ТЕЗ ТИББИЙ ЁРДАМ БЕМОРЛАРГА НАЖОТ БАҒИШЛАЙДИ

Мамлакатимиз аҳолисига тез тиббий ёрдам кўрсатиш сифатини ошириш мақсадида “Аҳолига тез тиббий ёрдам кўрсатиш тизимини такомиллаштириш тўғрисида”ги 2022 йил 16 июнда қабул қилинган Президент Қарори соҳада туб ўзгаришлар ясалишига замин бўлди.

Қарорга мувофиқ Республика тез тиббий ёрдам маркази ва унинг 14та ҳудудий тез тиббий ёрдам хизмати ҳамда тиббий автохўжаликлар негизида қайта ташкил қилинди ва тез тиббий ёрдамнинг ягона вертикал тизими йўлга қўйилди. Тиббий бригада беморнинг аҳволи ва касаллик турига қараб, ҳудудидан қатъий назар, унга энг яқин масофадан юборилади. Марказий шифохоналарда эса кун-у тун ишлайдиган шошилинч қабул бўлимлари ташкил этилди.

Мазкур Қарорга мувофиқ ташкил этилган Республика тез тиббий ёрдам Маркази Қорақалпоғистон филиалига қарашли Амударё туман бўлими туман Тиббиёт бирлашмасининг юқумли касалликлар бўлими биносининг биринчи қаватида жойлашган. Бўлимда шифокорларнинг, фельдшерлар, ҳайдовчиларнинг бўш вақтларида дам олишлари учун хоналар, бўлим мудири, хўжалик бекаси хоналари, энг зарур дориларни сақлаш хоналари мавжуд.

Бўлим таркибида 1та марказий подстанция ва 11та шохобча мавжуд бўлиб, уларда жами 15 бригада – 11та умумтармоқ 1та реанимацион, 3та фельдшерлик бригадалари фаолият юритади.

Бўлимдаги барча автомашиналарга  GРS ўрнатилган бўлиб, ҳаракатланиши диспетчер олдидаги монитор орқали онлайн кузатиб борилади.

Бўлимда фаолият юритувчи ходимлар жами 302 нафарни ташкил этади. Шу жумладан, 38 нафари асосий, 22 нафари ўриндош шифокорлар, 161 нафари асосий, 1 нафари ўриндош ўрта тиббиёт ходимларидир.

Улар туманимиз аҳолиси тез тиббий ёрдамга муҳтож бўлиб қолганда чақирувларга зудлик билан етиб боришга ва тез тиббий ёрдам кўрсатишга ошиқадилар.

Жорий йилнинг ўтган олти ойи мобайнида бўлимга жами 25952та чақирувлар бўлди. Уларнинг 25527таси бажарилган. 25776 нафар беморга тез тиббий ёрдам кўрсатилди. Жами чақириқларнинг 489таси бахтсиз ҳодисалар, 12399таси шошилинч чақириқлар, 4890таси шошилинч бўлмаган, 969таси туғруқ ва ҳомиладорлар патологияси бўйича чақириқлар, 29таси эса шифохонадан шифохонага ўтказишлардир. Тез тиббий ёрдамга муҳтож бўлиб мурожаат қилганлардан 4323 нафар бемор шифохонага ётқизилди, 962 нафар беморга эса амбулатор ёрдам кўрсатилган.

Чақириқлар давомида тез тиббий ёрдамга муҳтож бўлиб қолган беморларга аниқ ташхис қўйиш учун бўлимимизда  13та ЭКГ аппарати ва оғир ҳолатдаги беморлар аҳволини енгиллаштириш учун зарур бўлган анжомлари, беморларга ўз вақтида сифатли тез тиббий ёрдам кўрсатиш учун 41 номдаги дори препаратлари мавжуд.

Кейинги йилларда аҳоли орасида тез тиббий ёрдамга эҳтиёж кучаяётганини эътиборга олиб, яқин кунларда марказий станцияда янгидан тез тиббий ёрдам бригадаси ташкил қилиш режалаштирилмоқда.

Бунингдек чора-тадбирлар туманимиз аҳолисининг соғлигини муҳофаза қилишга, зарурат туғилганда дард  исканжасида қолган одамларга тезкор тиббий ёрдам беришга қаратилгани билан аҳамиятлидир.

Константин Шабаев,

Республика тез тиббий ёрдам маркази

Амударё бўлими мудири.