan musobaqalarning ham roli ulkan.

Amudaryo tumanidagi 10-sonli umumiy oʻrta taʼlim maktabida oʻtkazilgan “Biz sportchi oila” deb nomlangan sport musobaqasi ham oʻquvchilarga ulkan taassurotlar qoldirdi.

Joriy oʻquv yilida maktabga ilk qadam qoʻyib, ayni kunda 1-sinfni tugatayotgan oʻquvchilar va ularning ota-onalari ishtirokida oʻtkazilgan musobaqada 4 ta shart boʻyicha bellashuv tashkillashtirildi.

Mazkur sinf rahbari U.Oʻrozimbetova, jismoniy tarbiya fani oʻqituvchisi Moral Ogʻaboyevalar hamkorligida tayyorlangan bellashuv nafaqat oʻquvchilarning, balki ularning oilasida jismoniy tarbiya va sportga munosabat, sogʻlom turmush tarziga amal qilinishi va qiziqishlarni ham sinovdan oʻtkazdi.

Musobaqaga maktabning malakali oʻqituvchilari hakamlik qilib, ishtirokchilarning musobaqa shartlarini qay tarzda bajarishlarini odilona baholab bordilar.

Musobaqa ishtirokchilarining basketbol savatchasiga toʻp tashlash, kenguru boʻlib sakrash, gimnastika yakka choʻpida turib, biri-birini yiqitish shartlarini ijro etishlarini tomoshabinlar juda zavqlanib tomosha qildilar. Ushbu jarayonlarda oʻquvchilar oilasining sportga yosh avlodni jismoniy chiniqtirishga eʼtibori nechogʻlik ekanligi yaqqol namoyon boʻldi.

Musobaqaning oxirgi “Meni taning” deb nomlangan shartida oʻquvchilar onalarining salohiyati sinovdan oʻtkazildi. Unda onalar saf boʻlib turgan oʻquvchilar orasida koʻzi bogʻlangan holda oʻz farzandini tanib olishlari lozim edi. Bu shartning ado etilishi ham gʻoyat hayajonli va qiziqarli oʻtdi.

Musobaqa gʻoliblari ragʻbatlantirildi. Jajji oʻquvchilar va ularning ota-onalari ishtirokida oʻtkazilgan ushbu qiziqarli musobaqa koʻpchilikda sportga havas va sport bilan shugʻullanishga ragʻbat uygʻotdi. Aslida tashkilotchilarning musobaqani tashkillashtirishgan koʻzlagan maqsadlari ham shu edi. Chunki sogʻ tanda – sogʻlom aql. Bolalarning sogʻlom, barkamol boʻlib ulgʻayishida esa sportning roli ulkan ekanligi barchamizga ayon. Oilalarda sogʻlom turmush tarzini qaror toptirish, sportni ommalashtirish shu maqsadga xizmat qilishi bilan ahamiyatlidir.

Oygul RAJABOVA.