Кадастр ҳужжатлари мавжуд бўлмаган кўчмас мулк обеъктлари ва солиқ қарздорлиги бор хонадонлар хатловдан ўтказилмоқда

26 июль куни Амударё туманининг Холимбег овулида туман ҳокимлиги, Кадастр агентлиги туман бўлими, солиқ инспекцияси ҳамда бошқа ташкилот масъул ходимларидан иборат ишчи гуруҳ аъзолари маҳаллаларда бўлиб, хатлов ишларини олиб бордилар. Хатловдан кўзланган мақсад – кўчмас мулк объектлари рўйхатида мавжуд бўлиб, лекин шу кунга қадар кадастр ҳужжатлари мавжуд бўлмаган объектларни аниқлаш ва аҳолига ҳуқуқий тушунтиришлар беришдан иборат бўлди.

Маълумки, 2022 йил 6 июнь куни “Ер муносабатларида тенглик ва шаффофликни таъминлаш, ерга бўлган ҳуқуқларни ишончли ҳимоя қилиш ва уларни бозор активига айлантириш тизими такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида”ги Ўзбекистон Республикасининг Қонуни қабул қилинган эди.

Шунингдек, Ўзбекистонда кадастр ҳужжати йўқ уй-жой ва ерлар тўлиқ рўйхатга олиниб, ўзбошимчалик билан эгалланган ерлар ва қурилган уйлар масаласини ҳал этиш бўйича қарор, дастур ва график ишлаб чиқилиб, тизимли ишлар амалга оширилмоқда.

Лекин, баъзи фуқароларимиз ҳалигача кўчмас мулк объектларига кадастр ҳужжатларисиз эгалик қилиб келишмоқда. Хатлов жараёнларида ушбу фуқароларга нисбатан Маъмурий жавобгарлик тўғрисидаги Кодекснинг тегишли моддаларига асосан жарима солинди. Бунда кадастр ҳужжатларисиз кўчмас мулк объектларига эгалик қилиб келаётган юридик шахсларга базавий ҳисоблаш миқдорининг 15 баробаригача, жисмоний шахсларга эса 10 баробар миқдоригача жарима солиш кўзда тутилган.

Хатлов жараёнларида фуқароларга ер ва уйга оид барча ҳужжатларини сақлаб, имкони бўлса, йўқотилганларини тиклаб олишлари лозимлиги, асосийси, ҳужжатлаштириб қолиш учун ўзбошимчалик билан қўшимча иморатлар қуришдан тийилишлари кераклиги, бу ҳаракатлар фуқаро учун муаммо келтириб, унинг жавобгарликка тортилишига сабаб бўлиши батафсил тушунтирилди.

Шунингдек, фуқароларга уй-жойга бўлган ҳуқуқларни эътироф этишга асос бўлувчи керакли ҳужжатлар тўғрисида маълумотлар берилди. Таъкидланганидек, уларга маҳалла фуқаролар йиғини томонидан тақдим этилган маълумотнома, ер ва мол-мулк учун тўланган солиқ ҳамда коммунал тўловлар квитанциялари киради.

Хатлов жараёнларида кадастр ҳужжати йўқ кўчмас мулк эгаларига кадастр рўйхатидан ўтган ҳужжатлар асосидагина ер, мол-мулк солиқларини тўлашлари мумкинлиги, барча фуқаролар орасида ерга эгалик қилиш тенглик ва шаффофлик асосида олиб борилиши қатъий тарзда тушунтирилди.

Ундан ташқари, солиқдан қарздорлиги бор бўлган фуқароларга жорий йил учун ҳисобланган солиқларни тўлаш тенг улушларда 15 апрель ва 15 октябрь саналарига қадар амалга оширилиши белгилангани, ер участкаларидан ҳужжатсиз ёхуд ер участкасига бўлган ҳуқуқни тасдиқловчи ҳужжатларда кўрсатилганидан каттароқ ҳажмда фойдаланилганда, солиқ ставкаси белгиланган ставканинг уч баравари миқдорида ҳисобланиши батафсил тушунтириб ўтилди.

Шунингдек, агар солиқ имтиёзларини олиш ҳуқуқига эга бўлган фуқаролар бўлса, имтиёзларни олиш ҳуқуқини тасдиқловчи хужжатларни мустақил равишда солиқ инспексиясига тақдим этишлари лозимлиги, мол-мулкнинг кадастр қиймати ва ер майдонлари ўртасида фарқ аниқланган тақдирда Кадастр агентлиги туман бўлимига мурожаат этишлари лозимлиги айтиб ўтилди.

Хатлов жараёнлари давомида кадастр ҳужжатлари мавжуд бўлмаган кўчмас мулк объектларининг эгалари солиқ қарздорлигини ўз вақтида бартараф этишлари, акс ҳолда белгиланган тартибда ҳар бир кечиктирилган муддат учун пеня ҳисобланиши ва солиқлар суд тартибида ундирилиши ҳақида огоҳлантирилди.

Туман ҳокимлигининг Ахборот хизмати.